Opportunity
翌日，失眠的阿希一早便到達便利店上班，然而，便利店拉起了封鎖線，裏面有一班穿着保護衣的人在折騰。
「弊傢伙，唔記得咗琴日個醫護講間鋪要連續封兩日，要消毒同觀察，咁錢生咪唔會嚟，阿滔咪死硬？」阿希感到絕望，但他還是不放棄，縱使機會很微，他還是留在店附近等待錢先生的到來。
終於一日下來，錢先生並沒有出現。
「可惡……有錢人都係騙子，講嘢無句真，果然無奸不成商。」阿希心裏咒罵着。
阿希懷着極強的怨恨來到隔離醫院，醫院重門深鎖，不設探訪，因為這座醫院接收的病人全都是這場疫症的患者。而在這醫院奮戰的醫護人員，大部份都並非自願進去，而是在抽生死籤中抽中死籤，被逼留在這裏工作。
阿希呆望着醫院，眼淚不自覺流下。他心裏很清楚，如果阿滔離世的話，他在世上便再也沒有親戚和朋友了，那位失蹤了的親生哥哥，在法律上亦已經死亡，他只能孤零零面對剩下的人生。
「聽日再等，一定等到。」阿希抹去眼淚，安慰自己，轉身便離開。
而他離開之時，遠遠看到醫院正門有一班病人被運上救護車，送離醫院。
「部車……好似有啲怪。」阿希看着這一幕，心裏有種很強烈的感覺。
翌日，阿希再次來到被封鎖的便利店前，今天已經沒有人在店內消毒，只是外面還站着四個警察看守，慎防有人闖進去。
「今日錢生一定會出現。」懷着強烈信念的阿希，再次在店外守候。終於，在正午時份，他期盼已久的身影終於出現。
「唔好意思，」想不到錢先生第一句便是道歉︰「琴日我有啲緊要事要做，所以嚟唔到。」
一心求藥的阿希又怎會理會這些細節？他只需要錢先生現身就可以了。由於阿滔的生命只餘下約三小時，所以他單刀直入問︰「關於你早兩日提出嘅邀請，係咪仲有效？」
聽到阿希主動提起，錢先生感到有點愕然，但更加的是驚喜。他開懷大笑地說︰「本身仲諗緊要點說服你，估唔到最後你竟然自己諗通咗，非常好。」
「但我有個條件，」阿希鼓起勇氣討價還價道︰「我要你嘅特效藥，我要救阿滔！」
錢先生臉色一沉，面有難色，轉身來回踱步，阿希急得像熱鍋上的螞蟻。阿滔的生命正逐秒減少，但錢先生還在浪費寶貴的救援時間。
終於，錢先生停下腳步，轉身嚴肅的對阿希說︰「好遺憾，呢樣嘢我幫你唔到，對唔住。」
阿希晴天霹靂，整個人像斷線木偶跌坐在地，兩行眼淚不受控的流下，同時無靈魂的哭訴︰「又話有酬勞，足夠我未來幾代生活無憂，而家連一粒藥都換唔到，有鬼用？」
聽到這裏，錢先生重申一次說︰「我力所能及嘅都可以，但呢樣已經超出我能力範圍，好抱歉。」
「你唔救佢，咁我都唔會代表你出賽。」阿希斬釘截鐵的說。
「你諗清楚喎，真係咁決定？你嘅出場費夠我哋以後唔駛再開便利店噃。」一把熟悉的聲音從轉角處傳來，是阿滔！他整個人神采飛揚、精神奕奕，比患病前更容光煥發。
「阿滔？你無事喇？」阿希立即破涕為笑，衝上前緊緊摟着他。
「係錢生琴日去醫院救返我，佢係我嘅救命恩人，你快啲代表佢出賽，贏咗場比賽報答佢，順便賺埋佢嘅報酬，我哋就可以衣食無憂。」阿滔與之前的態度相比，呈一百八十度反轉。
「但你唔係話……」阿希也感到奇怪。
「佢救咗我，我哋就一定要報恩，感恩圖報係美德，而且成件事對我哋嚟講都只有利無弊。」阿滔再三游說。
雖然眼前的阿滔與之前判若兩人，但他所說不無道理，而且亦合情合理，所以阿希最後還是答應了。
「救阿滔就係你講琴日要做嘅急事？」阿希發揮他驚人的觀察力和推理能力。
「冷靜返之後你就理智上線，無錯，呢樣係其中一樣。琴日我就係趕住救佢所以先無出現。」錢先生滿意地笑着說︰「阿希，我咁叫你應該無問題呀可？我就係欣賞你嘅觀察力所以先揾你代表我，我知你一定會係贏嗰個，我睇人唔會錯。」
「咁你觀察咗我幾耐？」阿希突然認真起來，質問錢先生︰「早兩日個細路你又畀咗幾多錢佢？班假警察你又用咗幾多錢請返嚟？」
「哦？咁你都發現到？觀察你其實都係一個星期左右嘅事，我自問已經好小心，揾咗唔同人用唔同方法嚟試探，估唔到最後你都係識穿。」錢先生非常驚喜，笑呵呵答︰「至於個細路同班警察都唔係好貴，只係普通一套賀歲片嘅價錢，但我睇佢哋都演得好pro，你點發現㗎？」
「觀察我咁耐咁睇得起我？我只係一個普通人嚟，何德何能？」阿希聲音清晰，字字鏗鏘的答︰「單『交通意外』其實都幾完美，但偏偏差咁啲嘢，我後尾先諗得通。唔好話警車，就算普通車都好，失控衝上行人路都一定會煞車同響咹提醒途人躲避，更何況係保護市民生命財產嘅警察？但事發嘅時候，響咹聲同煞車聲都聽唔到，路面連呔痕都無，但又可以啱啱好撞飛個細路就停低，有可能咩？」
「阿希，你真係太出色，我決定，一定係你，無第二個人選。」錢先生如獲至寶，並說出驚人真相︰「不過你話你係普通人，呢點我就唔可以認同，你一啲都唔普通。當年你阿哥阿樂憑過人嘅智慧，連續贏咗五場捉伊因，成為組織入面嘅傳說，徹底結束呢場瘋狂實驗。你作為傳說嘅細佬，點都會有啲遺傳，而事實亦證明我無估錯。」
「你識我阿哥？」阿希十分意外，想不到會再聽到「阿樂」這個名字。
「坦白講，我唔識佢，只不過我知佢而家人喺邊，亦知佢生活得幾唔錯，仲可以安排你哋見面㖭！但佢認唔認返你，同唔同你見面，跟唔跟你走，呢樣我就保證唔到。」錢先生露出意味深長的笑容說︰「呢樣就係我琴日忙嘅另一件事，本來係作為請你代表我出賽嘅秘密武器。」
阿希萬萬想不到能從一個陌生人身上得到自己親生哥哥的情報。聽到他還活着，阿希的眼淚又一次不受控的落下。
「既然仲在生，點解唔返嚟揾我？點解唔打個電話、寄封信畀我？點解要我孤零零咁生活？」想起這些年以淚洗臉的日子，阿希由傷心變成忿怒，怒火熊熊燃燒起來，誓要找阿樂問個明白。
「你贏咗場比賽就會見到佢。」錢先生說。
「講！係咩比賽？」阿希鬥志旺盛，恨不得現在便開始。
「個比賽叫『Doomsday Will Not Come』，係一場爭奪末日堡壘名額嘅比賽。」錢先生的頭四十五度微微向上，雙眼懷着希望，不徐不疾地說。
「吓？」阿希驚訝道。
錢先生把目光放回阿希身上，充滿激情地說︰「根據專家預測，世界會係五年之內迎嚟末日，你哋應該都有留意新聞，而家咁多世紀疫症、糧食危機、全球增温、末日預言、天外來客，連天使號角都喺世界各地被錄到。無論係理性嘅科學，定抑或係靈性嘅宗教，都指向世界會喺呢幾年滅亡，所以為咗可以安然渡過危機，末日堡壘係必需。」
「末日危機真係一個大課題，有錢人會花時間留意，未雨綢繆，好值得我哋學習。」久未說話的阿滔附和錢先生，或許是被錢先生拯救後對他改觀，阿滔連帶對世界末日的態度也變得不同。
阿希認真問︰「你咁有錢，點解唔自己造一座？」
「哈哈……有意思，」錢先生笑逐顏開，看似十分欣賞阿希，便加以解釋︰「一座合格嘅末日堡壘選址要內陸遠離海，而且可以足夠喺入面自給自足住最少三十年，而家已經無適合嘅地方畀我自己起，而且都起唔切，只怪我太遲先發跡。」
「的確，聽落都唔係一件易事，咁個比賽係點？」阿希認真發問。
「個比賽形式其實我都唔太清楚，但就由同你阿哥參加嘅實驗一樣嘅組織舉辦，當我正式成為百大富豪當晚就收到一封邀請函，內容好簡單，就係話邀請我派一個代表參加一場比賽，爭取末日堡壘嘅名額。」錢先生憶述。
「我幾十歲人最少都經歷過五次所謂嘅世界末日，但我都仲生存緊。不過今次呢個好唔同，係所有嘢都一致話真係會世界末日，以前嗰啲根本無得比，所以末日堡壘嘅名額好重要。阿希，你一定要贏，幫錢生爭取到個名額。」阿滔也認為這次末日是真的，提醒阿希必定要獲勝。
「無錯，今次真係好唔同，所有嘅預言、科學、天災，全部都明確指出今年七月就係地球末日，我唔希望啱啱發跡就死。」錢先生吃了誠實豆沙包，異常坦白道。
阿希心裏真的不相信世界末日到來這種事，但阿滔和錢先生你一言、我一語，說得他也動搖，開始有點擔心。不過很快，重遇親生哥哥這個目標便再次充斥着他的腦袋，他緊接着問︰「喺邊度、幾時開始？」
「三日後，地點係體育園。」錢先生拿出邀請函展示道。
「咁趕？」阿希看了邀請函，時間比他所想快，他還未準備好。
錢先生似乎看穿了他的擔憂，搭着他膊頭說︰「有咩需要都可以開口，所有嘢我會準備妥當，你專心比賽就得。同埋阿滔，我會帶埋佢去我包廂睇你比賽，你可以放心。」
既然錢先生已經打點好一切，阿希便把全副精力放在接下來的比賽上。由於比賽形式尚未清楚，所以也沒有能作為參考的比賽錄像可以看，亦都沒辦法提前制定策略，唯一能做的就是養精蓄銳，在三日後的體育園大放異彩。
「阿希，雖然未知比賽形式，但憑過往組織舉辦嘅實驗、比賽嚟推測的話，好大機會係將童年遊戲加減一啲規則，大致上分別唔大，所以你一定有玩過。」錢先生給阿希打了一枝強心針。
阿希聽到後的確放心不少，因為他的童年過得尚算幸福美滿，可以經常到公園與其他小朋友玩耍，對童年遊戲有一定認識，大概的規則以及規則的漏洞也略知一二。
「我司機會車你同阿滔返屋企執啲日用品，之後再送你哋嚟我屋企，呢幾日我會好好接待你哋，順便等我哋大家認識加深多啲，我相信對場比賽會有幫助。」錢先生熱情地邀請，但背後的心思並非如此簡單。
「咁就恭敬不如從命。」阿滔立即回答，阿希也只好跟着點頭同意，雖然他一聽便知道錢先生的用意。
簡單執拾完必需品後，阿希一行人便來到錢先生的家前。這是一棟三層高的村屋，外表極為普通，完全看不出是一個百大富豪的家，可是只要一踏進去，便會發現內裏的乾坤。村屋內的裝修非常奢華，而且十分先進，全AI自動化，想要甚麼，只要開口說便會有。
「呢棟村屋係陪我發跡嘅福地，嚟緊幾日你哋就住喺度，你哋嘅房我安排咗喺二樓，想要啲咩開口講，Chin就會做。」錢先生熱情的招呼他們︰「Chin，幫佢哋拎啲行李上房。」
然後，一個女僕由樓梯下的儲物室走出來，把阿希和阿滔的行李拿上房，他倆看得目定口呆，錢先生得意地說︰「呢個係高仿機械人，係咪睇唔出呢？佢係我叫最Top嘅AI機械人公司度身訂造嘅家用女傭機械人。」
「順帶一提，我間房喺地底，有咩可以隨時落嚟揾我，一陣Chin會帶你哋參觀間屋，我哋今晚食飯再見。」錢先生交代完後便離開去工作。
「錢生，多謝你咁睇得起我，畀個機會我，」阿希結結巴巴地說︰「但係……不過……我其實真係……無阿哥咁勁，無咩特長，運動神經又差，我怕……我會輸咗累你無咗個位。」
錢先生聽後停下腳步沒有說話，只是對他報以微笑，並以堅定的眼神看着他，同時豎起大姆指，直接以行動給予他信心。
接下來的數天並沒有甚麼特別，都是日常生活，只是變成窮奢極侈版罷了。
直到比賽前一晚，阿希發現了一件小事。
「咦？阿滔，你揸筷子嘅手勢同以前唔同嘅，做咩好似啲小朋友唔識揸筷子咁？」看到阿滔夾不起那件咕嚕肉後，阿希好奇地問。
阿滔停下動作，看着阿希，想了一下答︰「可能係後遺症，我有啲唔記得點揸筷子，不過我諗好快會記得返。」
「噢！」阿希簡單回應後便沒有再深究，可是不一會後他又發現阿滔左手手背的疤痕消失了，於是他又忍不住問︰「你左手手背條疤好似都唔見咗嘅？」
阿滔看一下左手手背，皮光肉滑，不要說疤痕，連半條皺紋也沒有，他雙眼轉了一圈，半開玩笑答︰「我叫Chin幫我去疤，估唔到真係work。」
對於阿滔的回答，阿希雖然感到有點匪夷所思，但還是照單全收。
