革命尚未成功，同志仍需……

隨著遊戲結束，燈光顏色再次出現久違的綠色，朱Ling慢慢把眼罩脫下，看著滿目瘡痍的房間，屍橫遍野、血跡斑斑，嘔心感突然襲來。

由本身坐滿二十一人的房間，現在只餘下他獨自一人，那種孤寂感、無力感、無奈感充斥著整個人。回想起剛才的遊戲，一切都發生得太突然，不知就裡的被帶到這房間跟二十個素未謀面的陌生人玩遊戲，不知原委的要面對死亡威脅，不知因由的一直大難不死，此時的他，只想快點離開這滿是殺戮的房間。

不過他沒有即時離開，而是在每個參加者身上，分別拿了一些信物跟身份證，履行先前的承諾，告訴每位參加者的家人，這裡發生過的荒謬絕倫之事，集合眾人之力，控訴藍集團。

收集好信物後，他推門離開，但又停了下來，回頭問MC傳媒︰「傳媒大哥，我一直有個問題好想問，點解你要成日將啲燈嘅顏色轉嚟轉去？」

「顏色心理學。」傳媒簡單的回答。

「哈哈，原來係咁，諗返轉頭，的確係有啲影響到我哋嘅情緒同判斷。」朱Ling笑著說，然後頭也不回的離開。

一出門口，首先收入眼簾的是一大班特種部隊，以及他們身後的醫護人員。這班人看到朱Ling走出來，十分緊張的衝過去把他圍著，一人一句、七嘴八舌的問他問題，混亂間，他的脖子感到有點刺痛，然後便昏倒了。

「Good job喎Zero，又搞掂一場，收得工。」Five拍著Zero的膊頭說。

「濕濕碎喇，哩啲遊戲，我哋前前後後搞咗過百場，全部都跟足我劇本進行，點會有問題。」Zero自信的說。

「我每次都好好奇，你點令到佢哋每次都跟你劇本進行，無任何出錯？」Five追問，而在旁的Nine也大力點頭表示想知。

「用我最拿手嘅方法──催眠，再加啲暗示，同埋唔同嘅心理學，咁就可以成功。」Zero邊說邊收拾物件。

「車，講完等於無講，不過算喇，今次總算唔駛我參加埋一份，做旁觀者原來都幾緊張，我都睇到掌心冒汗。」Five興奮的說。

「唔好齋講，快啲幫手執埋啲嘢去收錢，現場就交畀藍集團啲人處理。」Zero督促Five和Nine。

「係係係……」Five回答，而Nine則依然用點頭回應。

「咦？哩度咁熟面口嘅。」朱Ling張開惺忪的眼睛，第一眼看到的便是鑲在自己房間天花板的願望板。

「唔係喎，點解我會返咗嚟？」他整個人頓時清醒了︰「我唔係應該啱啱贏咗場遊戲，準備走人咩？點解無啦啦返咗嚟？點解我會無咗哩段記憶？」

他坐起身，在房內開始搜索些什麼，房內找不到，便在廳、廚房、洗手間也找一遍，但奈何遍尋不獲。

「啲信物同身份證呢？唔通我已經畀返哂佢哋啲屋企人？但無理由我會無哂記憶㗎。」朱Ling苦惱著，努力在記憶當中找出些片斷，因為那場遊戲是何等的真實，他不想承認這是一場夢。

不過，他根本找不到自己參加過遊戲的證明，慢慢地，他冷靜下來，開始回憶遊戲的細節，說服自己是看電影看得多，所以才發了這種夢，現實才不會有這麼變態的集團舉辦這些遊戲。

終於，他說服了自己，不過剛才的過程令他出了一身冷汗，整個人黏糊糊的，很不好受，所以他選擇沖冷水澡，令自己忘記那惡夢。

「點解條頸會有個針口？」朱Ling脫上衣後在鏡子中有所發現。

然後，他整個人一動也不動，嚇呆了。

「原來唔係夢，而係真有其事。藍集團勢力大到可以將成件事都消除哂，令我差啲以為真係一場夢。哩個針口細到咁，如果唔係我平時驚有頸紋，特別留意條頸，都真係唔會發現到。」朱Ling怒火中燒︰「竟然咁樣玩弄生命，實在太過份，我一定要幫佢哋報仇！」

「叮噹」門鈴響了，朱Ling穿上上衣去開門。

「嗨，朱Ling。」門前的是三個陌生人，其中一個特別高。

「你哋係？」剛經歷過死亡遊戲的朱Ling對突如其來的三人有所防備，向後退了一步。

「唔駛驚，我哋無惡意嘅，我係Zero，佢哋係Five同Nine，我哋組織叫Number Man，係專門透過舉辦遊戲去賺錢嘅組織。」Zero先自我介紹，然後再道明來意︰「我哋想邀請你加入，同我哋並肩作戰。」

「等陣先，遊戲？」朱Ling想了想，大叫︰「Killer，光時殺！原來就係你哋，我要殺咗你哋幫其餘二十人報仇！」語畢，衝出來便是一拳，但被高大的Nine一手擋下並捉實。

「Nine，唔准對自己人用暴力。」Zero一聲令下，Nine便鬆手並退下。

「我哋好有誠意邀請你，每次遊戲之後，我哋都會邀請勝出者加入我哋，遊戲唔係純粹想殺戮，而係喺入面揾精英，我哋唔理委託人有咩目的，最緊要係我哋組織再次壯大，然後先可以報仇同報復，執行我哋嘅正義。」Zero對朱Ling訴說抱負。

「咁又幫藍集團？佢哋搞場咁嘅遊戲，係人都知有問題啦！」朱Ling怒罵。

「因為錢，」Zero簡單的說︰「舒展任何抱負都要有錢，藍集團只係其中一步棋。我知你而家都想報仇，加入我哋，一齊對抗世界嘅惡！要對抗惡，首先你要成為最惡嗰個！我哋哩場革命未完，需要你嘅幫手。」

「要成為最惡嗰個？」朱Ling抱著懷疑的態度。

「你以為藍集團就係終極大佬咩？佢背後撐腰嘅係邊個你知唔知？而且我哋仲要面對全世界最大遊戲舉辦者嘅追殺，哩個遊戲舉辦者同全世界政府同大集團都有合作，我哋要全部都KO，所以你嘅加入係必要。」Zero激動的說。

「好似幾好玩咁，反正我都決定豁出去，就Join埋你哋一齊玩，去執行我哋嘅正義！」朱Ling眼裡有團火。

「歡迎你，Ten。」Zero說完，便伸出代表友善的右手，朱Ling也伸出右手握著︰「我哋一齊掀起革命嘅浪潮，成為最惡嗰個！」