踏入大學，唔好女生都會考慮脫毛問題，女生們唔會再用自家既脫毛工具而係開始留意出面既永久脫毛計劃，388/688/1088，做手、做面、做腳、做腋下，只要你有錢同埋時間，做邊個部位都冇問題。女生做咩要脫毛呢?某程度上緊係為左美觀，咁就可以無憂無慮著上小背心同埋短褲，唔怕露毛。絕大部份女生都唔會同異性分享脫毛，因為佢地會覺得好尷尬，所以只會同友人分享，就算係男朋友都唔例外。但偏偏筆者同女朋友就因為脫毛依個話題帶黎生活上唔小既歡笑。
毛除左用黎脫之外，仲可以用黎講笑話，就得筆者同大家分享下幾個日常小玩笑。但後果自負，比女朋友打既話，筆者係絕對唔會負責。
一. 話說今日女朋友著藍色衫，佢一路同我出街既時候不停咁唱歌，我不自覺咁話
我:「嘩，你今日係唔係開演唱會啊?」
女朋友:「咩野演唱會啊?你係唔係想讚我唱歌好聽呢!」
我:「你今日係開藍毛毛演奏會啊……哈哈哈哈!」
二. 女朋友成日會教訓我，有時候我同佢就會好似一個上司同下屬關係。
女朋友:「你明唔明我講咩啊，都叫左你唔好咁做架啦!」
我:「明架啦!一定唔會有下一次架!」
我:「緊係會記住啦，你係毛主席黎架!你既毛語錄我一定會記住!」
三. 女朋友成日會亂咁野，覺得自己做得唔好，所以我成日都會安慰佢。
女朋友:「我係唔係好差啊，又冇身材，又唔靚女。」
我:「唔好咁諗啦，你係我心目中係完美架!」
女朋友:「你講大話，我唔信你啊!我點會一d缺點都冇，我一定會有污點啊，例如成日發你脾氣。」
我:「真係唔會架，你會完美，因為「(毛髮)無法避免令你沾上了污點」，因為有毛髮令到你冇污點!」
四. 女朋友用左新既名牌護膚品，每次見面都會問自己對手有冇滑到。
我:「有啊有啊，真係好滑架!」
女朋友:「咁都好d，我使用好多錢買護膚品架!」
我:「其實唔關護膚品事架，真正功勞係你d毛，因為毛髮可修飾的一對手。」
五. 我同女朋友都係讀歷史既人，有時都會溫下書。
女朋友:「我覺得毛澤東真係好過份，係一個好獨裁既人!」
我:「有冇咩野例子啊?」
女朋友:「佢強迫中國人民為佢做野，完全無理過人民既感受。」
我:「咁你都係好過份啦，你脫毛之前有冇問過手毛想唔想走?你咪又係為左要靚，所以問都唔問就迫佢地走!」
以上既笑話或者讀者們會覺得好無聊，好白痴，但當一個心愛既人對著你講果時，你感到既相信會係窩心，因為你願意同佢分享身體中最私密最尷尬既秘密。
作為一個男人，脫毛或者同自己完全無關係，但隨住時代既前進，脫毛呢樣野係男女方面都唔再係一個私密既話題。男人唔會再對脫毛一無所知，脫毛廣告成行成市，就算係一個男人都可以隨口講幾間公司出黎。化妝品或者要行入去店入面睇先會識，所以都依家我都唔知女人化妝要用咩野化。但脫毛廣告呢?只要抬高頭就見到極光、冷凍，無痛，各種唔同既部位脫毛，有學生價，有二人同行價，我都可以同女朋友係脫毛方面吹番幾嘴。
就係咁，當我女朋友第一次去脫毛果時，我地既人生就多左樣娛樂，就係毛毛。有時我會發出「滋滋滋滋」既聲，問佢脫毛係唔係會有聲，佢就會不停笑笑口話脫毛係冇聲。我一見到脫毛廣告就會叫佢睇下，睇下邊間抵d。有時候會用手搣下佢d毛，笑下佢脫唔哂d毛，總之有千千萬萬個玩笑。
當一對情侶可以用最尷尬既地方開玩笑，就證明大家都好愛大家，成為老夫老妻了。下次不妨同自己既另一半用脫毛開下玩笑，睇下佢會對各位讀者有咩野反應。
