遊戲重啟
阿雲踏着沉重的腳步，在二樓搜尋樂哥等人的蹤影。
「可惡，頭先太上頭，無睇清楚個賤人阿月去咗邊，畀佢利用咗個盲點。」阿雲自我責備，只有在二樓逐間房檢查。
「我哋匿喺度安唔安全㗎？」KT小聲的問。
「如果你唔講嘢，而我哋又小心啲唔發出任何噪音，理論上係安全。」阿月小聲的嗆他，KT氣得差點想揍他，但中間隔着福伯所以作罷。
此刻的四人正擠在一個狹小的空間內盡量不動，差點連呼吸也不敢，以免發出聲響被阿雲發現，因為阿雲此時正正在他們下方。
「呢間房咁多植物，好大陣草青味，佢哋匿喺度頂得順咩？」阿雲邊找邊自言自語。有了玩偶房和演奏房的經驗，他除了找明顯的匿藏位外，還敲打牆壁，看看有沒有暗格，但一無所獲。
「呢間房睇嚟無咩機關暗格，差個廁所，雖然應該唔會有人，但都睇埋，可能就係玩捉心理。」阿雲心想。
他去嘗試開門，但竟然開不到，他再出力推，還是未能開啟，他開始對洗手間內藏有甚麼人有點期待，興奮的說︰「我知你哋喺度，你哋走唔甩㗎喇，不過其實我淨係想捉阿月，你哋只交佢出嚟，咁我哋之後仲可以繼續一齊揾錦囊一齊走。」
這番說話被藏在天花板的四人聽到，由於聲音來自他們下方，而他們又看不到阿雲所在，所以KT和福伯都認為阿雲已經發現了他們，顯得焦急起來，開始討論交出阿月的可能性，但這些聲音迅速便被樂哥遏止了。
「你哋冷靜啲，如果佢真係發現到我哋，仲點會咁講？直接抽咗我哋落去喇。大家信我，等多陣。佢而家虛張聲勢、想分化我哋喳，千祈唔好中計。情況越係嚴峻，我哋越要團結。」無可否認，樂哥的精神喊話是別具魔力，只要他開口，任何人也會接受，包括KT和福伯。
「咁好啦，只不過我哋要匿到幾時？呢座大宅就係得呢幾層，層與層之間淨係得一條樓梯連接，只要我哋畀佢逼到去地下或者係三樓，基本上就等於密室，實全滅㗎喎。」KT說出了一個他們未想過的困境，大家一時間也想不出如何解困。
「喺地下或者仲有機會……」KT後補一句︰「斷估地下唔會都係一條走廊咁啩。」後補的這句，令低落的情緒稍為提高一點，但士氣依然低落。
阿月見狀，立即說︰「呢啲到時再算，船到橋頭自然直，我哋解決咗而家嘅困境再算。」可是並未能令各人士氣回升，與樂哥的效果相去甚遠，於是他暗自心想︰「可惡！睇嚟要做啲嘢。」
與此同時，在洗手間門前的阿雲說完那番話之後，便鼓足幹勁大力一撞。
「嘭」！門應聲被撞開。
「哇！」阿雲傳來悲鳴。
「乒鈴𠾴唥」！洗手間傳來各種物件被撞跌的聲音。
「掂掂掂，呢個就係Joyce嘅反擊，等咁耐就係等呢刻，我哋快啲走。」樂哥大喜，並命各人迅速逃離現場。
他們沿着天花板迅速爬走，可是因為為了追求速度，他們忽略了力度，整個天花板都傳出很大的噪音，縱然阿雲滑倒在地上還未完全清醒，但聲音已經傳到他的耳內。
阿雲晃了晃頭，使自己回復清醒，然後生氣的說︰「可惡，你班人竟然整個咁嘅陷阱跣我，枉我仲當你哋係戰友！你哋不仁在先，咁就唔好怪我不義！既然遊戲賜予我生殺大權，我之前無好好運用真係傻，而家我總算清醒，亦都認清哂你哋班人嘅真面目，除咗佢，我唔會放過你哋任何一個，你班老鼠最啱就係喺天花板度走嚟走去！」
說完他便爬了起來，循着聲音走到他們後面跟隨，躲起來等待他們下來。
「喂，我哋咁大聲，行蹤咪暴露哂？阿雲會知我哋喺邊㗎喎。」KT突然注意到這個細節。
福伯則大安旨意的說︰「唔駛怕，啱啱聽落都知跣到佢攤攤腰，睇佢都仲喺廁所未起得返身，畀佢知都無所謂，佢嚟到我哋都走咗。」
「千祈唔好咁諗，我哋隨時都要保持警覺，作最壞打算，唔好掉以輕心，悲劇往往就係咁發生。」樂哥立即告誡他們。
阿月一心想減少競爭對手，故小聲的嘀咕道︰「咁係你悲觀啫。」
「咩話？」樂哥聽得不清楚，阿月立即改口說︰「我話有備無患就啱。」
這一切都看在KT和福伯眼裏，這一個看似很小的舉動，其實充滿心機，刻意營造樂哥專横獨裁的假像，為後來推翻樂哥的領導而鋪路。
「阿月，我哋而家到樓梯口未？」樂哥問。
阿月查看了天花板的布局，然後點頭示意，之後樂哥下達指令︰「一陣我望吓安唔安全先，安全嘅話就逐個逐個落嚟，之後我哋再落下一層。」
KT和福伯都點頭表示同意，只有阿月回話︰「你係leader，你話事喇，我哋實會聽㗎。」這說話驟耳聽並無不妥，但只要仔細回味就會發現字字都有骨，不過樂哥作為做大事的人，根本不拘這些小節。
樂哥小心翼翼的拆掉天花板，然後吞了一大口口水，鼓起勇氣探頭查看，環顧四周，無人，於是便跟眾人匯報︰「安全，我哋一個一個落嚟，KT先。之後你幫手喺下面接住福伯，之後阿月，最後我，有無問題？」
「你安排啦，你做大，我哋實無問題。」阿月再次說出有骨的說話。
如是者，他們按照計劃，逐個逐個回到地面，直到最後輪到樂哥時，情勢突然出現了變化！
「喂！快啲走！」樂哥大吼。
KT、福伯和阿月三人回頭一看，見到阿雲正從遠處跑來，立即嚇得雞飛狗走，三步併作兩步的跑落樓梯。可是，迎面卻有人跑上來，與他們撞個正着。
「喂，野仔，乜咁啱呀？」KT立即打招呼，但並未減慢腳步。
福伯也一鼓作氣往下跑，拋下一句︰「唔好上去，隻鬼追緊我哋，快啲走！」
KT、福伯和阿雲都相繼出現在野仔眼前，唯獨少了一個人，於是他立即問︰「樂哥呢？樂哥喺邊？」
而在一旁的老鬼沒有理會太多，聽到鬼正追來便拉着野仔走，可是野仔堅決要往上跑，老鬼也只好放棄。阿月見機不可失，立即趁機中傷樂哥道︰「佢同隻鬼夾埋，推咗我哋三個落嚟送死，而家自己喺上面安安全全，你唔想死就快啲走！」
聽到這番話的野仔當然不相信，特別是出自阿月的口，可是KT和福伯因為一直受到阿月的潛移默化，終於被攻破心房，也一併喊道︰「野仔，佢講得無錯，個樂哥係奸㗎，係佢推我哋落嚟送死，係佢一直堅持唔落嚟救你，你唔好咁傻，命仔緊要呀！」
就在此時，阿雲已經站在二樓樓梯處，野仔則在樓梯中間，而其餘的人已經逃到一樓，他們看到阿雲後更是立即四散。
「阿雲，話我知，佢哋講嘅嘢係假嘅，樂哥唔係咁嘅人，你都唔係咁嘅人，係咪？」野仔激動的問阿雲，淚水已經在眼框內滾動着。
阿雲看了一眼野仔，並沒有說甚麼，懷着被出賣的心情的他已經被怒火所蒙蔽，理性接近斷線，一步一步的在野仔身邊走過，無視了他，唯一尚有的理性，就是野仔故意擋在他面前時，他會以身體撞開他，而非雙手推開他。阿雲就這樣離開了他，把他獨自留在樓梯間。
此一幕，被一個人偷偷的看在眼裏，她深感不妙︰「個細路喺隻鬼面前毫無防備都唔捉佢而捉其他人，唔通佢先係同隻鬼一伙嘅人,其他都唔係？」
「喂，野仔！」樓上傳來樂哥的聲音，聽到外面已經變得安靜的樂哥探頭出來，一眼便看到野仔。
野仔循聲抬頭查看，率先影入眼簾的是一個鬼祟的身影消失了，他一度以為自己看錯，疑惑的問︰「樂哥？」
「天花板。」樂哥直接說，野仔才抬頭看到他，他喜極而泣，立即跑上去幫助樂哥返回地面，把鬼祟身影的事都拋諸腦後。
「樂哥，你無事就好。啱啱佢哋話你同阿雲夾埋，推佢哋去送死，我知實情一定唔係咁，究竟發生咩事？」野仔用哭腔將自己心底的疑問一口氣問完。
樂哥看到他哭了，隨即安慰道︰「我點會有事，我似咁渣咩？唔駛咁擔心喎。至於佢哋話我夾埋，只係時間咁啱啫，佢哋誤會咗，我同佢哋解釋返就無事。反而我又好奇，點解阿雲失哂理性咁，但係見到你都唔捉你嘅？」
野仔聽到後，立即意會到些甚麼，很大反應的解釋︰「我唔係同佢一伙㗎，我都唔知點解㗎，我真係唔識佢㗎……」
樂哥看到他的反應便大笑起來，笑得淚水都流出來，他邊擦眼淚邊說︰「冷靜啲，我唔係懷疑你，我只係諗緊當中係有啲咩原因啫，係咪佢捉人都要根據啲咩規則、流程或者條件呢？」
「咁我又唔知……」野仔也毫無頭緒，不過他記起有一件重要的事情要跟樂哥說︰「個阿月，佢好有可疑，啱啱老鬼同我講佢啲可疑嘢，我聽完都覺得佢有蠱惑。」於是乎野仔便將老鬼的說話轉述一次給樂哥聽，樂哥聽完後立即回憶起一些片斷。
「咁就一切都講得通。」樂哥總結道。
「吓？即係點？」野仔聽不明白。
「一開始我都覺得怪怪哋，啱啱你唔喺度嗰時，我哋去咗其中一間房揾錦囊，最後揾到一堆字母，我哋諗極都唔知係一個咩英文字，點知佢一嚟就講咗答案，跟住仲知點開個機關。到後來我哋畀阿雲追，佢又知邊度可以上到天花板秘道，明明你睇個天花板都唔似假天花，正常人點會知道？而家我終於明白哂，老鬼個推斷應該無錯，阿月、幽幽同阿雲三個落去揾你，之後阿雲就發狂，幽幽就死咗﹔我、佢、KT同福伯四個人逃走，佢不斷有微言，最後KT同福伯都畀佢影響。佢不斷做小動作破壞我哋嘅共贏機會，似係Sigmund Freud嘅間諜。」樂哥綜合所有情報得出結論。
野仔聽得頻頻點頭，但始終有兩個問題縈繞心中，忍不住衝口而出︰「但佢又唔係鬼，點捉幽幽令佢死？真係諗唔明，同埋點解佢要偷走幽幽嘅電子手環？」
樂哥一時之間也答不到，兩人只有一邊調查，一邊繼續遊戲。
此時，他們身後傳來一把女人的聲音︰「你哋啱啱講嘅嘢都係真？」
他倆被嚇了一跳，立即架起迎擊姿勢，女人並未理會，慢慢從水晶吊燈刺眼的光線中走出來，繼續問︰「我問你哋啱啱講嘅嘢係咪真！」
首先映入眼簾的是長笛，然後逐漸看到樣子，最後才看得清楚整個人，此人並非甚麼神秘隱藏人物，而是比野仔早一步出發的Maria媽媽！
「點解你會喺度？啱啱你明明唔係向樓梯方向走㗎……」野仔糊塗了，解釋不到眼前的Maria媽媽是怎樣出現的。
「睇嚟呢棟大宅嘅秘密比我哋所想所見多好多。」樂哥說。
「喂！你哋仲未答我問題！」Maria媽媽怒道。
「冷靜啲，其實我哋唔係唔想答你，只係我哋都係用唔同嘅證據同供詞嚟推斷，唔係百分百準確。雖然話佢真係好可疑，但一日未確認，一日都唔可以錯怪其他人，所以我哋決定邊調查邊繼續遊戲，你join唔join埋？」樂哥順勢向Maria媽媽發出邀請。
野仔也附和道︰「你同幽幽咁好感情，唔通你唔想查清楚係邊個殺咗佢咩？我哋嘅共同敵人應該係阿月先啱，佢好大機會係間諜呀！」
只要提到幽幽，Maria媽媽的情緒便會自然被牽動，她當然想查個明白，還幽幽一個公道，但眼前的兩人又是否真的可信？畢竟剛才他們的隊友才當面指控，並且頭也不回的跑走，沒有一絲猶疑與擔憂。
但若然他們所說屬實，那麼阿月才是幕後黑手，跟仇人一伙也太過離譜了，幽幽會死不閉目。可是他身邊卻聚集了其餘的人，當中甚至有本身是另一陣營的人，一定有其原因。
一個眾叛親離，一個人才濟濟，應該選誰？
Maria媽媽陷入了選擇困難症中，始終選不到最佳解答，於是毅然決定了第三個選擇︰「我自己嚟就得，Maria媽媽唔駛有隊友。」說完她便轉身離開，獨自調查幽幽的死因。
「喂，Maria媽媽……」儘管野仔在她身後叫喊，她心意已決，再次消失在刺眼的光線之中。
「睇嚟個女仔嘅死對佢打擊好大，佢甚至唔再相信人，但係落單嘅佢絕對係阿月嘅消滅目標，而阿雲都隨時會捉佢，佢處境好危險。」樂哥分析說。
「咁我哋就更加要幫佢，要佢同我哋一齊行動先得。」野仔的熱心和善心，經常都令樂哥有意外驚喜。
「咁我哋嘗試再去說服佢啦。」樂哥會心微笑說。
這段對話時間不足一分半鐘，而且只有一條單程路，但當他們追上去後，不管在二樓和三樓找多少遍，始終遍尋不獲Maria媽媽的身影。
野仔吃驚道︰「我哋係咪撞鬼？」
樂哥則意味深長的笑說︰「呢間大宅果然神秘，我哋落返去二樓揾錦囊啦，我相信佢有辦法生存到。」
他們達成共識，既然找不到人，便回到二樓，找他們倆未曾找過的藏書閣和健身房。
下完樓梯對住的第一間房是藏書閣，他們想也不想便進去尋找錦囊。這間房，KT和福伯之前曾經找過，可是他們甚麼也找不到。
「佢哋揾過都仲咁整齊，睇嚟真係有嘅話都藏得好深。」野仔有感而發，旁邊的樂哥也同意並表示︰「要特別留意啲書名，同埋睇下啲書中間有無挖空咗，有可能又係有啲咩機關。」
+×+×+×+×+×+×+×+×+×+×+
「救命呀！唔好捉我，我未想死住，我可以幫你㗎，我可以幫你捉哂佢哋。」老鬼跌坐地上，不斷向後退，最終被逼到牆邊。
「我點解要你幫？你又憑咩覺得自己幫到我？你連好好行步路都唔得，早啲去死，無謂獻世！」阿雲冷血的說，隨即伸出手。
「頂你個肺，死就死，啊！」老鬼作垂死反抗，用盡九牛二虎之力從地上躍起撞在阿雲身上，阿雲冷不防老鬼有此一舉，一時站不住腳被老鬼撞得人仰馬翻，而老鬼亦趁這個千載難逢的機會逃走。
不過老鬼終究還是瘸了一條腿，任憑他得跑多快，就算阿雲跌倒再站起，他還是在短短數秒內被再次追上，被封鎖在一樓的大廳。
「哼！今次你真係激嬲我喇，而家咁睇你仲有咩把戲？」阿雲忿怒的說。
老鬼其實一早便知逃走是徒勞無功，但人面對死亡又怎會有不逃的道理呢？
阿雲步步進迫，這次把老鬼逼到沙發椅背，他無情地對老鬼說︰「唔好怪我，要怪就怪Sigmund Freud。」
阿雲再次向老鬼伸出致命魔爪，老鬼嚇得向後靠，一個筋斗便栽進沙發上，這大好機會阿雲絕對不會錯過，一個箭步上前一抓，緊緊的抓住了老鬼的手臂，老鬼馬上瞪大雙眼望着他，然後口裏吐出「你老味」三個字便暈倒了。
+×+×+×+×+×+×+×+×+×+×+
阿月帶領KT和福伯逃到地下，第一次來到地下的KT和福伯四處張望，試圖尋找藏身之所。
「唔駛揾，跟我嚟。」阿月一眼看穿他們的心意，向他們釋出善意，帶他們到之前躲藏的廚櫃藏身。
「咁你匿喺邊？」福伯問。
阿月定了一下，然後擠出笑容說︰「放心，我有第二個地方匿埋，唔駛擔心我。」
「睇你反應，你唔似有。」KT立即拆穿他。
「啊……唔係……我有……嘅……係囉，我有嘅、我有嘅，你哋唔駛擔心我。」阿月支吾以對，令KT和福伯更加懷疑，不願躲在廚櫃。
「你哋唔好咁婆媽，聽我講快啲匿入去，時間無多，隻鬼隨時會嚟！我自然有我嘅辦法，你哋唔駛擔心我！」阿月着急起來，語氣也加重了，KT和福伯見狀也只好乖乖聽話。
待他倆藏好後，阿月獨自一人走到洗手間，簡單的把門鎖上，便坐在馬桶上獨自思考。
