5G靈異工廈

香港的地產界，一般都會分為住宅部和工商部，當然中間又會再細分為內地和世界各地，這些就不提了，畢竟我未遇過一定要了解的內地或外國樓盤，反而工商廈就有不少。一般來說，工商部很喜歡我們住宅部，雖說會分薄他們的市場，但住宅部為工商部帶來的卻是大量的買家，所以大家合作關係良好，不存在利益紛爭。

買工廈商鋪跟住宅有數個很大的分別，對投資者十分有利。

第一，工廈商鋪不限制持有量，不會因為同時持有多過一個物業而要交雙倍印花稅，而住宅則規定一個名只可以持有一個住宅物業，持有第二個便要交雙倍稅項。

第二，工廈商鋪沒有禁售期，可以今日早上買入，下午便賣出獲利，不像住宅有三年禁售期，未過禁售期賣出要交SSD。

第三，買全新的工廈商鋪也不需要入飛抽籤，看中鬥快落訂即可，相反住宅則經常要抽籤，很多時都是白忙一場，最後什麼收獲也沒有。

大家千萬不要誤會，住宅跟工廈商鋪相比也是有優勢的，凡事一體兩面，視乎你看事物的角度而定，但我不打算詳加敘述買住宅對比買工廈商鋪有什麼好處，各位有興趣可以自己問Google大神。

回來這次故事的發生地點，一棟號稱全港首個全5G的工廈，它座落於以塞車聞名、每日被人問候無數次娘親的地區，這區正進行翻新變天，將來會成為另一個CBD，發展和升值潛力無限。

既然有賣點，價錢又便宜，又是已經絕版的單位自己有來去水和洗手間，因此這個5G工廈，Raymond無論如何都要我們去Preview。

這是一個很炎熱的早上，我們一行人自行到工廈地下集合，由於我來得早，得已進入有冷氣的大堂等候，其他遲到擠不進的便要在室外邊曬邊聽了。

工商部的同事準備了價單和平面圖，分發一人一份後，便開始介紹，他的內容我已忘記得七七八八，只是記得價錢很便宜，五百餘萬有三百多呎，十分吸引。

經過一輪介紹後，終於到這次的戲肉──實地參觀。這工廈十多層高，地下有一間電競中心，還有Cafe，而每層也是十個單位，有大有小，當中有些單位甚至層數已經賣出，而我們參觀的是五樓，這層是發展商特別留住不賣，當作示範單位，而走廊給人的感覺像酒店，置身其中完全不覺得是工廈。

由於每個單位都自設洗手間，所以跟住宅的Studio無異，而且發展商還提供三種地墊和三種牆紙款式供買家選擇，絕對是理想的蝸居，難怪工商部同事剛才介紹時意有所指的說︰「單位有埋廁所，自己可以裝埋熱水爐，點同客Sell自己可以再諗吓。」的確，五百餘萬在市區買三百多呎的確是挺便宜的。

但，一定要跟大家說明一點，工廈住人是犯法的，大家千萬不可以以身試法，但工作到累，休息一下還是可以的，大家懂的便懂。

由於整棟工廈都鋪設了5G網絡，所以設計也相當智能，只要用專用手機App便可以進出大廈和單位，還能控制冷氣和燈，遙距開門給別人也不是夢。

整個參觀過程也很平安順利，沒有異樣，十個單位也一一參觀完，這次Preview總算順利結束。我們一Team人相約在樓下集合再一起午餐，但等了良久，還是不見Rita蹤影。

「Rita佢係咪自己行咗先？」大師兄Chris問。

「你估佢係你咩，成日突然失蹤幾個鐘，我打畀佢問問。」Alex挖苦道。

「啊，你個Alex呀。」Chris扮作生氣，但不能反駁，畢竟是他自己不爭氣，有太多被人抽掅的地方。

「唔得，無人聽。」Alex說。

「咁等多陣，可能去咗廁所。」Kerry說。

十分鐘過去，其他人也散去，只剩下我們還在原地等待。

「唔對路喎，不如上去揾吓。」Fion提議，大家都點頭贊成。

「留返一個喺度好啲，一陣佢落返嚟我哋上哂去，到時又揾餐懵。」我說。

「你啱，咁我留喺度等喇。」Chris自告奮勇，大家也沒有異議，始終就算他跟上去也沒有什麼幫助。

我們一行人再次踏足五樓，可能是因為現在沒有人的關係，走廊感覺變得很寬闊，跟剛剛的肩碰肩完全是兩個光景，現在才是適合Preview的時間，剛剛的走馬看花實在不值一提。

我們逐間房間查看，途中不斷呼喚Rita，但都得不到回應，直到最後的尾房，才聽到一絲絲很微弱的求救聲，乍聽之下，跟Rita的聲音十分相似。

「Rita，係咪你？」Fion問，但門的另一面只是繼續喊救命，沒有對Fion的提問作出回應。

「唔好理咁多，揾人開咗門先講。」Justin說，因為門用的是智能鎖，我們從外面根本無從入手，只好尋求主區同事協助。

經Kerry聯絡後，剛剛跟我們Briefing的工商部同事牛哥趕過來替我們開門。門一打開，並沒有任何靈異情況出現，只有Rita站在門後等待門開啟。

「你做咩會自己一個喺度？」Justin問。

「我啱啱等啲人走哂影咗幾張相諗住走，點知門就閂咗仲Lock埋，我開都開唔到，電話又收唔到，喺度叫救命又無人，好彩你哋返嚟揾我喳，唔係都唔知要困幾耐。」Rita帶點哭腔道。

「頭先我喺出面問你，你唔答我嘅，你聽唔到咩？」Fion問。

「吓？有咩？我一直坐喺門後面都聽唔到喎，係啱啱聽到密碼鎖嘅聲我先企返起身喳。」Rita驚訝的說。

「唔緊要，我哋快啲落返去先，大師兄喺樓下等緊。」我說完之後便隨即聽到很大的「嘭」一聲，大門又關上了，我們用盡辦法嘗試開門都不得要領，大家都被困在這三百多呎的單位內，求助無門。

此時，我隱約感到些許寒氣，開始四處張望，尋找源頭，很快便在那智能管家處找到答案。

我帶Kerry走到一邊，小聲告訴他我的發現，而他當然早我一步便知道，還想好了對策︰「哩隻係Studio，對你嚟講只係碎料，低調處理咗開返門等佢哋走咗先再收服佢。」我給了他一個Okay手勢後便開始行動。

我走到智能管家前，拿出兩張卡片，一張放在它上面，一張放在我掌心捂著它，它的螢幕像失靈般顯示出亂碼，接著便聽到門鎖被打開的聲音，Rita看到很好奇問︰「Charles，你點打開佢㗎？」

「電子嘢故障啫，㩒幾吓就無事。」我作了一個大話，畢竟有關電子的事物，女生一般也懂得比男生少，所以很容易蒙混過關。

Justin打開門後，其他人便立即離開，只有我托詞說想去洗手間，讓他們在樓下等我一會，他們本身也有點猶疑，但有Kerry助功便不同，他一句後大家便乖乖的離開，而我也可以專心辦正事。

「你出嚟喇，已經無哂其他人，你有咩原因要留喺度唔走，講出嚟我會幫你。」我對「住客」喊話，可能是它等級較低，沒有多加反抗，很順利便現身於我面前。

這位「住客」是一個斯文的上班族，但大概是失敗的一群，雖然穿著裇衫西褲，但衣衫不整，又滿臉鬍渣，頭髮亦很亂，架著一副黑框眼鏡，樣子一般，有點呆，身型亦有點胖，簡單直接的說，是一個失敗的肥宅。

「你做咩唔投胎要留喺度？」我再問一次。

「……」他害羞的垂低頭沒有回應，還避免跟我有任何眼神接觸，良久，他才拿出電話，兩隻姆指在屏幕上飛快的移動，最後智能管家便開口︰「因為我嘅發明被人偷咗，我要搶返佢返嚟。」原來他剛才輸入的文字，透過智能管家說出來了。

「你嘅發明？畀人偷咗？係咩一回事，可唔可以詳細講一次我聽。」我既關心又好奇，這可能是一件不得了的大事。

「住客」肥宅點點頭，開始透過智能管家轉述他的經歷︰「我本身係一個讀Program出身嘅大好青年，同幾個志同道合嘅同學畢業出嚟自己搞咗間公司，但一直都無咩人睇得上我哋嘅產品，最後因為種種原因，當初並肩作戰嘅戰友都一個一個咁離開，到最後間公司得返我一個撐住。」我聽到這開端，無疑是一個勵志的創業奮鬥故事。

「咁之後應該有一個翻天覆地嘅變化喇我估。」我忍不住插嘴。

「住客」肥宅苦笑一下，邊輸入一連串說話，智能管家邊說︰「做戲咩你估，邊有咁好彩。我自己一個人撐，最後都係撐多一個月，就因為覺得太孤獨同揾唔錢而選擇摺埋間公司，奪埋心水去揾工。」我聽到後露出無奈的樣子，本以為是熱血的故事，怎料只是一個肥宅作為Loser的經歷。

「咁又唔駛咁失望，因為反轉嘅劇情而家先開始。」他開始興奮起來，整個人也激動得顫抖，樣子也變了，有點歇斯底里，直接自己說出口︰「我好好彩，好快就揾到哩間公司請我，本身諗住平庸咁打份工，安穩咁生活就算。點知有一日，間公司內部搞咗個新產品開發比賽，目的係想揾啲有潛力嘅產品推出市場，作為曾經創作過好多唔同產品嘅我當然立即報名，仲一口氣將幾個產品用嚟比賽，我嘅產品都好出色一定可以大賣，只係差一個機會無人賞識。」他說到這，突然跪下，雙手緊抱自己身體，我也被他這突如其來的舉動嚇了一跳，一時之間也反應不來。

幸好他很快便繼續說下去︰「哩個智能管家就係我其中一個產品，亦都係最終獲勝嘅產品，但哩間無良公司竟然將我嘅作品改咗少少嘢，再是但揾咗個皇親國戚話係發明者，偷走咗我嘅產品。係我蠢，嗰時唔識申請專利，搞到乜都無哂，我試過喺公司投訴，得返嚟嘅回覆當然話哩個唔係我嘅發明，公司另有計劃，叫我期待吓。我頂，咩另有計劃？當我係乜？想咁就打發我走，我嬲嬲地都有爆料畀東張，但都無回音，於是我決定靠自己雙手，將我嘅親生仔搶返嚟。」說到這裡，我聽得出他的激動中是有一點不忿，亦有點悲傷。

「你點搶？同埋有啲咩改咗？」我問道，但其實心裡有另一個想法︰「會唔會有一種可能，其實真係人哋原創，只係咁啱撞竅，而唔係公司偷咗再改呢？」

「嘻嘻嘻，我點搶？個Program我寫嘅，源代碼喺我手上，我Hack入去有幾難？」他樣子變得很奸險，我也不寒而慄，但他並沒有停止，反而越說越興奮︰「我忍辱負重，一直扮哂無事，再用我嘅職權因利成便，終於等到機會畀我Hack入去，點知間衰公司竟然連代碼都改埋，搞到我花咗唔少功夫，但好彩都難唔到我。佢將我嘅發明改到面目全非，又加埋啲咩購物功能、襯衫功能、陪玩功能、湊寵物功能咁，九唔搭八，我全部都改哂佢，直接用我嘅源代碼將啲唔需要嘅嘢清洗乾淨，哈哈哈哈。」「住客」肥宅說得興起，一時忘形，令全個單位的燈不斷開開關關。

「冷靜啲先，你咁樣做應該都已經還咗你心願，神不知鬼不覺，點解最後會死咗，仲附身喺個智能管家度？」我不解的問，但同時更肯定我的推論正確。

「哼！講起就嬲！」他突然情緒一轉，變得很憤怒，燈開到超亮，水喉也開到最大，然後怒氣沖沖的道︰「我明明將個智能管家改到咁Perfect，佢哋竟然唔領情，硬係要個翻版，仲睇返CCTV捉咗我話要告我，你話係咪荒謬？佢哋偷我發明呀！竟然仲惡人先告狀，乜世界？無天理！」說到這裡，他怒氣「爆燈」，我說的是真的爆燈，「嘭」，地上全是玻璃碎片。

當局者迷，旁觀者清，看來他死後還未弄清事情真相，真是枉死，可是我也不能放任他，儘管真相殘忍，但我還是要告知他來結束這次事件。

「阿乜生……」我開口才發覺到現在還未知他的名字，而他亦立即答道︰「莊生。」

「唔該，阿莊生，」我立即糾正，再說下去︰「對於發生喺你身上嘅嘢我都覺得好抱歉，之不過，假如，我話假如啫吓，你有無一刻諗過，其實佢哋真係兩件唔同嘅產品嚟呢？因為……」未待我解釋，「住客」肥宅莊先生便大發雷霆，把冷氣調到最凍，還開大水喉，用冷水噴向我，幸好我反應快才能避開，躲到水噴不到的位置繼續說下去。

「你冷靜啲先，聽埋我講先，我唔係鳩噏，而係聽完之後得出嘅想法。」我嘗試解釋，但他依然不想聽，可是又奈不了我何，畢竟眼耳口鼻中，耳是唯一不能自主暫停其功能的。

「點解我會話其實係兩件唔同Product呢？其實你自己應該都知，始終連源代碼都完全唔同，一啲你嘅影子都揾唔到，而且加咗咁多你無嘅功能，我相信你睇返交上去嘅嗰份參賽計劃書就揾到答案，哩啲唔係後期加上去，而係本身就有，作為公司方，見到相同方案實會多加比較，但係你嘅功能佢有，你無嘅功能佢都有，咁點會唔揀一個有更多功能嘅呢？唔理啲功能有無用，但有就係有，好似而家啲電話咁，都有好多功能㗎，但你實際用到嘅又有幾多？不過你唔好理，佢就係加埋入去，用唔用得著係你嘅事，但佢加咗就係多一個賣點，百貨撞百客，總有人因為咁而買，而佢又可以賣貴啲，有咩壞？」我一口氣說完後，他整個人當機了，無論我呼喊他還是搖晃他，他還是無反應。

「唔通一時之間訊息量太大，佢Load唔切？抑或佢始終接受唔到所以呆咗？」我不禁猜想，但又不知如何是好︰「定係佢附喺智能管家度太耐，個人都電子咗，要Reboot？」

正當我打算尋找他的Reboot鍵的時候，他終於又活過來，並哭著說︰「其實我又點會唔明你講嘅嘢，我只係接受唔到啫，由Hack唔到入去嗰刻我已經知，但我真係好唔甘心，點解我得唔到好機會？明明我嘅發明咁好，Idea領先人哋咁多，但我推出就無人問津，人哋推出個劣質版就仆倒去買，哩個世界公平咩？」

看到他這憤世嫉俗的想法，令我想起很多失敗的人都覺得自己懷才不遇、際遇不好、運氣不佳，但卻忽略了別人付出的努力、遇過的挫折、跌倒再起身的勇氣，這就是成功與失敗的差別。

「你又唔駛咁灰嘅，或者咁諗，你嘅Idea係真係掂呀，如果唔係都唔會面到世，雖然面世嘅唔係你嘅出品，但最少證明咗你有眼光有遠見先。」我壓抑著想罵醒他的衝動，嘗試安慰他。

「……」他默不作聲。

「點都好，而家總算了結咗你嘅心願，解咗個你心結，可以安心出行、安心上路喇！」我繼續笑著說。

「唔得，」他再次透過智能管家發聲︰「我死都唔會走。」

「但你已經死咗……」我嘀咕。

「……」他再次陷入沉默。

「放心，我哋會幫你好好超渡，包你順利投胎。」我繼續遊說。

「唔得，我仲要報仇。」智能管家冰冷的機械聲完全無法表達「住客」肥宅莊先生的情緒。

「報仇？無喇喇報咩仇？你都知個發明唔係畀人搶走，仲有咩仇好報？」我大惑不解。

「報殺死我嘅仇！」他再次開口。

「你係被謀殺？」我聽到後很吃驚。

「無錯，係間公司聯埋個皇親國戚一齊殺死我！」他又再次暴怒，水又噴得滿地都是。

「願聞其詳。」我簡潔有力的答。

「既然你誠心誠意咁問，我就大發慈悲咁話你知。」他用了這句名台詞作開頭，果然是不折不扣的肥宅。

「佢哋話要告我，我又點可以坐以待斃？我一定要反擊，證明我嘅設計更優勝，係佢哋無眼光，我要佢哋求返我！我知哩棟工廈會用嗰個智能管家，所以我決定潛入嚟做啲手腳，點知個智能管家真係太流，竟然漏電將我電死咗，就係咁我就順便附咗喺度，你話係咪間公司同嗰個皇親國戚嘅錯？」他又又又再再再以歪理當作道理。

「莊生，我聽完之後都好同情你嘅遭遇，亦都估到係因為死咗人但個智能管家都無停用，所以你就喺度惡作劇，等啲人認為個智能管家唔掂，去投訴個製造商，造成輿論壓力，逼間公司回收產品。」我推論道，而他也點頭，證明我追看多年金田一和柯南並無白費。

「之不過呢，你咁做其實都無用，你喺度咁耐，搞咁多嘢，但個智能管依然都仲喺個市場上流通緊，但反而你就越作越多孽，仲影響埋自己投胎，有咩謂呢？你已經被佢毀咗一次人生，唔通你仲想被佢毀多次？計我話呢，你應該聽我講跟我走，等我幫你超渡，咁你就可以快啲投胎喇。」我再次向他展現我的誠意，向他伸出友誼之手。

「唔得！唔好！唔制！唔可以！」他又再發飆︰「搞唔死佢我誓不罷休！」看來他真的冥頑不靈、固執得很，我也不能再放任他了。

「敬酒唔飲飲罰酒？咁就唔好怪我唔客氣。」我拿出一張卡片，以食指和中指夾緊屈曲，再輔以手腕力一甩，卡片就如飛鏢般直飛，插在智能管家上，亦正好插在「住客」肥宅莊先生額頭，他立即變得無力，跌坐在地。

「唔好……」他哀求道，但我並未理會他。

「你本來就唔應該留喺度，勸極都唔聽，難怪你啲產品會無人問津，你啲Partners會離你而去，你太自我中心，聽唔到人哋嘅聲音，哩種人注定失敗！」我厲聲訓斥他，不知怎的，我就是特別討厭這種人。

我拿出EA證，把頸繩套在他頸項上，然後唸咒，EAA字樣便飛出來佈滿他全身，再拉他到EA證內封印著，雖然他最後的掙扎很淒厲，但我已經鐵了心，沒有理會。

「住客」肥宅莊先生被我收了之後，整個單位回復平靜，但畢竟被他弄得一團糟，我只好從後樓梯偷偷離開，以免被發展商發現要我賠償。

「Charles，你咁耐嘅，我以為你又畀間屋困住咗。」Rita一看到我便說。

「唔好意思，啱啱肚痛痾耐咗。」我隨便作個理由蒙混過關，但明顯其他人不太接受。

「唔好講咁多喇，大家都餓，我哋去食嘢先。」Kerry替我解圍。

如是者，這次5G工廈Preview之旅便告一段落，「住客」肥宅莊先生亦交由Kerry善後。而我翻查資料時亦發現，智能管家的製造商對他的死亡雖然作低調處理，但之後卻推出了一個入門版的智能管家，根據產品描述，這無疑是「住客」肥宅莊先生的發明，只是他再也看不到這一幕了。