再來一場……嗎？
「沙……沙……」大廳傳來咪高峰的聲音。
「Testing，有無聲？OK，得。」是Sigmund Freud的聲音。
「Congratulation！可能你唔記得我，我係Sigmund Freud，今次實驗嘅主持。恭喜你成功通過實驗，唔係，應該叫返遊戲你會啱聽啲，恭喜你成功贏咗場遊戲，成為最後嘅勝利者，同時都多謝你為今次實驗提供咗寶貴嘅數據。遊戲開始前講過，留到最後嘅人會有獎金，我哋已經將獎金放咗喺大門外面，大門亦都已經開咗，你可以選擇離開大宅，拎埋啲獎金返去，過返原本嘅生活，又或者……」Sigmund Freud故意頓了一頓，營造懸疑感，然後續說︰「留喺度，繼續參加下場遊戲，用鬼嘅身份救返你啲朋友。」
「救返啲朋友？」樂哥正要打開大門之際，被Sigmund Freud的說話所引誘，有點猶疑。
「你話救返啲朋友即係咩意思？」樂哥大喊道。
「哈，就係字面嘅意思，救返佢哋。」Sigmund Freud說。
「佢哋都畀你哋殺死哂，仲可以點救？」樂哥繼續對着空洞洞的大宅大叫。
「你確定佢哋係真死？」Sigmund Freud的口吻帶點狡詐，樂哥聽完也分不清孰真孰假，於是跑到老鬼的屍首前檢查，呼吸、心跳的確停了，體温也下降了，這無疑是已經死透，又怎會能再救活？
於是，樂哥做了一個決定︰「佢哋全部都已經畀你哋殺哂，點會仲有得翻生？呃唔到我嘅，我雖然都想佢哋無事，但根本無可能，人死不能復生，除非有龍珠啦。我要走！」
語罷，樂哥走到門前，再次想打開之時，Sigmund Freud又開腔︰「你確定？你咁聰明，應該一早估到呢場遊戲背後金主係咩組織，你認為佢哋有無能力做到？」
樂哥又一次猶疑了，他真的很想救活所有人，亦都猜到幕後黑手究竟是誰，但正因為如此，他才更加要慎重考慮，要是與他們搭上，後果更加不堪切想。
一輪考慮之後，樂哥下定決心說︰「決定好喇！」
他打開門，第一眼看到的是一棟棟的古老大宅，與他所在的一模一樣，第二眼才看到那個裝滿錢的手提箱。他走到手提箱前，把箱子打開，箱子滿滿的全是美金。確認好獎金是真的後，他把箱子關好，整理好思緒，再回想Sigmund Freud的說話，結合眼前無數的大宅，他總結出一個結論︰「同樣嘅遊戲喺其他大宅都同時進行緊，好多人都無辜死咗，但幕後黑手就逍遙法外。」
他回望大宅，左手提着手提箱，右手拿着鬼面具，問了自己一句︰「憑我一個，有無贏面？」
然後，他放開了其中一隻手，任由手上的物件掉在地上，自己則昂首闊步步出大宅，向他選擇的道路進發。
