Disease
「呢個係現代人類文明嘅末日，因為全球增温，令到冰封喺兩極嘅各種古代病菌重現人間，導致各種不治瘟疫大流行，至今已經死咗過百萬人，世界末日已經來臨，大家快啲趁最後機會嚟信教，一齊上天堂。」在街頭的神棍日復一日，不知疲倦的對街上行人發放末日訊息，可是並沒有人理會他。
「科學家再將末日時鐘調整到二十三時五十九分，比二三年時再快三十秒，係有史以來最接近子夜。科學家表示全球增温令到兩極冰塊融化，海平面上升，沿岸城市被淹沒，同時更破壞咗生態環境，好多動物生存受到考驗，而多種被冰封嘅細菌亦得以解凍，令到近年疫症大流行，受影響國家遍及全球，保守估計已經造成三百萬人死亡，經濟損失高達十萬億美金。」電視新聞也日以繼夜報導地球末日的新聞。
「你知唔知呀？聽講呢，食多啲鹽水造嘅冰可以防止呢隻病菌喎。網上話呢隻病菌之前喺北極冰封咗幾千年，所以佢哋好驚鹹水冰㗎。我哋快啲去街市買多啲鹽整冰，遲咗畀啲乜都唔識嘅『盲搶鹽』搶哂就弊。」街邊的師奶甲跟太太乙說完便匆匆跑到街市。
「唉，好無癮，四圍都話世界末日，講咗幾十次，每次都係假，幾時先係真？我唔想繼續捱世界喇。仲要不時傳埋啲咩偏方出嚟，一聽就知假都仲有人信，咩鹹水冰？南北極啲冰都係淡水，邊有鹹水㗎？鹽會融化冰，明明啲師奶都係用鹽嚟解凍，竟然會覺得鹹水可以製冰？真係無知。」正在整理貨架的阿滔半抱怨半嘲笑道。
「唔知呢，我就唔想末日喇，」阿希聳聳肩，苦笑着說︰「不過當面對未知，人類都係鍾意盲信權威㗎啦。」
此時，在防盜鏡中，阿希留意到有一個頭戴鴨舌帽的中年男士鬼鬼祟祟的左顧右盼，然後向大門方向走去。
「喂，阿滔。」阿希推了阿滔一把，再指向那中年男士。
阿滔做了一個「OK」手勢並說︰「我都見到，等我嚟。」
「喂，唔係呀……」阿希嘗試阻止，但太遲了。
阿滔攔着那把帽壓得低低的中年男士，指控他盜竊並搜他身，可是甚麼也找不到，與此同時，他身後有一位小孩急步的離開店鋪，在臨步出店之際，被阿希阻止了。
「你行多一步就返唔到轉頭。」阿希小聲說。
小孩毫不畏懼，不屑的說︰「都唔知你噏乜。」然後繞過阿希便離開店鋪。
阿希對他大喊︰「小朋友，你記住你返唔到轉頭㗎喇！」
小孩聽完覺得心煩，轉身上前對阿希做個鬼臉的同時手拿着偷來的零食得戚示威，下一秒，一輛警車失控衝上行人路，把小孩撞飛數米，直撞燈柱，頭骨破裂，當場慘死。
阿希目睹一切，心揪了一下，感到哪裏怪怪的，但一時間又指不出來，只能小聲慨嘆道︰「唉，都已經講咗返唔到轉頭。」
與此同時，又好像有哪裏怪怪的。
目睹這一切的，除了阿滔，還有那位中年男士。
「喂，阿希，快啲擰歪臉唔好睇，廢事啲差佬走嚟問長問短。」阿滔立刻上前拉走阿希。
然而，中年男士就緊貼在他們身後，還差點吻上了，嚇了他倆一把。
中年男士無視剛發生的車禍，反而問︰「明明啱啱嗰個係防盜鏡死角，我仲遮住咗個細路，點解你都會知佢偷咗嘢？」
「……」阿希低垂着頭，雙頰滾燙，一句話也說不出。
最後還是靠阿滔來拯救他。
阿滔首先拉開阿希，然後代答︰「係因為佢觀察力強，所以察覺到啲細節，不過佢份人怕生，你哄到咁埋，佢立即靜音mode。」
「喔……唔好意思，我太興奮都無注意到，」中年男士立即道歉並重新再問︰「點解你會知係個細路偷嘢？」
阿希依然低着頭，小聲答︰「因為個影。」
「咩話？」阿希聲音小得連中年男士也聽不清楚。
「佢話因為個影。」阿滔成了代言人。
「因為我見到你背後有個小黑影，佢嘅動作係偷緊嘢，然後你嘅袋都係平，但佢個袋就脹哂。」阿希再透露更多細節。
「原來係咁，你觀察力都幾強，喺度返工嘥咗你。」中年男士略帶婉惜的說。
阿希靦腆地說︰「多謝抬舉，錢生。」
聽到阿希稱呼自己為錢先生，他內心更加驚喜了，忍不住對他大加稱讚︰「你除咗觀察力好，仲會留意身邊事物收集情報，我好欣賞你。有個比賽想邀請你代表我出賽，你一定贏。放心，我會有酬勞畀返你，夠你未來幾代生活無憂。」
「你呃鬼食豆腐呀？」阿滔對此人抱有極大的懷疑和敵意，立即拒絕道︰「我理你錢生定鐵生，你呢個可疑人物唔好以為我哋好呃，KK園已經黃咗，我哋無咁蠢上當，你呃其他人啦！我哋唔缺你啲臭錢，有呢間便利店就夠，雖然發唔到達，但最少可以有三餐温飽，唔駛背脊骨落！你好快啲走，出面全部都係差佬，你仲唔走我就叫救命！」
錢先生面對誣陷並沒有發怒，反而禮貌的道別︰「唔緊要，你可以慢慢考慮，我聽日會再嚟，希望聽到我想聽嘅答案。」語畢他便轉身離去了。
阿滔視線沒有離開錢先生，直到他徹底消失在眼皮底下，阿滔才敢放鬆，轉身問阿希︰「個錢生係乜水？你識㗎？」
「啱啱打入全球百大富豪排行榜，錢氏醫學科技，本雜誌封面講。」阿希指着雜誌架道。
阿滔立即拿起那本經濟週刊一看，果然為同一人，他翻開並仔細閱讀內文，然後失望地說︰「又係一個末日騙子，靠賣藥起家，就係呢啲仆街藥廠日日夜夜話有啲咩世紀病毒，搞到人心惶惶，都唔知係咪佢哋自己研發出嚟再傳出去，然後再賣藥扮救世主。」
阿希一笑置之，繼續埋首工作。門外的交通意外在不知不覺間已經清理好，連半滴血跡也看不見；警察的調查亦很迅速完成，甚至沒有找他們取證。
「好彩而家啲差佬做嘢求其，又會包庇自己友，唔係我哋就有排煩。」阿滔進入了滔滔不絕模式︰「講開又講，一個億萬富翁，究竟點解會嚟呢啲屋邨仔？仲要着得咁寒酸，又無帶保鏢，佢真係唔驚有人標佢心㗎喎。」
阿希一如既往，平淡地回答︰「唔知呢，微服出巡，睇吓啲藥賣成點啩，始終我哋間鋪都有賣佢啲藥。」
此時，店的自動門開了，進來的是一對母女，阿滔和阿希機械式的說︰「歡迎光臨。」
這對母女很迅速的買了一包糖便離開，整個過程沒有任何特別，除了母親在付款時乾咳了一聲。
十分鐘後，阿滔全身發滾，冒出一身冷汗，雙手長滿滲血的毒瘡，氣管收縮，呼吸困難，雙眼通紅，這些症狀出現不到一分鐘，他便暈倒在地。
「係電視講嗰隻世紀疫症，一定係啱啱個阿媽！咁易傳染到，咁快就有症狀，唔通佢係超級帶菌者？個女日對夜對又無事，唔通佢有超級抗體？」阿希一看到便停住了動作，立即致電衛生防護中心。
不消一會，一隊穿上防護衣的醫護人員帶上消毒噴霧到達，他們朝阿滔和阿希身上噴灑消毒藥水，再全店都消毒一遍，才將阿滔放進隔離箱再搬上救護車。至於阿希，醫護人員即場替他抽血和做深喉唾液測試，確保他沒有受感染後便離開。
「佢有無事？」阿希鼓起勇氣問。
全程默默耕耘的醫護人員，在聽到阿希的提問後，他們的小隊隊長便答︰「四十八小時內有特效藥嘅話就有得救，但而家全港都缺，所以都幾難。雖然咁講唔係咁啱，但你可以開始籌備定佢嘅身後事。」
「啱啱……」阿希大聲喊出來，醫護人員紛紛轉頭盯着他，成為眾人的焦點令他尷尬非常，他害羞得小聲說︰「係超級帶菌者傳染佢，不過個女應該有超級抗體。」
「咩話？」小隊隊長聽不清楚他的說話。
「係超級帶菌者……」阿希重複一次，但聲音依然很小。
「放心，我哋會照顧好佢，等佢舒服咁走。」小隊隊長為了自身安全，避免長期與病菌相處，盡快送阿滔進隔離醫院等死，便打斷阿希的說話，而他隔着保護衣明顯聽不清楚，只憑口型猜測阿希的說話，完美錯過拯救世界的機會。
就這樣，阿滔的生命只剩下四十八小時。
阿滔身患的世紀疫症，是有史以來最毒的病菌，據稱過往一直被封印在永久凍土，傳染性並不強，但破壞力十足，擁有四十八小時內百份之百致命的死亡率，人類在數千年的進化中已經喪失了對抗它的抵抗力。目前只有錢氏藥廠出產的藥能治癒，所以價格極高昂，甚至有錢也買不到，實屬一藥難求。
此刻要拯救阿滔，只有兩個辦法，一是前述錢先生的藥。可是阿希既沒有錢先生的聯絡方法，而他的居所也從未被人曝光，就連藥廠也設在偏遠的南極，不是貿貿然說去就能去得到。唯一能做的，就只有守株待兔，等他明天再到訪，如果他真的會來的話。而就算他真的來，阿希與他沒有任何關係，也未必願意贈藥。
而另一辦法是找到剛才的母女，利用女兒的血清研發疫苗。先不說茫茫人海找人猶如大海撈針，就算真的找得到，而她亦願意幫忙，研發加製造疫苗也不會是一、兩天能完成的事。
所以最終要救阿滔，也只能是求助於錢先生。
這夜，阿希徹夜未眠，一幕幕與阿滔的生活片段不斷在腦海中上映，使得他的心情更為低落。本來一直與自己毫無關係的世紀疫症，想不到竟真的降臨到自己身邊。對於阿希來說，阿滔的離世絕對是他的世界末日，自阿希的親生哥哥神秘失蹤後，這位大哥哥一直身兼其兄長的職責，照顧和保護他。
「我絕對要救返佢！」阿希暗下決心。
