父母既可發洩對像,又無手尾跟,依句說話係細細過個陣好易衝口易出。但將來既你回想返你曾經有講過依句說話既時侯,你可曾後悔過?
 
每一次同班FD落吧飲酒,阿峰永遠唔會叫一D有酒精既飲品,多數都係叫杯Apple juice就算。我地圍內班朋友成日都會笑佢:『唔係化!? 落得黎飲梗係要飲酒啦!飲蘋果汁不如返屋企飲唔好?』
 
我地每一次笑阿峰既時侯,佢都會一笑置之,不作解釋。而我地都無再問佢原因,久而久之,我地都習慣左佢係唔飲酒。
 
直到有一晚放工成班出黎飲酒,阿峰情緒好低落,滿懷心事咁。我地問佢係咪發生左咩事,佢就話:『琴晚......我發夢見到自己飲完酒返屋企,阿爸阿媽不斷指住我黎罵,問我成晚去左邊,話我成日玩到咁夜唔返屋企,仲飲到成身酒氣返黎......』
 
阿峰接著說:『之後我好嬲,我覺得佢地好煩,於是係咁講粗口罵佢地,最後仲好大力咁......關埋房門訓覺唔理佢地。』
 
講到依到,阿峰雙眼通紅,開始忍唔住流眼淚,講到想喊咁。我地見到阿峰竟然講到喊,我地就知道阿峰係認真,我地都收起講笑既心情,好沉重咁繼續聽阿峰講落去。
 
『到我今朝早醒返個陣,我好想再訓過,我不斷逼自己再發多次依個夢.....但係,我點樣逼自己都好,都發唔返個個夢。我呆呆咁攤係張床到,望住天花板,都唔知喊左幾多次......我真係.....我真係好想......好想同爸爸媽媽講.....我戒左酒....我已經戒左酒,對唔住.....對唔住。』
 
阿峰講唔到落去,都放低左男人既面子,係我地面前毫無保留咁盡情地喊。心水清既我地,都知道阿峰抑壓左好耐。阿峰以前係一個好乖既男仔,好聽屋企人話,好鐘意痴住爸爸媽媽,但自從上到中學之後,阿峰開始反叛,識左一班豬朋狗友,日日吃喝玩樂,書都唔讀,晚晚飲酒飲天光。對於父母好言相勸,阿峰就覺得佢地好煩,好老套,老而不。

 
阿峰咁介懷個夢,係因為阿峰既爸爸媽媽係三年前一次交通意外不幸相繼去世。雖然阿峰之後修心養性,行返正軌,但已經報答唔到父母既情,令到父母死個日都帶住自己個仔唔聽話既事實含恨而終。阿峰最可恨既係,係夢入面始終同唔到父母講一聲『對唔住。』
 
當晚我地大概知道阿峰點解無再飲酒,而且阿峰既事令我地在埸既人都有一個反思。因為係依件事上面,阿峰深深體會到咩叫做『樹欲靜而風不息,子欲養而親不在』既道理。
 
反觀自己,細細過個陣都好似阿峰咁樣,好鐘意痴住老豆老母,特別係老豆。因為覺得老豆咩都識咁,屋企裝修,水電冷氣,燈泡,總之涉及機械木工既野,我老豆一定攪得掂,就算你趺親,整傷邊到都好,老豆一定可以用佢既"醫術同經驗"同你講:『小事黎姐!老豆以前我都試過奶野! 比你仲大獲! 拿! 無事既! 阿爸同你塗D趺打酒!好快好返!』個一刻,本來好驚好痛既心情,聽到咁有權威性既老豆咁講,即刻放鬆哂。
 
細細過同屋企人出街個陣,好多時都未見過世面,對身邊所有事物都好好奇,成日捉住爸爸媽媽黎問:『個D咩黎架? 話我知話我知!』有時侯唔識功課,對於只有小學程度都無既父母,佢地都盡量解答你,就算唔識都夾硬比個答案你,至少你錯左都可以屈係佢地身上。至於阿媽,我一聽到阿媽要落街買餸,我就即刻狗衝話要陪住佢,唔知點解個陣跟阿媽買餸係一種樂趣。有時侯同阿媽去女人街買衫,我就借機撤下嬌叫阿媽買個超人公仔比我。而且成日幫阿媽拔白頭髮,因為拔一條白頭髮,阿媽就當人工比一蚊我。個陣成日希望阿媽有多D白頭髮,因為佢愈多我就愈有錢。依家諗返起,真係好心酸,因為細細過從來無諗過,當阿媽白頭髮愈黎愈多既時侯,就代表佢愈黎愈老。
 
而我都同阿峰一樣,自上到中學之後,以上既行為都一一消失哂。每當阿媽叫我陪佢出街或者買餸時,我都會話有野做唔去,而我所謂既有野做只係留係屋企打機,久而久之,阿媽問多幾次之後,就無再叫我陪佢出街。而同老豆既關係更加黎一個180度大轉變,不但無傾過計,仲覺得佢既臭皮氣好討厭,以前覺得佢所擁有既『權威』,唔知幾時開始睇成『霸道』唔通人大左,睇野既心態同角度都唔同左!? 唔通真係好似Eason首歌咁,老豆,Shall we talk?
 
其實有樣野都幾諷刺。老豆老母辛辛苦苦供你讀書,令你擁有知識,擁有批判思考,擁有潮流既觸角。但當你擁有以上既野時侯,你就慢慢鄙視父母思想守舊,固執,什至看低你父母,覺得佢地好蠢,咩都唔識。父母供養緊你讀書,定係供養緊你厭棄父母既心?
 
當佢地問你:『依部智能手機點入鈴聲同埋有咩功能可以用架?』而你聽到之後,以一副煩厭既心態去求其講解下比佢地聽,但父母又點可以靠你幾句說話就可以學識點操控智能手機? 當佢地再問既時侯,你就好燥底咁說:『教極都唔識! 唔識就唔好用智能手機啦!』。而父母見到你燥底,討厭既時侯,佢地都唔敢再問,唯有兩老坐埋一角自己慢慢研究。
 
人好奇怪,對住其他父母就可以客客氣氣,好有禮貌,但對自己父母卻呼呼喝喝,大概父母對我地所做既野,我地都視為理所當然。好似黃子華所講:『男人只係能夠對一個女人咁老瀟(瀟灑),就係佢阿媽!』
  
阿媽問你:『阿仔呀!飲唔飲湯呀?』
你會好瀟灑咁答:『是但啦!』
 
阿媽關心緊張地說:『睇熱呀!D湯!』
 
你會好瀟灑咁答:『熱呀?! 唔飲啦!』
 
你會唔會以咁既態度同其他親戚,女朋友,或者其他父母呢?
 
有一晚同屋企人食飯,阿媽知我去左老人院探D公公婆婆,就笑說:『對住人地個阿媽就好有禮貌, "丫婆婆!你最近點呀" "食左飯未呀",對住我地就.....哈哈哈!』最後成家人都笑左,包括我。其實諗深一層,阿媽算唔算攪左個黑色幽默呢?
 
人大左,自尊心愈黎愈強既時侯,對父母既肉麻行為都愈黎愈少做。當我開始明白要珍惜父母時,但要我一下子改變成個心態,總覺得做唔到。可能肉麻唔係我風格,我愛屋企人,但自尊心強烈既我,會刻意隱藏,默默咁愛佢地。就好似屋企人買左間屋比我,但自入伙以來,我都成日返返舊屋沖涼。當屋企人笑我有新屋都返舊屋沖涼時,一定係想慳返D水費。屋企人發覺我最近成日返屋企食飯,朋友笑我做咩成日返屋企,阿爸阿媽以為我無錢出去食。
 
但其實我好想同你地講,我咁做係想留係舊屋多D時間,陪住你地,因為我愛你地。