禍從口入
對於遍尋不獲的大牢，最好的辦法便是問路，正所謂「路在口邊」，問一下一定問到個方向來。
我望向四周，路上路人很多，但每個人都迴避我的眼神，不與我有眼神接觸，一時之間我都不知找何人入手才好。
既然路人不行，那只好找店鋪老闆好了，他們總不會不做生意趕客吧？
於是我找到一間應該是酒吧的店，畢竟古今中外，要打聽消息，找酒吧總沒錯。這間酒吧裝潢有如西部牛仔電影裏龍蛇混雜的酒吧，四面牆掛滿不同的相片，全都是同是一個加本族人與不同種族的顧客的合照，可是當中唯獨沒有史拉族。
「果然係戰犯，去到邊都唔受歡迎。」我心想︰「不過史拉族喺啲悲嘅幫助下，喺度的確生活得唔錯，仲頂咗呢間bar嚟做。」我直接坐在吧枱上與老闆展開對話︰「老闆，唔該一杯snowball。」
「史撈波？咩嚟？我哋鋪無啲咁嘅嘢賣，你自己睇餐牌。」語畢，老闆便吐了一份餐牌出來，我看着這份黏黏的餐牌，只好硬着頭皮打開來看。
翻了數頁後我便合上它，直接跟老闆說︰「畀你哋嘅招牌菜我。」
不用懷疑，與飛翔城不同，這份餐牌沒有圖片，我根本看不懂上面的文字，所以我只好果斷放棄。
「招牌菜？」老闆再三確認。
「係，招牌菜，唔該。」我肯定的說。
於是老闆便埋頭苦幹，不用一分鐘便端上了一杯淺綠色，不斷冒泡冒煙的「飲品」，然後說︰「我哋嘅招牌菜──史拉湯，請慢用。」
看着這杯噁心得有如胃酸的湯，我立即反胃，根本沒有喝下去的勇氣，可是不喝又不能與老闆開始對話，於是我鼓起勇氣拿起它，緊閉雙眼，屏住呼吸，也顧不上先試味，而是立即一飲而盡。
「咦？」我竟然開始反芻、回味，這杯史拉湯出乎意料地美味。
「好好味喎老闆，果然係招牌菜。」我立即大讚。
「飲完好走，呢杯當我請你，唔好再嚟，快啲離開呢度，呢度唔係你應該嚟嘅地方。」老闆奇怪的警告我，我百思不得其解，立即追問，而他也說出原委。
「喺呢條村入面，除咗葛族同啲悲之外，其他人都係奴隸，只要一踏入嚟就註定咗你嘅命運，而家啲悲應該係畀面你係救世主，所以畀次機會你離開，你仲唔走嘅話，下場就會同你啲同伴一樣。」老闆認真的說，憑他的語氣我肯定他並非說謊，而他提到我的同伴，證明他有見到過他們，很有可能知道他們的去向。
「多謝你提醒，不過我係唔會走，一嚟我要救返我嘅同伴，二嚟我要推翻啲悲。我想問你知唔知大牢點去？我兜嚟兜去都去唔返。」我多謝老闆的善意提醒，同時追問同伴的下落。
「慳返啲氣力快啲離開呢條村好過，你啲同伴恐怕已經畀佢變哂做奴隸，你呢世都唔會見得返佢哋。」老闆平淡的說，就像已經習慣了一樣。
我未等他說下去便衝口而出道︰「佢哋一定唔會做佢嘅奴隸，佢哋係我嘅同伴，唔會肯跟第二個！」
老闆冷笑一聲，然後傷感的說︰「曾經我都係咁諗，最後都係變成而家咁，所有喺呢條村嘅人都會成為佢嘅奴隸。」
「我一定唔會做佢嘅奴隸！我一定會救返佢哋！我一定會推翻佢！」我意志堅定的說。
「我都想你成功，但從來無人成功過，你唔會敵得過佢嘅魔法，你喺呢條村越耐，你受佢魔法嘅影響就越耐，逐漸你就會變成佢嘅奴隸而不自知，到你意識到自己變咗佢嘅奴隸嗰陣時，已經係不可逆，就好似我同我啲朋友咁。」老闆看着牆上的相片感傷的說。
「放心，我一定會救返你哋，快啲講我知點先去到大牢先。」我着急的問。
老闆看到我死不放棄，於是說︰「要喺呢條鑊嘉村去到想去嘅地方，一定要跟住路牌行，唔可以憑記憶，因為呢條村係會食人。」
「食人？」我被老闆的形容逗笑了，一條村作為死物又怎會吃人？
「老闆你真幽默，anyway，多謝你，我會救返我啲同伴，同埋救埋呢條村。」我道謝後在袋裏拿出兩個石幣給老闆並說︰「呢啲錢夠埋單有突，唔駛找，成個女母而家有超過一半嘅村都流通緊，遲啲會變成成個女母唯一合法嘅流通貨幣，好好保管住。」
說完我便離開酒吧，打算沿着路牌指示走，可是一看路牌才想起我根本不懂這裏的文字，只好轉身回到酒吧內問老闆，可是一轉身我便碰壁了，我指的是真正物理上的碰壁，上一秒還在我身後的酒吧竟然就這樣無聲無息的憑空消失了。
「莫非我啱啱去咗幽靈酒吧？」我想着想着，不禁打了個哆嗦。
幾經艱苦，終於由其他史拉族的口中問到了大牢的寫法，跟着路牌左穿右插之後，終於看到了熟悉的大牢。門前守衛不多，戒備並不森嚴，我輕而易舉便突破了他們的防守，直搗黃龍到達關着樂蒙、亞旺努和亞骨多它的牢房前。
「喂，我嚟救你哋喇。」我拿出在史拉族守衛身上搶過來的鑰匙打開牢房，然後對他們說︰「好彩你哋仲未變做啲悲嘅奴隸，嚟，我哋快啲走，我要你哋幫手，一齊推翻啲悲拯救鑊嘉村同女母。」
說完我轉身便跑，但數步後我便停下來，因為我聽不到後面有腳步聲跟着，而且他們三個始終都低着頭，難道……
「咁係無可能發生嘅事嚟！一定係佢哋驚得滯唔敢走啫。」我再次返回牢房，捉着他們的手帶他們出來，可是手感變得不同了，正常握下去因為有骨頭的關係，應該會硬邦邦的，但現在握下去卻是軟綿綿，就像……就像握着鬼口水一樣。
「你班可惡嘅史拉族，以為外表似佢哋我就分唔出咩？你哋將我嘅同伴收埋咗喺邊度？」我怒不可遏，誓要救出他們。
「啊……啊……啊……」他們不斷嘶叫，但無一個字我是聽得明白的，可是憑他們的語氣、動作和流質的面容表情來看，他們好像在對我哭訴、求救和澄清。
此時的我突然閃過一個恐怖的想法︰「老闆話成條村嘅人都係啲悲嘅奴隸，老闆啲相入面有除咗史拉族外嘅唔同種族，佢又話自己以前都覺得唔會變做啲悲嘅奴隸，而入到村就淨係得史拉族無其他種族，咁啱史拉族就係奴隸嘅存在，唔通啲悲可以將其他人變做史拉族？史拉族係人造人？咁老闆嘅相同說話好似就講得通，而且我眼前呢三個史拉族……莫非真係佢哋？」
我一時之間接受不了這個現實，絕望的大叫，整個人都崩潰了。
不過我知道我要振作，如果根據老闆的說話反向推論的話，當他們未完全變成史拉族前是可逆的，只是我不知道方法而已，老闆或者會知道方法，無錯，我要帶他們找老闆求助。
我找了一架木頭車，把他們都搬上去載走，但是我要怎樣才找到老闆？我又不懂這裏的文字，只能像盲頭烏蠅般亂跑。
「條村會食人，即係咩意思？點解轉個頭酒吧入口就變咗做幅牆？」我百思不得其解，走着走着就走到村的邊界，即是圍牆。
「唔通條村係迷宮？但迷宮又點會識郁，除非係移動迷宮！」無錯，我想起了那本書和那套電影，但這裏有一點不同，它不會關閉再移動，它是無時無刻都在移動，只是我看不到罷了。
既然這條村會移動，那一切都說得通了，但它的移動有規律嗎？對我找到老闆有幫助嗎？當我看着它時它便不會動，那我一直看着它不就可以了嗎？
我將亞骨多它身上的飛行腰帶綁在木頭車上，然後一行四人連人帶車飛到半空，好讓我能俯瞰整條村，尋找酒吧的蹤跡，可是我在半空盤旋了一會，始終找不到酒吧，其中還有兩次我走了神沒有盯着村子，它即時變身，害我又要從新開始找一次。
「啊……啊……救……救世主大……人，你返咗嚟救……救我哋喇。」從我身後傳來的「啊……啊……」聲竟然慢慢變了一句我聽得懂的完整句子，我開心得立即轉身，只見他們三人身上的黏液褪去了不少，露出了原來的身影。
「原來係咁，我明喇，難怪會叫我快啲離開條村。」我恍然大悟，既高興又好奇的問︰「歡迎你哋返嚟，我好掛住你哋，你哋記唔記得我走咗之後發生過咩事？」
樂蒙甩走身上殘餘的黏液後說︰「你走咗之後，我哋再同史拉族守衛打咗陣，但最後都係畀佢哋制伏咗，然後佢哋餵咗啲淺綠色冒哂煙嘅嘢畀我哋飲，估唔到出奇地好味，然後嘅事我就無哂記憶。」
「綠色冒煙飲品？仲要好好味？咁似我啱啱飲嗰杯嘅，唔通老闆……」我聽到樂蒙的憶述，不禁心寒起來。
「係呀，之後就唔知發生咩事，一直到而家見返救世主大人，你帶我哋飛上天先清醒返。」亞旺努力證樂蒙沒有說謊。
亞骨多它似乎明白了甚麼，總結說︰「我覺得我哋係飲咗嗰杯嘢之後變緊史拉族，後尾因為救世主大人出手幫助，我哋先可以還原。」
「點都好，最緊要你哋無事，啱啱發生咗好多事，我亦都知咗一啲關於呢條村嘅嘢，不過有一部份係我自己估，但見到你哋嘅情況，我諗我估得都八九不離十。」我將之前的經歷、和啲悲及酒吧老闆的對話內容轉述一次，然後對他們說︰「我哋一直以嚟都畀人呃咗，我哋要反擊，要推翻啲悲，我有一個計劃。」我告訴他們我的計劃。
「要推翻啲悲再買起成條村，好似好高難度，而且我哋逗留耐咗又會變史拉族，未必次次都咁好彩救得返。」亞骨多它率先提出疑慮。
「我同意佢嘅講法，我哋面對太多風險，例如史拉族會攻擊我哋，我哋又有機會被變成史拉族，同埋要買起條村都好貴。」樂蒙也分析說。
亞旺努也開腔，不過他今次不是支持樂蒙，而是站在我的一方替我說話︰「你哋諗吓，救世主大人同我哋留喺條村嘅時間係一樣，而且佢都有飲嗰杯嘢，但佢無變異喎，所以我相信一定有方法破解。而且聽救世主大人咁講，史拉族人都係忍氣吞聲、不服啲悲嘅管治，都想推翻佢，我哋聯合埋呢班人就無問題。至於買起條村，我哋一路以嚟儲埋咁多石幣，無問題嘅。總之我信救世主大人，最起碼一路以嚟佢都無錯過，佢都將所有困難順利解決到。」
聽過亞旺努的一番肺腑之言，樂蒙和亞骨多它也被感動，答應一起作戰。
「具體應該點操作？」樂蒙立即變得積極。
「我哋要經濟侵略佢哋，令石幣變國際通用貨幣，任何貨幣都以石幣為度量衡，咁我哋就有本錢去買起條村。」我向眾人解釋。
「咁點集結啲有異心嘅史拉族人一齊行動？」亞骨多它也發問。
我即時回答︰「通街都係想推翻佢嘅人，佢哋只係敢怒不敢言，只要有人揭竿起義就會一發不可收拾，畢竟佢哋都係被逼變成奴隸。」
「咁我哋唔駛等，即刻行動喇！」亞旺努急不及待想要報仇。
「冷靜啲先，」我立即制止他，然後說︰「我哋都要揾個喺史拉族入面有民望嘅人幫手先得，佢一句勝過我哋幾百句。」
「咁係邊個？」他們三人異口同聲問。
「之前救我一命嘅酒吧老闆。其他人都唔敢理我，但佢無所畏懼咁招呼我，我相信佢係有返咁上下地位先敢咁做。」我說得頭頭是道。
「之不過，」我話鋒一轉，說了一個頗洩氣的重點︰「成條村係咁郁，我揾佢唔到。」
