有時候大家傾計會問，你有咩娛樂？唔知大家既答案係咪誠實，但大家所謂既娛樂在我看來一點也不娛樂。舉幾個例子俾大家參詳下。
1）聽音樂
這算係咩娛樂？我搭車、讀書、沖涼、打緊呢篇野、甚至屙緊屎都聽緊音樂，相信唔淨係我，音樂係好多人生活一部份，係必需品，唔係娛樂囉。
2）看書看電影
其實當我放學放工，或者出左一整日街， 到腦袋沒法/不想正常運作時，任何小朋友會睇唔明既書或劇情，我都非常抗拒。
3）做運動
人人都知運動對健康好重要，但攰到一個點既時候，我諗瞓個靚覺補補眠先係最實際既做法呀。
唔知我為人是否壞透又或者平日太多抑壓，我既娛樂都係唔健康既。例如：
隊啤酒食大量垃圾食物
瘋狂shopping（因為冇錢，通常係掃阿信屋、掃超市、掃H&M大減價）
睇不知重點為何既youtube片、煲膠劇
上交友app溝下仔，睇下騎呢人自拍
欺凌我細佬同中學某些好㩒蝦既同學仔
鬼唔知零食唔係真係咁好食，煲劇浪費時間，但當好攰，腦都冇咩電波，壓力太大需要發洩，又或者被平日生活一大堆困難擊倒既時候，我好需要呢啲不怎麼有益既娛樂黎安撫心靈，平衡心理。
唔記得睇過咩報告，偶爾整幾劑損己既娛樂既人比長期生活習慣健康既人還要健康。我諗人係需要間不中發洩下，日子才容易過。
有些人功利或實務主義至上，連娛樂都要計過度過，要有益身心，要對人生整體有正面影響。例如睇電視時要把握時間做體操，去旅行要發掘代購生意，小朋友玩遊戲要趁機學下英文。大家爭取每分每秒都要過得有價值，如果唔係就浪費時間、比不上人，齋娛樂又或者低質素既娛樂甚至令人有內疚既感覺，同人講我放假打成日機都唔係幾好意思。
寓工作於娛樂係可以提升工作表現，但調番轉將工作加入娛樂就唔見得能令人真正放鬆，長久下去只會令人身心俱疲。
如果想偶爾墜落地娛樂但又過唔到自己個關，咁就搵朋友陪你一齊墮落啦！都市生活緊張，偶爾放縱一下係一點也不過份，咪當係朋友聚會，或者陪下你朋友囉。
唔理你娛樂係咩，又到weekend啦，希望大家盡情娛樂，徹底地讓身心休息呀！
.jpg)
