第一回合，勝者……
「你所講嘅plan b即係點？Maria媽媽唔係好明。」Maria媽媽說。
「要得到佢嘅錦囊，唔係合作就係用武力夾硬搶，咁你明喇？」樂哥收起平日從容的面貌，擺出罕見的嚴肅認真樣子。
「搶？點搶？佢好Q打得㗎！我隻腳搞成咁就係因為佢呢個仆街，雖然我都好很想報仇，但……」老鬼看着自己瘸了的腿說，但未說話已經被樂哥打斷了。
「唔駛但係，只要你想報仇就得，你一個唔夠打啫，我哋而家有四個人，一人㩒住佢一隻手或者一隻腳，咁都仲會搞唔掂咩？」樂哥反問，老鬼無話可說只能點頭。
「我有問題。」野仔舉手問︰「我哋搶緊嗰時阿雲嚟到咁點算？我哋會一鑊熟。」
「只要唔畀佢捉到咁就得啦！」樂哥臉色陰暗的道︰「我哋到時分開走，睇吓佢會追邊個，咁被追嗰個人就辛苦你，麻煩盡量拖耐啲。」
「咁即係當被追嘅人係condom？唔得，我唔贊成！」野仔反應很大的反對。
老鬼也立即跟着說︰「頂！我都反對！我咁嘅死樣，要捉一定係捉我，對我好銀唔公平，我死都唔會肯！」
樂哥提出的方案被多人反對，但他反而開懷的笑着說︰「好彩你哋反對，幾驚你哋麻木哂變咗冷血嘅殺人機器，而家見你哋仲識反對咁我就無咁驚。」
「吓？即係點？」野仔和老鬼異口同聲的說。
「即係我哋要揾個人睇水，見到阿雲嚟我哋就即刻走，唔好有任何留戀 ，『留得青山在，哪怕無柴燒？』最緊要人無事，要捉阿月總會再有機會，反正呢度係密室，佢都無地方走。」樂哥回復之前開朗的笑容說。
可是，現在最大的問題，就是阿月在地下，與阿雲將會正面對決，萬一阿月失手被擒，那麼他們的計劃便會泡湯，最後就只有阿雲才能離開這裏──最少老鬼和Maria媽媽是這樣想。
「咁我哋係咪要落去救佢先得？」野仔問。
「咩話？救條仆街？咪同我講笑，老子第一個反對！」老鬼反應很大。
Maria媽媽也異常憤怒道︰「Maria媽媽都唔想救佢，佢殺咗幽幽，我恨不得佢快啲死！」
「但係唔救佢，佢死硬，佢死咗，啲錦囊就會落入阿雲手入面，到時我哋就束手無策㗎喇。」野仔極力煽動大家救人，不過始終徒勞無功。
此時，樂哥站出來扮演好領袖的角色說:「不如咁，作為文明嘅人，我哋用返文明嘅方法去決定啦，我哋一於舉手投票，小數服從多數。」
「咁即係唔會救啦……」野仔小聲埋怨道。
「唔好咁悲觀，可能會有驚喜呢。」樂哥安慰道。
最後投票結果，沒有驚人的反轉，二比一決定不救，野仔雖然不順但也只好乖乖服從，樂哥見狀也只好跟他說︰「呢個就係民主嘅暴力，無人知點樣做先有最好嘅結果，而呢個決定只可以代表大部份人認為咁係最好嘅方法。」
安慰有沒有作用並不重要，重要的是他們已經有了共識。樂哥站出來打圓場道︰「既然大家都有了最終決定，咁我哋喺度一邊靜觀其變，一邊揾錦囊，唔好浪費時間。」
接着的時間，他們主要在廳和走廊尋找錦囊，然而視線始終離不開地下洗手間，這樣不專注的行貨式尋找錦囊，竟然也被他們找到其中一個。
「喂，大家快啲嚟睇吓，係藍色錦囊。」老鬼在走廊地板的暗格裏發現了一個裝着錦囊的啤酒樽。
「勁喎，咁你都揾到。」野仔禁不住讚賞道。
「呢塊仆街地板啲聲唔Q同，我咪試吓起佢老母出嚟，點Q知真係有，快啲嚟幫拖解開佢先，樽口張紙條寫明唔准扑爛佢。」老鬼呼喊眾人的目的是開鎖。
這個啤酒樽並沒有甚麼特別，只是很常見的那一款啤酒樽，奇就奇在樽口如此狹窄，大大的錦囊竟然也能放進去，而且還是在樽口未被打開、裏面滿是啤酒的情況下。
「唔准扑爛個樽點攞佢出嚟？而且仲裝滿酒，佢點做到㗎？魔術嚟喎！」野仔驚嘆道。
樂哥接過啤酒樽，仔細檢查，並說︰「魔術都只係掩眼法同手法，只要認真仔細睇，就會發現破綻，當你了解佢背後原理之後，你就會講一句︰『頂，乜咁低能㗎喳？』信我，每次都係咁。」
不消三兩下功夫，樂哥便打開了啤酒樽蓋，而且還在滴酒不沾、滴酒不瀉的情況下，把錦囊輕易的拿了出來，眾人都嘖嘖稱奇。錦囊比平常的細少，但在啤酒樽內時卻與其他的錦囊無異。
老鬼看着這一幕，首當其衝發言︰「嘩頂！你點做到㗎？你識魔術㗎？好很勁喎，我老鬼成世人都好少佩服人，你係其中一個。」
樂哥笑而不語，把錦囊遞給老鬼說︰「呢個係你發現嘅，所以屬於你，由你打開佢啦。」
老鬼接過錦囊，迅速打開打算朗讀出裏面的紙條，但卻赫然發覺紙條寫着英文，自己不太懂，只好硬着頭皮說︰「Fish me is fishing all。」
「Fish me？咁怪嘅？不過啲錦囊都係奇奇怪怪，所以都慣哂。」野仔吐槽說。
「即係點？釣我就係釣緊所有嘢？完全唔明。」Maria媽媽也參透不到箇中玄機。
眼見人人也變成丈八金剛，樂哥再次發揮強大打圓場威力︰「其實啲錦囊好多我哋都係唔明，不過只要我哋去到嗰個階段，自然就會明，呢個錦囊睇嚟同釣魚有關，我哋留意多啲大宅有啲咩同釣魚有關，或者會有線索。」
「喂，你哋睇吓下面。」老鬼大喊，各人紛紛望向地下，看到阿雲和阿月雙方一動也不動，他們也屏息以待，靜觀事態的發展，把錦囊的事都暫時拋諸腦後。
+×+×+×+×+×+×+×+×+×+×+
在天花板上，阿雲已經悄然到達洗手間的上方，他輕力的移開天花板，好讓露出一絲縫隙能夠查看裏面情況。
不過，阿雲看了很久，整個洗手間所有的角度都看過數遍，就是看不到阿月的影蹤，他憑空消失了！
「有咩可能？照計佢應該喺度先係，成層地下都已經無其他地方畀佢匿㗎喇喎……」阿雲看着空無一人的洗手間不禁納悶起來，而且覺得整件事很匪夷所思。
他禁不住好奇心，心想或許是環境太過漆黑看不清楚，還是選擇了跳下去查看，看看阿月躲了在哪裏、洗手間藏了甚麼秘密、有沒有甚麼秘道之類。
洗手間並不大，設施亦不多，分別是牆壁只掛有鏡櫃的洗手盤、正常尺寸的抽水馬桶以及裝滿水的浴缸，整個洗手間就只有這三樣東西。任憑阿雲如何努力，他終究就是找不着，整個洗手間根本無處可藏！甚麼秘道、密室之類的東西壓根就不存在，就連阿月都並不存在！
「好惡，諗住整定個密室嚟個甕中捉鱉，點知畀佢金蟬脫殼，又唔知去邊揾佢先得。」阿雲生氣的說。
阿雲在洗手間找不到阿月，的確有點憤怒，但轉瞬便被理智所說服，既然他不在，那一定在別的地方，那麼再去找就好了。於是他再次爬到天花板上，繼續往前進，並在廚房跳下來，而洗手間又再次變成空無一人。
才怪！
確認阿雲離去後，阿月先在浴缸探頭查看外面，原來他一直都躲在浴缸內！他先確認真的安全，然後才攝手攝腳的爬出來，生怕些微的動靜都會再次招來阿雲，待他完全爬出來之後，又輕輕力的把那塊白色膠版放回浴缸內。
這個手法，是參考自魔術表演。利用昏暗的環境和同色的背景，再加上水的折射，把露出破綻的機會減到最低，令自己在仿如密室般的洗手間內「消失」，完美避開了阿雲的追殺。而這個戲法，是他看到這塊膠板的瞬間才想出來的。
阿月大口大口的吸入氧氣，他整個人因閉氣潛水太久而瀕臨缺氧，臉顯得青青的，如果阿雲再晚一點才離開，阿月便會淹死在浴缸內。
「慳咗個『何』都係賺，而家要離開呢個洗手間，不露聲色咁都係靠天花板先得，不過要爬去揾咗個錦囊先。」阿月逐吋逐吋的移開天花板，然後探頭張望，確認是安全才爬上去，然後徑直往大廳方向爬去。
在大門上方，一個錦囊安靜的躺在角落，等待人們來找它。
「哈，真係有，估唔到呢個位置竟然有兩個錦囊，等我仲以為你無睇到我喺度拎咗個錦囊，叫我嚟多次㖭。」阿月滿意的跟某人匯報。
這個是紅色的錦囊，裏面放了一枝鐵筆。
「一枝鐵筆……係打算叫我撬門走？」阿月繼續通話，但沒有得到回音，於是他便攜着鐵筆爬到洗衣房，確認安全便爬下來，之後再探頭張望，再三確認阿雲已經離開地下層便悄悄的走到大門前，肆無忌憚的用鐵筆撬起門來。
可惜，無論他如何努力，門始終紋風不動，更甚的是，危機正從他身後逐步襲來。
本身在廚房守株待兔的阿雲，終於守得雲開見月明，他絕不相信一個人能夠憑空消失，所以一直躲在廚房等候他自己現身，雖然花了一點時間，但最終還是出現了。
阿雲閉着氣，盡量隱藏自己的氣息，悄悄的走到阿月身後，就在伸手可及的距離內，他以迅雷不及掩耳的速度伸手襲向阿月。然而，阿月也不是省油的燈，就在毫秒間，他還能夠有餘裕蹲下避開，然後精準的以鐵筆揮向阿雲右腳「上五寸下五寸」，只是阿雲也久經訓練，靠着長年在水缸捉魚練就迅敏的反應，及時向後小跳避開了攻擊。
「睇唔出你都有返兩道散手，咁都避得開，我似乎太睇小你。」阿月讚賞道，就像在戰場上遇上旗鼓相當的對手般。
「句說話應該由我講先岩，以為你專注緊撬門，估唔到仲有將注意力放喺周圍。」阿雲也非常佩服他。
他倆雖然互相稱讚，但心底並沒有一絲「啊！如果我哋唔係身份對立咁相遇就好喇，我哋一定會做到好朋友。」嘅感覺，這種互相稱讚並不是因為惺惺相惜，反而是源自於一直留存在人體內的動物本性，想藉着消滅強大的對手來證明自己更優勝的心態，所以越讚賞得多，到消滅對手後便證明自己越厲害。
他倆已經對峙了近一分鐘，沒有動作、沒有鬆懈、沒有破綻，高手對壘，往往一招定勝負，但誰也不敢隨便出這一招。
阿雲雖然只要觸碰到阿月一下便勝負已分，可是阿月手持大殺傷力武器，而且是手臂的延伸，可於阿雲碰到自己前先攻擊到他。這種勢均力敵的場面不知還要維持多久，或者只有等其中一方感到累，或者誰先沉不住氣才有進展。
「『敵不動我不動』，我就睇吓你可以唔郁幾耐。」阿雲心想。
「再咁落去都唔係辦法，嚟咗咁耐都仲未有嘢落過肚，我feel到有少少肚餓，隨時支撐唔住，不過我諗佢都應該同我差唔多，呢刻都係鬥意志，講意志我實唔會輸！」阿月緊握鐵筆，強忍飢餓，鬥志旺盛。
「佢做乜突然鬥志咁高昂嘅？唔通佢諗到啲咩詭計？」阿雲有點擔心。
「係機會！」電光火石間，勝負已分。
阿月逮到阿雲擔心遲疑的瞬間，主動出擊，以鐵筆直直刺向他的心臟位置，陷於被動的阿雲只能側身躲避，但還是被刺傷了少許，而阿月則把握這轉瞬即逝的空位立即逃跑，阿雲轉身再追已經被拋開五、六個身位，雖然不是追不到的距離，但處理傷口要緊，畢竟被鐵筆劃傷，傷口有被感染的風險。
在這一連串雖然只有數秒但卻很精彩的攻防後，第一回合，阿月獲勝。
阿雲負傷走到廚房，他把廚房翻轉也找不到急救箱，他只好用下廚用的米酒當消毒酒精沖洗傷口，刺痛感頓時令他精神百倍。
「既然佢有鐵筆，我都揀樣武器頂住先，唔係round two都會輸畀佢。」阿雲看着滿牆的廚具自言自語，最後揀選了一個平底鑊︰「煎pan都唔錯，進可攻，退可守，round two就有本錢同佢再鬥過。」
另一方面，急於逃生的阿月一鼓作氣跑到三樓才回頭查看阿雲有沒有追上來。
「呼……總算……暫時安全，不過體力……都用得七七八八……頂……頂唔到幾耐……」他躺在地上，氣喘吁吁的說。
+×+×+×+×+×+×+×+×+×+×+
監察室內，全部人也注視着阿雲和阿月的對決，作為用上帝視覺觀看整件事的人，他們看得也十分緊張。
「阿雲set哂陷阱，阿月點走都走唔到，今鋪實死。」其中一位電了大波浪頭的長髮女工作人員說。
「未必，佢咁樣匿埋，基本上好難畀人發現，除非摸到，我反而比較擔心係佢夠唔夠氣。」一位白淨小生回應。
「你哋話阿雲會點樣進攻？佢爬咗上天花板我哋無cam好緊張。」另一位一臉鬍渣的年青人問，不過得不到任何回應。
此時，事前準備多時的阿雲從天花板跳下來，四處檢查洗手間，當他走到浴缸前，各人也自然的緊張起來、手心冒汗，直到他放棄離開才鬆了一口氣。
但很快他們便擔心起阿月來，他遲遲未現身，大家都擔心他是不是溺斃了，特別是Erik Erikson。
「喂，快啲出嚟啦，唔好死，個實驗靠你㗎。」他默念，或許是念力的力量，阿月在Erik Erikson默念後便再次在水面現身，而且是有意識的。
「Yes！」Erik Erikson暗自興奮了一下。
監察室的人都專心看着阿月爬上天花板，之後便屏息以待，只有Erik Erikson獨自走到一旁。接着良久阿月才在洗衣房爬下來，大家這才再次敢大力呼吸，大伙都遺忘了另一主角阿雲，更枉論在一樓的吃瓜群眾。
阿月開始撬門，他們的心情也跟着一起緊張起來，能撬開嗎？會安全嗎？阿雲會突襲嗎？想到這，才有人意識到阿雲在鏡頭前消失了，不知所蹤。
「有無人知阿雲去咗邊？」其中一個胖子問，但得到的回覆卻是︰「咪鬼理佢咁多，而家個個都淨係睇阿月。」
大家等待撬門結果的同時，鏡頭終於出現了阿雲的身影，不知從哪裏閃出來的他迅速接近阿月，並伸出手向他襲去，但阿月避開了！眾人都看得心臟停頓，直呼緊張。
雖然無人在意阿雲剛才藏在哪裏，但胖子卻覺得他絕不簡單。短短時間內已經找到閉路電視的死角，將自己隱藏得如此完美，就像忍者般在意想不到的地方跳出來攻擊別人，令人防不勝防。
接着兩人對峙良久，大家都鴉雀無聲等待結果，直到阿月成功逃脫，熱烈的掌聲和興奮的歡呼室才又充斥着整個監察室。
Sigmund Freud為看到了期待的畫面而滿意的笑了，雖然他一直強調不介入實驗，但心底始終都想看到一場精彩刺激的對局。至於Erik Erikson，他則為阿月能成功逃脫、脫離險境而鬆了一口氣，畢竟要是他出局，那麼便很難再掌握遊戲發展。
「我開局我開局，我做莊，賭最後邊個贏。」其中一名年青小伙子興高采烈的說︰「阿雲贏，一賠一點二；阿月贏，一賠一點五；樂哥贏，一賠二；野仔贏，一賠五；Maria媽媽贏，一賠十；老鬼贏，一賠二十。買得多贏得多，有賭未為輸，嚟嚟嚟……」
這一弄令氣氛被炒得熱烘烘，不過Sigmund Freud和Erik Erikson都未有阻止，反而帶頭下注，使得大伙情緒更高漲。
+×+×+×+×+×+×+×+×+×+×+
「搞X錯，咁都走到？」
「回水！做戲嘅，有劇本㗎！」
「好精彩，ching你唔識就唔好衝出嚟柒。」
「阿月型呀！」
「老公叻叻。」
「我係阿雲就一定拎張櫈ban埋去先再算。」
「CLS，個阿月開掛？好op喎。」
網民們為這一場決鬥留了很多留言，使得直播因演算法被推得更前，觀看的人數再增加了不少。
「睇直播嘅人突然多咗幾k，今次對壘效果幾好。」Fiona自言自語。
「唔駛咁內斂嘅，今次的確係目前為止最好嘅一次，不過我哋每次都有進步，唔係咩？」Ben看着觀看人數飆升而高興起來，走到Fiona身邊按着她的膊頭，但Fiona立即撥開他，他只好順勢雙手插袋。
Chris都笑逐顏開的道︰「我有信心會再升多啲！敢唔敢同我賭返次？」
Elise露出嫌棄的眼神不屑的說︰「咪成日掛住賭，賭少一陣會死咩？」
「你唔好咁話佢啦，」Alfred打圓場道︰「佢窮得只剩下錢，人生好無聊㗎。」
Chris立即說︰「你似係攻擊我多過幫我辯護喎……」
五人你一言我一語，聊得不亦樂乎，都忘記了留意遊戲的進展。
