部署•捕處
沒有任何投票殺戮的討論時間，好好的起了緩衝作用，令餘下的參賽者能夠得到一絲的喘息時間。雖然這十五分鐘看似很短暫，但對於已經長期面對極高壓死亡威脅的參賽者而言，這的確能避免他們精神崩潰。
而配合這輕鬆的十五分鐘，燈光亦罕有地亮起綠色來。
然而，對於餘下的五位而言，這次討論並沒有很輕鬆，因為他們都把這節討論時間視為下回合的前哨戰，各種舌劍唇槍、笑裡藏刀均令到各人比之前的討論更加緊張。
「今次討論時間係勝負嘅關鍵。」眾人對此深信不疑。
「我諗大家對淨低嘅人係咩陣營都大致了解，我亦都已經部署好點樣去贏，阿Tim，啊唔係，一哥先啱，你哋想贏最好快啲殺咗我，唔係嘅話你哋死硬。」朱Ling率先發言，向阿Tim下戰書。
阿Tim面露微笑，但這微笑並不是給人温暖的感覺，更多的是心寒。
他笑著說︰「多謝你寶貴嘅意見，我哋警方會好好參考，加以研究佢嘅可行性。」
「收皮啦你！」Harry衝口而出，對著阿Tim破口大罵︰「你估你真係一哥？係隻Game畀權力你喳。你出返去一樣係Nothing！一樣係廢物！一樣係Loser！你唔好出去獻世，你對個社會無貢獻㗎，留返畀我呢啲社會精英出去服務社會好過喇。」
「我覺得又唔可以咁話人嘅，喺社會上面，每個人都係一個齒輪，每個人多多少少都會有啲貢獻，所以你無得咁話邊個條命貴啲，邊個條命賤啲。」高軒看似中立的回話，但明眼人也看得出是為阿Tim辯護。
Harry聽後十分不屑，立即反擊︰「唔駛咁急衝出嚟護主喎，本身都唔太Sure你係咩身份，而家睇嚟你就係最後一個PoPo。」
「我講事實啫，唔代表我就係PoPo。你啱啱嘅說話歧視成份咁高，好似白人歧視黑人咁，係人都會忍唔住話返你㗎喇。如果你唔啱聽我都無辦法，唯有同你講返聲Sorry喇，社•會•精•英。」高軒回嗆他。
「哼！」Harry除了這樣回應外，一時之間也想不到什麼說話回敬。
「好喇，大家一人少句。」這回合首度開腔的阿瑩終於打破沉默︰「去到而家咁嘅地步，我都唔介意同大家講我係中立撚，我都預告埋畀你哋知，下一Round我會轉陣營，至於由邊面轉邊面，就等你哋自己估。」
「哈，睇嚟你覺得而家仲未夠亂咁。」朱Ling向阿瑩放了一枝冷箭。
「我都係為自己爭取最大生存機會啫，唔通你啱啱嘅戰書唔係咁嘅目的咩？」阿瑩敏捷的接了這枝冷箭，再回射給朱Ling。
「大家咁話，哈哈。」朱Ling側身避開，沒有再反擊。
「無票投嘅十五分鐘好似好長時間咁，阿叔真係等到好唔耐煩。喂，傳媒，可唔可以快啲開始下一輪呀？」阿Tim大吵大鬧。
「阿警方，乜你唔駛同你啲細嘅討論吓我畀你哋嘅建議咩？」朱Ling對著阿Tim和高軒說。
「你點解要對住我講？」高軒裝傻扮懵的問。
「咪扮喇，好核突呀，係人都知你係PoPo喇。」Harry指著高軒說。
「點解要係咁隊我呢？真係唔明。」高軒無奈的說。
「其實你哋而家點扮都扮唔到，不如大方承認仲好。而家得返五丁友，其實都知道身份喇，堂堂正正嚟個正面對決仲好。」阿瑩煽動著大伙，不知道正盤算著什麼。
代表和平的綠光，照射在各懷鬼胎的人的臉上，各人也像變了鬼魂般，各種猙獰的面容令人不寒而慄，加上四圍血跡斑斑，說這裡是地獄也不為過。
「雖然我哋而家係敵對狀態，不過走出呢個門口之後就唔會再係咁，或者會終身都唔再見面，唔會再有任何交雜。不過點都好，我哋都會有生還者，對於死咗嘅人，我覺得應該同返佢哋屋企人交代返聲比較好。」阿瑩突然温情，跟剛才煽動大伙的她判若兩人。
「不如趁仲有少少時間，我哋寫定遺書，同埋放低啲屋企人一睇就知係屬於你嘅物品，到時生還者去逐一拜訪，等佢哋唔駛再白等。」阿瑩說完後，其他人都點頭同意，但卻沒有人行動。
「喂，你班撚樣做咩仲唔寫？」阿Tim問。
「咩呀？應該係你哋寫唔係我寫，反正我係最後生還者，我會幫你哋送信。」Harry說道。
「你要明先，我先係最後生還嗰個，所以應該係你哋寫。」朱Ling也加入戰團。
「其實不如你哋都寫喇，我都寫緊，雖然我用唔著，但係都照寫咗先，當之後畀屋企人講下心聲都好。」高軒亦說。
「我寫好喇，希望你哋真係會幫我送到我屋企人手上，仲有隻錶，拜託。」第一個交的是一直埋頭苦幹的阿瑩，其他四人看到後也自慚形穢，紛紛停止爭論，乖乖的寫好遺書。
「好喇，真係好温馨嘅Ending。」傳媒的聲音劃破寧靜，藍光的亮起令剛開始放鬆的眾人再次精神崩緊起來。
「我唔介意你哋有咩Agreement，但Game Must Go On，越多情感Connection，你哋只會越痛苦。不過點都好，觀眾就係最鍾意睇呢啲虐心嘅情節。」傳媒續說︰「係時候下一Round。」
