合作
「隻鬼失控，我哋點算好？再咁落去個實驗會失敗。」Erik Erikson猶如熱鍋上的螞蟻，心急如焚。
與他形成強烈對比的是Sigmund Freud，他心如止水的看着監視器，平平無奇的說︰「我哋作為observer，係唔可以對實驗作任何有違預設嘅干預，你知㗎，所以我哋只可以靜靜咁等事情自己發展，無論結果係點，都係實驗所得出嚟嘅結果。」
「我都明，不過班贊助人……」Erik Erikson被Sigmund Freud喊停了。
「Enough！我唔理班贊助人之後點決定，但我係唔會違背實驗守則，呢個係我嘅bottom line，佢哋揾我嗰時我都已經講得好清楚！」Sigmund Freud義正辭嚴的說。
「我梗係明啦，我一直都好支持你㗎，但我都唔想睇住你白白浪費咗一個機會。你都知出面其他人都……」Erik Erikson欲言又止，但Sigmund Freud已經明白他的意思，可是Sigmund Freud依然堅決拒絕插手干預實驗，Erik Erikson也只好作罷，離開監察室，到外面呼吸新鮮空氣。
此時，他的電話震了，來電顯示是未知來電，他戰戰兢兢的接聽了。
「係，我知道，不過咁樣對結果唔係咁好……係係係，我當然清楚，但係……係嘅，係嘅係嘅，知道，而家唯有咁做……好，我知點做㗎喇，我即刻去做……無問題，一定做得好好睇睇……係，多謝，我唔會好似佢咁，拜拜。」Erik Erikson卑躬屈膝、恭恭敬敬的與電話另一頭的人聊完後，便走回監察室，坐到自己的位上。
「好彩我永遠都有準備plan b，今次真係大派用場。」他拿着大宅的平面圖，之後自言自語。
+×+×+×+×+×+×+×+×+×+×+
阿雲跑到一開始醒來的三樓房間，鎖上門，對着四面牆大吼︰「你哋快啲出嚟！畀返個交代我！究竟係咩事？點解好哋哋會死人？我唔做殺人兇手！」
然而，無論他怎樣喊，他始終得不到任何回應，只有他的回音與他對話。
這樣的控訴持續了約半小時，他總算冷靜下來，知道這樣於事無補，要避免再有人犧牲，只好把自己困住不再捉人。
而此時，他留意到那條本身無反應的電子手環亮起了紅燈、黃燈和綠燈，他按了一下電子手環的屏幕，顯示紅黃綠三條未讀的訊息。
紅色訊息寫着「AA膠」。
黃色訊息寫着「穿針，二」。
綠色訊息寫着「被鬼抓到會斃命」。
「乜嘢嚟？明明之前拍佢打佢都無反應，而家又會突然着咗？仲有，咩係『穿針，二』？打籃球呀？另外兩句就好易理解，畢竟有邊個未用過AA膠先，同埋啱啱先體驗完捉到人……」他納悶中帶點苦惱的想。
突然，他記起遊戲開始前Sigmund Freud的說話︰「捉到一個人就會有一個錦囊。」
「所以呢三個就係錦囊？但係點解有三個？我只係拎咗一個錦囊同捉到一個人喳喎。」他不解，再次陷入沉思。
然而，隔了一會兒，他又想通了︰「你老闆，煩乜啫？係點嘅原因有三個都無所謂，反正我都諗住唔再玩落去，而家最緊要嘅係點樣完咗隻game。」
「一般捉伊因嘅話，做鬼嘅只要投降就完，之後就會再揾第二個做鬼。」他努力回想兒時的遊戲細節得出答案，於是大喊︰「我投降喇，捉唔到，再猜過。」
「……」
房間一片靜寂，只有他的呼吸聲。
「嘖，果然係行唔通……」他失望但早已預料到結果，然後房間又陷入死寂。
環境越寧靜，思緒越混亂，越容易胡思亂想，越容易回憶舊事。
他想起了當初為了生計，第一次劏魚的畫面。一尾在水箱中生猛暢泳的鱸魚，被他一手捉住，温柔的放在秤砣上，秤了重量報了價錢後，那個拿着一包大一包小的後生婦人示意買下，並要求他把魚劏了，取出內藏。面對這尾在砧板上活蹦亂跳、求生意欲極強的鱸魚，他猶疑了，一條生命會因為他而消失，這責任非常重大。他右手按着奮力掙扎的魚身，左手拿着刀，看着鱸魚的腮不停開合，不知是因為牠呼吸不到還是緊張害怕﹔再看到牠黑漆漆的眼睛，可憐無辜的眼神使他下不了毒手。
「喂，賣魚佬，做咩呀？稟神呀？我趕時間湊放學，快啲啦。」後生婦人催促道。
「啊！係，唔好意思，對唔住！」這句說話，他像是對後生婦人說，但更多的是對這尾鱸魚說。
他先用刀背把鱸魚敲暈，減低牠的痛苦，然後再在牠的肚用刀一劃，然後取出內臟，看着那夥還在微弱跳動的心臟，他緊閉雙眼摘下它，鱸魚正式死亡。
這種生命在手中流逝的罪惡感，隨着劏魚時的自我催眠次數增加，漸漸變得麻木了，變成了例行公事，現在的他，劏魚不用十秒鐘，而且還眼都不眨、手起刀落、毫無感覺。
「點解會諗起呢啲嘢？劏魚唔同殺人，我唔可以習慣㗎……」他想着想着，自己也慌了，為了避免自己繼續胡思亂想，他開始在房內踱步。
「喂！」門外傳來一把男聲，阿雲嚇得差點心臟停止，他回過神後放輕腳步走近房門，細心傾聽門外的動靜。
「有啲嘢想同你商量，或者對結束遊戲有幫助。」門外的人說。
+×+×+×+×+×+×+×+×+×+×+
「原來喺呢度，就咁揾肯定揾幾個鐘都揾唔到。」阿月打開了其中一部洗衣機的蓋，拆下了過濾垃圾的網袋，入面裝了一個藍色的錦囊，但開口位有把鎖把它牢牢鎖住。
「又搞埋啲咁嘅嘢麻鬼煩，又唔畀埋密碼我。四位數密碼，逐個試有排試，附近應該有提示。」他自言自語說，同時開始掃描整個洗衣房。
很快他便笑了，每台洗衣機和乾衣機的儀表板上，都有兩組數字是藍色的，分別是「75」和「30」，他根據洗衣程序的順序輸入密碼，「75」升，「30」分鐘，鎖應聲打開，打開錦囊入面有一張字條，寫着「目視光明，衝破困局」。
「咩意思？咁勵志，咁雞湯嘅？」他百思不得其解，但還是把它袋好，同時心裏產生了另一個疑問︰「點解啲錦囊會唔同色？一個布袋仔無理由買唔到多幾個㗎，一定係有啲原因。」
他懷着滿腹的疑問，繼續尋找錦囊。他走到大門前，在門框邊檢查了一會後，便打開了隱藏在牆中的暗格，裏面裝的是一個孔明鎖。
「孔明鎖？真係花時間，不過難唔到我嘅。」他拿着孔明鎖把玩了一會，不費吹灰之力便解開了，內裏的錦囊亦得已重見天日。
「今次係黃色，會係啲咩呢？」他一手打開錦囊，拿出內裏的電子手環，屏幕顯示着「代捉，一」。
「代捉？」他看到後瘋狂的獨自大笑。
+×+×+×+×+×+×+×+×+×+×+
同樣在地下的另一人，老鬼的狀況跟阿月有很大對比。
「頂佢個肺，啪斷我隻腳，我做鬼都唔會放過佢，一定要殺咗佢！」面青口唇白的老鬼無力的依着廚櫃坐下，心裏對阿月懷恨在心。
他左顧右盼，試圖尋找可以作為拐杖使用的東西，可是始終找不到，只能找到一些廚具。
「死就死，固定咗隻腳先講。」他把鑊剷、湯勺放在膝頭兩側，用毛巾綁好固定，然後扶着廚櫃勉強站起來，但這小小的動作已經令他全身冒出冷汗。
他一拐一拐，拖着斷了的腳，勉強走到大廳，在圓桌前最近自己的座位上坐下休息，一邊擦着汗，一邊心有不甘、懷恨在心的盯着阿月，看着他從洗衣房拿着錦囊出來，接着跑到大門一會後又得到另一個錦囊，心裏不禁有一個疑問︰「點解佢好似知道哂啲錦囊喺邊咁？唔通佢有地圖？定係之前玩過？抑或有人提水？」
抱着想報仇和探求真相的想法，他決定遠距離跟蹤阿月看過明白，但就在他站起身一刻，腳突然無力，差點摔了一交，最終變成跪在地上，還撞倒了數張椅子引起了小小的騷動，不過阿月並沒有多加理會，拿到錦囊後便離開了地下，再次回到一樓。
「好惡，要快啲跟、上、去……」老鬼想站起來的時候，桌底下有一樣東西吸引了他的眼球，使他停止了動作。他伸手摘下它，是一個裝着錦囊的透明盒子！
「哈哈，終於我都揾到錦囊，不過應該點樣打開？」他對着透明盒子苦無辦法。
透明盒子正面是一幅拼圖，是那種九個格只有八塊拼圖，要靠移位把拼圖都放在正確位置上的那種拼圖。而這幅拼圖的圖案其實十分簡單，是心理學的標誌，可是難的地方是要如何把所有都移正確的位置，這對腦袋不靈光的他來說是比死更難的任務。
「妖，整嚟整去都整唔到，唔整喇！拎去畀其他人整算。」他氣急敗壞的說，然後攜着透明盒子隨阿月上了一樓。
+×+×+×+×+×+×+×+×+×+×+
在三樓，幽幽和Maria媽媽依然躲在玩偶房內，不敢外出。
「你估隻鬼會唔會上返嚟吖嗱？」幽幽用氣音問。
「你講咩？Maria媽媽聽唔清楚。」Maria媽媽壓着聲線回答。
「妖！」幽幽露出嫌棄的表情，重複了一遍，稍為提高了聲量︰「我話，你估隻鬼會唔會上返嚟？」
Maria媽媽聽到後，以疑惑的表情回答︰「我都唔知，但出面都仲未有動靜，應該唔會啩。」
「不如你出去睇吓。」幽幽提議道。
「吓？唔好喇，你想知你出去好啲。」Maria媽媽推卻。
「你近啲，你出啦，而且你唔係口口聲聲話會保護我咩？而家就係畀你表演嘅時候。」幽幽使出連環攻勢，使得Maria媽媽不能招架，只能無奈答應，畢竟這是她親口說過的話，總不能食言。
她小心翼翼的打開了門，露出一線縫隙，從中窺看外面動靜。
「點呀？安唔安全？」幽幽急不及待的問。
Maria媽媽一邊看着外面，一邊做出「OK」手勢示意安全，幽幽看到便放輕腳步走出來查看，親眼確認是安全才鬆一口氣。
「呼，嚇死我，隻鬼失驚無神大叫，好彩無上返嚟。」她離開房間，在走廊伸了一個懶腰，然後對Maria媽媽說︰「喂，我哋快啲去揾吓其他房，同其他人比，我哋進度落後咗好多。」
Maria媽媽也同意，於是與幽幽一起走到隔壁的房間查看。這間房已經被打開，是鬼當初找幽幽時打開的，裏面也已經被弄亂了。
她倆在門口探查期間，聽到樓梯傳來急促的腳步聲，於是她們想也不想便跑入房間躲藏起來。
然後她們聽到遠處傳來的開門關門聲，以及大叫大喊聲。
「隻鬼做咩反鎖自己？」幽幽不解的問。
「你問我，我問邊個喎？Maria媽媽我都想知點解，不過聽佢咁叫法，又反鎖埋自己，我諗佢一定受咗好大打擊，或者而家係我哋追返進度嘅黃金機會，我哋快啲揾吓呢間房先。」Maria媽媽分析說。
「嗯。」幽幽簡單的回應之後，便開始地墊式搜索。
這間房滿地都是樂器，本來是一間演奏房，但被鬼搗亂之後，便變成了一間亂了的演奏房。木管樂器、銅管樂器、敲擊樂器、弦樂器等等，應有盡有，雖然散落一地，但還是原好無缺的。而作為一間演奏房，為了不吵到房外的人，隔音設施亦做得十分充足，只要門一關上便與世隔絕。
「喂，呢度有份樂譜，」幽幽從地上拿起了一份樂譜，然後說︰「不過好似有啲唔見咗，揾吓有無其他部份。」
她倆在滿地樂器的地上尋找，但始終都找不到缺失的部份。此時，Maria媽媽提出了一個想法︰「呢份譜……可能本身就係得咁多，唔係要我哋揾埋其他，而係要我哋從中揾線索，可能彈佢出嚟會有幫助。」
「吓？但我唔識喎。」幽幽看着五線譜上的豆豉完全繳械投降。
「嘻嘻，交畀Maria媽媽，我彈琴有演奏級。」語畢，Maria媽媽便拿着樂譜走到鋼琴前，七情上面的彈奏起來。
「呢首歌好熟！」幽幽非常雀躍︰「但又好似唔太似咁。」
突然，琴聲停了，Maria媽媽說︰「份譜係得咁多，你有無咩頭緒？呢首係流行曲，所以我唔係太識。」
「首歌好熟，我有啲啲頭緒，你再彈多次，不過試下彈快啲。」幽幽要求道。
+×+×+×+×+×+×+×+×+×+×+
「Joyce個錦囊話畀我哋知被捉到會死，但而家唔駛錦囊講都應該係人都知。」樂哥說。
「而我哋知嘅係遊戲一開始嘅時候會有一隻鬼負責捉我哋九個，但隨住遊戲嘅進行，鬼可能會多過一隻。」福伯也憶述紙條上的內容。
「個意思係我哋有人會變鬼，定會有第十一個人嚟加入？」野仔問。
野仔這一問，一言驚醒KT這個夢中人，他立即擔憂起來︰「係喎，我完全無諗過多過一隻鬼係因為有新人加入。如果係咁，我哋剩低嘅人就算真係會真心一齊行動都好，都未必有勝算，因為我哋根本唔會知究竟有幾多隻鬼。」
「如果係咁嘅話，」樂哥立即作出回應︰「我哋就應該趁而家去試一試拉攏隻鬼，起碼將來多個幫手都好，根據捉伊因嘅規則，就算幾隻鬼一齊捉都好，鬼都唔可以自相殘殺。換句話嚟講，到時即係可以幫我哋阻住其他鬼。」
「有道理，咁我哋快啲去。」福伯贊同這個建議，其他人也沒有意見，於是一夥人便上三樓找尋鬼。
到達三樓後，他們迅速便鎖定了第一間房，無他，全因他們聽到房內有動靜。
「喂，有啲嘢想同你商量，或者對結束遊戲有幫助。」樂哥對門另一面的阿雲說。
「走開！你唔想死就快啲走開，如果唔係我一陣出返嚟就捉你，你就即死！」阿雲裝作很凶惡的答。
「我哋知你根本唔想殺人，而且你都唔知道係會殺到人，睇你啱啱嘅表現我哋就已經好清楚，所以先想同你商量，等我哋可以一齊完咗呢場遊戲，唔會再有人要死。」樂哥鎮定的說。
「……」阿雲沒有回應。
樂哥鍥而不捨繼續遊說︰「聽我哋講，我哋一定可以完滿解決到，我哋已經掌握咗一部份規則，可以無傷通關。」
「真係得？」阿雲動搖了。
「就算真係唔得你都無損失，喺遊戲入面你始終都係有優勢嗰個，真係要驚，都應該係我哋先啱。」KT搶着說︰「你可以隨時捉我哋，咁我哋就即刻完game。」
「你哋講嚟聽吓先，等我睇吓係咪真係work。」阿雲開始有點興趣。
「一開始，Sigmund Freud講過，我哋被捉嘅都有機會贏，呢個其實係有違一般捉伊因嘅規則，」樂哥開始解釋︰「但佢重點提到錦囊，而我哋揾咗嘅錦囊亦都有提過點樣可以完成遊戲，所以係有辦法完咗場game，只係我哋手頭上嘅錦囊並未夠料知點做，所以我哋要繼續揾多啲，如果有你幫手，我哋就唔駛驚畀人捉，可以全力去揾錦囊。」
「喂，我哋邊有錦囊話可以完到場遊戲，咁呃佢會唔會唔係咁好？」野仔聽到後即時小聲問樂哥，而樂哥則以堅定的眼神拍心口回應。
至於阿雲，在聽完樂哥的解釋之後便安靜了，這寧靜的時間好像有一輩子那麼長。
「咁好啦，我同你哋合作。」阿雲說完後便打開了鎖上的大門，被捉的四人和鬼第一次正式見面，而「他們」也終於見面。
「點解……」阿雲看到「他」很震驚，很想開口問「他」，但大概「他」也不清楚自己會被抓來的原因，而且自己也無法面對他，只能自己回答自己︰「或者咁就係佢哋畀面具我戴嘅原因。」
「我諗既然我哋決定合作，情報共享係必需，為表誠意，首先我將我哋而家知嘅嘢同你分享咗先。」福伯說，然後他找出紙條說︰「我哋知一開始鬼得一隻，但隨住遊戲時間越耐，鬼可能會多過一隻；另外被捉到嘅人會死。」
「仲有呢場遊戲唔駛全部人被捉都可以完結，就係咁多，你呢？」樂哥為免露出破綻，立即補充。
阿雲表面上聚精會神的在聽，但實際上卻是一直定睛看着「他」，根本甚麼也沒有聽到，直到樂哥的一句「你呢」才把他拉回現實。
「我？哦！啊……我有一枝AA膠、一個『穿針，二』，我都唔知乜嚟，同埋你哋都已經知嘅，被鬼捉到會死，一共三個。」阿雲如實回報。
「掂掂掂，咁我哋就逐層逐層揾，遇到其他人就叫佢哋加入埋一齊揾啦！」樂哥發號司令，一行五人便開始尋找錦囊之旅。
