雞蛋vs高牆
已經是死路一條的嘉美對於最後十五分鐘顯得非常珍惜，縱使死亡已經是板上釘釘的事實，她依然沒有灰心，維持著她一貫樂觀的性格。
在黃燈的映襯下，嘉美的勇敢樂觀更像是天使降臨，犧牲自己，為眾人指出活路。
「我想同大家講嘅係，我心入面已經有咗指控邊個嘅人選，亦都大致分到邊個黃邊個藍，不過我哋要贏嘅話，絕對唔係就咁話團結咁簡單就得。以下落嚟我講嘅嘢，信唔信由得你，雖然只係我嘅推測，但我覺得應該離事實唔差太遠。」嘉美的遺言成功吸引所有人的耳朵。
「而家係雞蛋對高牆，你可以理解緊黃營係雞蛋，藍營係高牆，但我想講嘅係我哋成班人係雞蛋，呢隻Game嘅幕後搞手先係高牆。雞蛋要贏高牆係好難，我哋呢一刻更加無可能贏到，不過我諗大家都揾到大家共通點，就係藍集團！」當嘉美說出「藍集團」三個字後，各人都有點兒吃驚，紛紛點頭示意，這一賭是嘉美勝了。
「我哋要打低呢幅高牆簡直天方夜譚，但如果係全世界一齊呢？一個咁大嘅集團搞個咁嘅低級惡趣味殺人遊戲，你哋覺得畀全世界知道之後會點？」各人陷入沉思，沒有丁點聲音。
「所以佢搞得呢場遊戲，就要確保一定無人可以講到出去，方法只得一個，就係要有份參與遊戲嘅人全部死哂，要做到呢點，可以話係幾乎無可能，因為佢無可能控制到我哋嘅言行思想，所以佢一定要用好多手法去令我哋跟足佢劇本去做，咁先可以達到佢嘅目的。」各人聽完都覺得很有道理，但心中同時都有同一個疑問。
「我知聽到呢度，大家心入面一定有一個疑問︰『佢用咩手法令我哋跟佢劇本行？』關於呢點，我暫時有兩個推測，都希望你哋可以集思廣益，一齊諗諗。第一，間諜，喺遊戲入面有意無意咁推進劇情，令我哋入圈套﹔第二，燈光，啲燈光成日轉嚟轉去，搞到我哋眼花繚亂，頭暈暈，無哂判斷力。」經嘉美這樣一說，各人對其他人的戒心立刻增加，而且更加留意燈光的變化。
「最後我想講嘅係，如果我哋想戰勝高牆，就只有揪出間諜同盡量維持人數，我嘅死就已經係必然，無得改變，而Vanlee亦都中武肺難逃一死，所以希望大家唔好接Vanlee任何話，盡量令我哋人數維持。雖然我哋兩個都必死，但Harry係絕對可以靠大家救返，所以一陣投票，如果Harry唔係全票否決嘅話，咁投佢有罪嘅就係Spy，而呢個Spy我已經心中有數，希望大家一陣幫我全力投死佢！」嘉美這一番話，成功把各人的心凝聚在一起，然而當中的真實程度只有她自己知道。
「我都有嘢想講。」此時Harry站起來發言︰「我都好認同嘉美所講，我一直都觀察住隻Game嘅運作，亦都有留意住啲燈光變化，雖然唔知變嚟有乜用，但奇怪嘅係每次MC同Vanlee講嘢，燈光都會變做藍色，雖然唔可以憑咁就話佢係Spy，但我覺得好可疑。」
面對指控，Vanlee想立即回話，但被高軒阻止︰「Vanlee，你唔好講嘢住，因為你一講完之後，我哋就唔可以講嘢，不過放心，我唔係隊你，亦都唔係打算對你示好，畢竟嘉美講完之後，而家大家都人心惶惶，無哂互信，我只係覺得你唔會係Spy，雖然不敬，但我覺得Spy唔會疏忽到自己中武肺咁大意啫。」Vanlee雖然氣忿，但眼見是替她辯護，也忍了下來。
朱Ling也在這刻開腔︰「你要明先，嘉美嘅說話我覺得未必係事實全部，但同我嘅推論都似，不過我覺得呢度應該唔只一個Spy，始終要控制成個賽果，一個未免太強人所難，但究竟有幾多個呢？我又講唔出，不過你要明先，關於佢令我哋跟劇本嘅手法，我覺得恐懼係其中一環，不斷有人喺我哋面前爆血咁死，令我哋越嚟越驚，無哂平常嘅判斷力，盲目跟從權威，最後入劇本，畢竟當人喺無助嘅時候，都渴望有人企出嚟做Leader幫自己落決定，等自己唔駛負責任。」
「所以嗰個Leader就係Spy？」燈光突然轉藍，Vanlee脫口而出，但無人敢回話。
「可能喇，唔知呢。」燈光再次變回黃色，只有將死的嘉美敢回應她。
藍光再次亮起，傳媒透過小丑喊話︰「討論時間夠，啱啱嘅討論有好多對我哋嘅指控，真定假我唔會講，不過都好精彩，嘉美，你嘅用心我哋明，不過唔知最後成唔成功呢？作為七二一嘅犧牲品，你會指控邊個呢？」
嘉美笑著說︰「哈哈，我相信性本善，作惡嘅人不得好死，所以勝利一定喺我哋呢面。」同時她指著偉傑。
嘉美說完後，黃燈又變成藍燈，傳媒開口︰「黃絲嘉美，多謝你最後一舞，你可以退場喇。」語畢，嘉美被亂針刺頭而死，已經麻木的各人均沒有反應。
「投票時間，偉傑究竟係咪兇手？請大家投票。」紅光高亮，各人秒速決定，結果不負眾望。
「六比零，僭建驊偉傑，再見喇。」在藍光影照下，這句說話有點冷酷，不過各人都已經再沒有感覺，反而因為間諜的死亡而高興。
「唔好咁開心住，你哋仲有一輪投票，就係關於Harry，佢係被告，定唔定罪就要睇各位陪審團。」傳媒說完後，代表殺戮的紅光又亮起。
「一對四，罪名不成立，Harry當場釋放。」傳媒宣布後，Harry立刻放下心頭大石。
與此同時，另一塊大石已經同時被眾人舉起，投贊成票的間諜究竟是誰？
