目定口呆
「任何移動都會有規律，始終條村係死物唔係生物，一定係由機器控制佢郁，所以點都會有規律，唔會隨機。」亞骨多它不愧是來自高科技的種族，說起科技方面的知識總是有板有眼，很能令人信服。
「當你觀察佢嘅時候先知佢係郁成點，唔觀察嘅時候你係唔知，咁就有啲似你哋現世界嘅『薛丁格的貓』，係量子力學嘅範圍。」亞骨多它續說。
「咁即係點？我完全唔明。」我被他說得糊裏糊塗。
「即係我哋好似而家咁，揾一個人高高在上咁俯視，再指揮其他人行動，咁佢就唔會有任何移動，我哋就唔駛嘥時間研究佢移動嘅規律。」亞骨多它提議。
「又好似幾有道理，咁呢個咁重要嘅崗位一於就交畀你，樂蒙、亞旺努，我哋落去揾酒吧老闆，再拉攏史拉族人。」我指揮大局，立即分配工作，然後再次回到鑊嘉村。
臨行動前，亞骨多它再三提醒我們要聽他指示，不要相信眼前所見的事物，然後分派了每人一個通訊用天線，只要把插頭插入身體，不管哪一部份，都能隨時隨地通訊。
「Testing，大家聽唔聽到？」我測量試了通訊天線的性能，其他人也聽得很清楚，沒有任何問題，於是我們便正式行動。
我們跑到村的一角，方便躲開守衛之餘，又可以方便我們三人分頭搜索不重複。
「而家條村無郁，你哋可以分頭去揾。記住，酒吧係木製建築，雖然呢條村有一半都係木屋，但都已經揾少咗一半。另外留意返，守衛暫時喺你哋嘅對角，到時我會再教你哋點避開。」亞骨多它在高空說。
亞骨多它說完後，我們便兵分三路出發，亞旺努選了上路，樂蒙走中路，我則行下路。
我沿路一直走，視線始終沒有離開建築物，雖說空中有亞骨多它觀看確保村子不會動，但我還是選擇謹慎行事，不過沿途始終沒有看到酒吧的蹤影，走到尾後便選另一條街截返。
走着走着，通訊天線傳來了亞旺努的聲音︰「我揾到喇！我而家喺轉彎嗰度。」
我和樂蒙聽到後立即飛奔過去，可是一會後通訊天線再次傳出聲音，這次是樂蒙︰「轉彎即係邊度？我唔見嘅。」
雖然我未到達，但聽到後便立即跟亞骨多它說︰「亞骨多它，導一導航。」
此時亞骨多它才如夢初醒，立即指揮說︰「你哋而家一直向前行，去到圍牆轉右再直行，第三個街口轉右入去再轉左行就見到。」
我們跟着指示走，總算看到酒吧，而亞旺努已經在店內，可是老闆則不在。
「老闆人呢？」雖然我知道無人可以給我答案，但我還是衝口而出。
亞旺努也很盡責的回答︰「我入嚟嗰時已經無人喺度。」
我在店內走了一圈，確保無走錯地方，連我剛才用作結帳的石幣都依然在吧枱上。
樂蒙也四處查看，忽然在吧枱入口大嚷︰「你哋嚟呢度睇吓，個門鎖打開咗，但變到好鬆，似乎喺有人強行推開造成，老闆係咪畀啲悲捉走咗？」
我越想越不安，樂蒙的推斷或許正確，畢竟老闆幫了我，又說出了鑊嘉村的秘密，這些在啲悲眼內都是叛國的行為，被抓甚至被滅口也不是沒可能。如果這是真的話，我們便要加快腳步，趁他未遇害之前便要把他救出來。
「注意，史拉族守衛喺門口埋伏好，有嘅話你哋最好由後門走。」亞骨多它在高空掌控全局，好讓我們能全身而退。
「後門呢面。」樂蒙很快便找到出口。
「亞骨多它，教我哋點樣去到大牢，我估老闆都係畀佢哋捉咗去嗰度。」我說。
「我知大牢喺邊，我啱啱經過，跟我嚟。」亞旺努說完便走上前帶路，而在門外埋伏的守衛依然在原地候命。
「前面轉左就係。」亞旺努指着前面說。
「唔係轉左，直行再轉右先啱。」此時亞骨多它竟然與亞旺努持相反意見︰「老闆唔喺大牢度，佢喺嗰個好大嘅府邸度，我啱啱見到。」
只有我知道他指的是啲悲的大本營，想不到兜兜轉轉，又要回去那個鬼地方。
我們一行三人，按照亞骨多它的指示順利抵達府邸。府邸中門大開，一個守衛也沒有，我憑着記憶，一口氣衝到啲悲的書房，但他卻不在裏面。
「我哋分頭揾，佢一……」我話未說完，書櫃便傳來「吖……喔……啊……呀……」的怪叫聲，我們循聲走去，發覺書櫃是一活門，推開後竟是一條往下走的樓梯，樓梯漆黑一片、深不見底，我們為了安全並未進內，而是選擇把門關上，在外等待。
大概等了半小時，啲悲從書櫃後走出來，我們立刻蜂擁而上把他制伏，他反應不及只好束手就擒。當我想把他綁起之際，書櫃傳來一把聲制止我。
「老闆？」我轉身一看，赫然發現老闆安然無恙的走出來，我高興的說︰「你無事就好，喺酒吧見你唔到幾驚你出事，我哋特登嚟救你。」
「多謝你哋嘅好心，不過呢度我一向自出自入，唔會有事。」老闆平淡的說︰「你快啲放咗佢先。」
「放咗佢？」樂蒙反問。
「唔得，我哋要推翻佢救返成條村！」亞旺努熱血的說。
「係囉，難得我哋捉到佢，點可以話放就放，我哋要解放成條村，等大家有好生活唔駛擔驚受怕。」我也拒絕放人。
「啲吉，睇吓你講咗啲乜誤導咗人，我啱啱都話你咁表達實出事。」啲悲抱怨道。
啲吉？那是老闆的名字嗎？他們怎會看似這麼熟稔？老闆不是恨啲悲把他的伙伴都變成史拉族嗎？
「兄，我諗住咁講完佢會怕就會走，點知佢諗嘢咁極端先得㗎……」老闆，即是啲吉無奈道。
我被他倆弄糊塗了，一時之間弄不清發生甚麼事，樂蒙和亞旺努也一樣，頭上滿佈問號，而啲悲亦趁大家鬆懈的一刻掙脫了。
「兄？誤導？咩呀？你哋夾埋嘅？好亂呀……」我感覺到受騙和被背叛。
「你聽我解釋，」啲吉試圖安撫我︰「我講嘅嘢係事實，而兄同你講嘅嘢都係事實，我哋都無呃你。我又好，我啲同伴又好，你哋都好，大家之所以會變成史拉族，都係因為佢嘅魔法，係史拉族嘅咀咒，所以呢啲魔法係佢控制唔到，自然發出嘅，佢練咗咁多年都只係控制到魔法嘅劑量，但始終去唔到零，所以成條村嘅人先變哂史拉族，除非有兄嘅解藥，否則違抗唔到佢嘅命令，永遠係佢嘅奴隸。」
「喂，而家成件事又唔同哂，一時一樣，邊樣先真？佢有解藥咁係咪全村人都已經飲哂？」我逐漸找不到翻啲悲的理由。
「我做唔到全村人都畀哂解藥，因為每變一百個我先有一個解藥，永遠無可能畀哂所有人。」啲悲內疚的說。
「咁又話完全變哂之後會知自己變咗佢奴隸？無解藥點知自己係奴隸？」我始終不能相信，嘗試找出他們自相矛盾的地方以推翻他們。
很遺憾，我始終找不到，每個矛盾位他們都能毫無破綻的自圓其說。
「完全變哂之後，你係會有返自我意識，但只要兄一下令，你身體就會自動去執行佢嘅命令，控制唔到自己，就好似你嘅身體畀第二個人佔領咗咁，但你意識係清醒，只係個身體唔屬於你。」啲吉解釋。
「其實我都唔想將你哋變做史拉族，所以我先趕你哋走，同埋唔畀其他族嘅人嚟。」啲悲委屈的說。
聽到後我反應很大，激動道︰「咁即係你之前同我講嘅都係大話？你從來無試過揾其他族過嚟一齊住，而係作咗幾個好似好合理實際係無稽嘅原因打發我走？」
「唔係咁㗎！兄有試過，我酒吧啲相就係好例子，只不過最後大家都……」啲吉越說越細聲，而且隱約聽得出他的確傷心欲絕。
我大概猜想到結果，正陷於兩難之際，樂蒙終於開口︰「其實係可以照嚟，唔會有問題。」
亞旺努也說︰「係呀係呀，睇吓我哋就知，我哋都回復原狀。」
而在通訊天線的另一端，亞骨多它也給出了一個計算結果︰「我睇返啱啱嘅飛行數據，再綜合各種環境數據，計算得出只要垂直距離五十米，水平距離一百米，咁就可以唔受啲悲嘅魔法影響。」
「即係我哋喺一百米外嘅地方起樓建村，咁就無問題喇。」我再次看到曙光。
「唔講唔覺，你哋點解會無變做史拉族？乜呢個咀咒係有破解方法？」啲悲喜上眉梢。
「有呀有呀，救世主大人就係咁救返我哋。」亞旺努搶答。
「的而且確，我哋飛到上一定高度之後，身上嘅黏液就開始甩，我哋都開始有返意識，而根據我哋嘅另一位伙伴嘅計算，只要離地五十米就得。」樂蒙維持睿智的形像，說得頭頭是道。
「我哋嘅伙伴啱啱已經計算過你魔法影響嘅範圍，我哋只要喺你半徑一百米外就無問題，其實你個圍村範圍就係啱啱好，不過你要喺正正中心咁解。」我解釋說。
「咁就太好喇兄，我哋可以幫到其他族。」啲吉開心的說。
「嗯……如果係真就實在係太好喇，咁救世主大人你哋快啲叫佢哋嚟，時日無多，我就叫我啲村民幫手起屋迎接你哋。」啲悲也積極起來。
「咁樣唔係唔得，但咁短時間起條村，你哋應付到？個成本都好大，真係得咩？」我有點懷疑。
「以我哋條村嘅勞動力，畀十二日，唔係，十日時間就得，畀十日我哋，就可以起到一個住得落成個女母嘅村出嚟。」啲吉非常肯定的道。
十日？確實令我有點匪夷所思，就像騙案一樣，但我在女母已經見證過很多不同的匪夷所思，所以我還是接受了。
「但我有一個條件。」我說︰「成條村要由我設計規劃，因為我最清楚各族需要點嘅環境同住屋需求，另外樂蒙同亞旺努做總工程師，負責成個工程，所有嘢由佢哋最後決定，佢哋跟我最耐，參與哂咁多族嘅建設，好清楚每族需要啲乜。」
啲悲和啲吉討論了一會後便答應了。
一番討論過後，我們雙方都訂定了「十日計劃」，十日後便會有足夠整個女母人住的村建成，而我也有十日時間把其他族的人帶過來，坦白說，有亞骨多它的協助，這根本不是問題。
就這樣，我們分頭行事，約定十日後再見。
