朋友最近被一位唔錯既男士追求，但佢拒絕左，背後有好多原因，但其中一個原因很令人心痛。
「我襯唔起。」
唉。傻女，你襯得起任何人。
唔係淨係想同我既朋友講，我係想同每一個人講，同埋同自己講。冇人襯唔起另一個人，至少我冇見識過，你見過既話不妨同我分享。人人平等冇分高低，我真心相信架！
朋友既追求者高大、見識廣博、前途無量，我朋友認為呢個男人值得更好，例如係一個成熟、聰明既女人。
傻女，你又唔係佢，你點知佢想要咩？你話佢值得更好？我倒想知咩叫更好？好同唔好標準從何而來？諗清楚啲，係你唔夠自信，唔係佢值得更好。
曾經也有類似既感受。遇過一位出色既對象，讀書厲害不斷拎奬學金，年紀輕輕已在計劃做教授同開自己既公司。除左勤奮向上、胸懷大志，佢人品仲要好好，心地善良，對住我呢個煩膠都充滿耐性。
而我呢，外貌平庸，有點男仔頭，絕對稱不上溫柔賢淑，笨手笨腳，又成日俾人話我痴線。出邊大把好女仔，靚過我性格好過我實有啦掛，邊輪到我？好啦佢真係重口味鐘意我，但也難保佢有一日唔會變心。
自信不足既我都餚底過，但最後都係豁出去。原因好簡單，因為我真係好鐘意佢，有啲似袁湘琴喜歡江直樹個種。我未必信自己，但我信我對佢既愛。我相信我既愛可以俾到佢最大既幸福。我會用我既風趣幽默調劑佢苦悶既研究生生涯，我會做佢既私人啦啦隊幫佢打氣，我會分享我既冒險家精神鼓勵佢作更多勇敢既嘗試。我大膽同佢表白，而佢表示好耐以前就鐘意我，哈哈真係開心死我。
雖然最後我地冇一齊，但有好一段時間，佢既存在令我更努力，追求健康生活模式、做一個更正面既人，因為我要成為一個更好既人，帶更好既野俾佢。
愛情係一種強大既力量，有時候可以蓋過你自信不足既問題甚至拉近兩人之間既距離。冇話你太好我唔夠好，如果你地兩個搵到一個二人之間平等既相處空間，不就可以了？
當然你會聽過某人與某人很合襯、郎才女貌等，也有人背後評論某個人咁好條件點解會揀一個咁唔起眼既人，但呢啲就真係食飽無聊，茶餘飯後大家既話題。
（打到手軟添，下回再續。）
.jpg)
