I Have A Pen
藍燈高亮，傳媒再為大家發聲︰「而家得返四位玩家，每一票都好重要，我哋用簡單多數制，邊面拉攏到多啲人，邊面就贏。十月一嘅哩一槍，究竟可以唉醒到大家啲咩呢？我拭目以待。」
隨著傳媒的說話完結，黃燈的亮起，證明十五分鐘正開始倒數。
「基本上，你要明先，淨低嘅我哋四個，大致都已經估到大家係咩身份，再你瞞我瞞都已經無咩意思。嗱，不過咁喎，而家關鍵喺中立撚身上，我唔知你由咩色轉做咩色，但我好希望你會助我一把，完成Harry遺志，令佢嘅助攻變成有效攻擊，將當權者拉下馬。」朱Ling向著坐在前方的高軒和阿瑩呼籲。
然而，他倆並沒有任何回應，只是沉默的觀察著其餘三人的舉動，並各自在心裡盤算著。
越久的沉默，越發令朱Ling急躁，但他絕不能將這份急躁之情表露出來。他只能等待，只能為一會投票最壞的結果早早作計劃。
「哈哈哈哈……」豪邁的笑聲就如宇宙大爆炸般在完全靜謐的空間中突然爆發出來，一直強忍笑聲的阿Tim終於忍不住︰「朱Ling啊朱Ling，睇吓你幾撚可憐，根本無人願意幫你，無人喺你陣營，你只係孤單一人，下一Round就係你死期！」
朱Ling聽到後雖然忿怒，但卻不能反駁，他把最後希望都押在這一次投票上，如果有兩票贊成，證明中立撚是黃營人，還有一線生機，否則，便要為死亡做好心理準備。
「啊，大家唔好咁僵先，其實大家又無怨無仇，唔駛話咁仇視對方嘅，錯都唔係我哋錯，而係個幕後黑手藍集團錯啫。雖然我哋目前因為陣營同死亡而恨對方，但搞清楚係邊個搞成我哋咁先，唔好放錯焦點。」阿瑩開腔想調和這緊張的對立氣氛︰「我哋大家都會將死咗嘅人嘅恨意傳承，到最後揾藍集團算帳，呢個我哋已經係一早有共識㗎嘛，係咪？」
眾人均點頭，雖然有人是因為群眾壓力而認同，但看見各人都點頭後，阿瑩續說︰「不如我哋開心啲笑吓喇，你哋有無聽過首好Kai嘅歌？日本嗰首呢，嗰個搞笑藝人首英文歌，好似叫Pico大魔王，首歌叫……咩話？好似叫咩『Apple Pen』咁㗎。好想喺死前記返起哩首歌。」
「唔係叫『Apple Pen』，係叫『PPAP』。」高軒一臉鄙視的說。
「啊，係呀係呀，高軒你真係叻。我淨係記得啲音樂拍子，但就唔記得啲歌詞，記唔記得第一句點唱啊，高軒？」阿瑩問高軒，但他不屑回應她。
「咁阿Tim呢？朱Ling？」她仍繼續追問餘下兩人，阿Tim也沒有理會，而朱Ling則拼命思考著。
「加油啊朱Ling，個音樂係咁嘅。」阿瑩開始哼歌。
「啊！我記得喇，『I have a pen，I have an apple』咁。」朱Ling終於想起。
「係喇係喇，就係咁，I have a pen，唔該哂你啊朱Ling，I have a pen。」阿瑩對著朱Ling說。
聽罷，朱Ling也重重的點頭，然後心想︰「原來我並唔孤單，一切都交畀你喇。」
誠然，阿Tim和高軒並不清楚阿瑩跟朱Ling對話的玄機，無他，一來他們認為阿瑩只是為帶動氣氛而唱，二來他們認為朱Ling已是孤獨無援。
「朱Ling，估唔到哩首戇鳩歌會係你嘅輓歌。不過都啱，你唔戇鳩就唔會做我敵人喇，哈哈！」阿Tim無視剛才阿瑩的勸導，把氣氛再次推向緊張邊緣，不過這也很難怪，畢竟藍營現在擁有絕佳優勢，最少阿Tim是這樣想。
阿瑩白了他一眼，再望向朱Ling，只見朱Ling雙手緊握拳頭，強忍怒火，不過既然火山未有爆發跡象，阿瑩也鬆了一口氣。
此時，一直冷眼旁觀，甚少發言的高軒也參一腳道︰「其實邊個陣營都好，無人會想死，不過既然參加得，我就淨係想贏，所以無論一陣發生咩事都好，你哋都唔好怪我。」
這段說話聽在朱Ling耳裡，好像另有寓意，使得他一時之間分不清誰是敵誰是友。
「或者……高軒先係自己友，阿瑩只係扮Friend？」朱Ling如是想︰「不過由隻Game開始到而家，高軒嘅變化都幾大，由本身想揾方法唔駛死人咁完成隻Game，到上一Round衝出嚟護主，都幾明顯佢就係PoPo，我就死都唔信佢會自我犧牲去造就我，既然阿瑩話佢有Plan，一於就交畀佢。」
「不過……」朱Ling像被雷電擊中般──如果現實有背景圖，這幅圖將會是行雷閃電──他突然發覺，他根本不知道阿瑩的Plan是什麼，應該怎樣配合。他想開口問，但這是不可能的；然後他想用方法暗示，但又想不到方法；最後決定打眼色，他拼命對著阿瑩擠眉弄眼，但阿瑩就是不懂。
就在朱Ling繼續想辦法的時候，討論時間已經悄悄走到尾聲，燈光轉藍，代表傳媒的小丑又一次張開嘴巴說話︰「時間夠喇，人數少咗，討論都真係無咁精彩。不過Anyway，終於又到咗緊張時刻，今次係醫護Harry臨終前對阿Tim嘅控告，除咗阿Tim之外嘅三位，你哋都有投票權，時間交畀你哋。」
紅燈亮起，朱Ling沒有半點猶疑，立馬按了「Yes」鍵，然後雙眼發亮、滿懷希望的將目光投向阿瑩，然而阿瑩並沒有望向他，只是快快的按完後便合上雙眼，像默哀，又像哀悼。
「結果發表，」燈光轉為藍色，傳媒宣布這次的投票結果︰「一對二，指控唔成立，阿Tim無事！」
聽到這個結果，朱Ling頓時感到被背叛，整個人也瘋了，理性完全斷線，這是壓垮駱駝的最後一根稻草。
他倏地站起來，拍枱對著阿瑩大叫︰「你！你唔係話有Plan咩？點解要投『No』？你唔係同我同一陣營咩？阿Tim係一哥已經係不爭嘅事實，點解你仲要保佢？你仆街喇！不得好死呀你！因住收尾嗰幾年！」
阿瑩聽著朱Ling對自己的指控和謾罵，正眼也沒有看過他，只是冷冷的說︰「天真！我幾時同你講我有Plan？我係話Pen呀！原子筆呀！歌詞嚟喳！我咪一開始已經講咗係問首歌嘅歌詞囉，你自己過度解讀，走嚟冤嚟我，無撚病呀？仲有，我幾時有話過係同你同一陣營，點解我唔記得嘅？」
聽到阿瑩這樣說，朱Ling更顯歇斯底里，失控的大叫大嚷，胡亂拍打枱面，阿Tim看在眼裡，立即火上澆油︰「哈哈……抵撚死，都話同我作對唔會有好下場，明眼人都知邊面贏面大，畀我係中立撚都做藍營人喇！哈哈……」阿Tim笑不攏嘴。
此時此刻，勝者的喜悅與敗者的失態形成強烈對比，構成了有趣的畫面，鐫刻在每位觀眾和參加者的腦內。
