三萬Thx

「而家係正式討論時間，雖然啱啱見你哋好似發現到啲嘢，但我想提醒你哋，遊戲要結束，條件依然無變，係要死淨一方陣營為止，並唔係揾到幕後黑手就結束，所以我勸你哋都係專注討論投票好啲，嘻嘻，十五分鐘倒數計時，現在開始。」MC傳媒說完，燈光便由藍色轉為黃色。

時間一分一秒的過去，但眾人的口像上了一把鎖般，始終沒有人打開話匣子，觀眾也看得不耐煩了，紛紛退出觀看，傳媒察覺勢色不對，畢竟他有著直播觀看人數的壓力，最終他還是再度開腔，藍光再次照亮整間房︰「沉默嘅大多數，我明你哋諗啲咩，不過你哋唔討論唔投票，喺度拉布，係唔會癱瘓到隻Game嘅進行。或者我一開始講規則講得唔清楚，你哋有討論有投票，最後結果兩次都相同，就會流局；但唔討論唔投票，我係會照嗰局嘅決定嚟當定案，將所選嘅人抹殺；如果之後閉眼嘅時候大家都唔合作揀人，咁即係大家決定濫炒，咁就全部都要死，零人生還，所以我勸你哋都係乖乖哋跟我嘅規矩去繼續遊戲。」

「規矩？搞笑，收皮啦你！你都識講規矩㗎咩？明明被殺嘅人係有份參與最後十五分鐘討論，最後隊一個人出嚟然後先要死，但你啱啱都無畀Andy參與討論就要殺咗佢，你呢啲係咩規矩？隨時話改就改？你叫我哋仲點信你？」岳義士LU對著小丑大吼，黃光令她有如超級撒雅人。

柒婆Vanlee亦忍不住附和LU︰「咪係，再講，投票係不記名，話唔埋你出蠱惑做手腳，令遊戲更加刺激增加收視，令到成個進程都係跟你劇本進行，我哋只不過係你嘅棋子，用完即棄，我哋係唔會再咁聽話聽你支笛！」藍光隨著Vanlee說完後便消退，房間再次被温暖的黃色燈光籠罩。

僭建驊偉傑也出聲支持Vanlee︰「我都係咁話，你話淨返一面陣營就叫贏，邊個知你有無講大話，可能你會殺埋贏家，唔留手尾。」

中立撚阿瑩都表示認同︰「邊個知我哋入面會唔會有你嘅卧底，影響大局，亂帶風向，越玩越唔對路，我哋決定罷玩！」

一時之間，群情洶湧，各人的反對情緒由LU點燃，Vanlee發大，致一發不可收拾的地步，傳媒一時之間也反應不及，「民不畏死，奈何以死懼之？」正是此刻的寫照。

可是，始終有一個人沒有動搖，正好扮演著白武士拯救了傳媒。

「遊戲係佢設計佢話事，一開始就唔存在公平，呢個係制度，你哋點推翻？問題出喺個制度呀！你哋以為走出嚟搞不合作運動就得？佢有絕對武力，而且唔駛為殺人負責，我哋有得鬥咩？而家全世界睇住佢台戲，而佢背後又有個幕後黑手做靠山，佢驚你有牙？我好肯定佢唔只得我哋呢班參加者，幕後黑手咁易捉到我哋嚟，都一定好輕易隨時揾第二班人取代到我哋，除非大家真係想濫炒，否則我哋都係跟佢講咁做好啲，最少仲保得到條命，『留得青山在，哪怕無柴燒？』有命先有後續嘅反擊，呢場係長期鬥爭。」說話的正是一直只為保命的醫護Harry，他的一席話令在場的人再次沉默。

數分鐘的死寂，體感卻仿如數年，最終再次打破沉默的是G鋒朱Ling︰「無錯，Harry都講得啱，嗱，你要明先呀，我哋要結束隻Game，就要認真玩，最後留低幾多人我哋唔知，但只要仲生存嘅人幫我哋發聲，我哋就仲有機會拎到最終勝利，將一切都託付畀最後生還者啦！」

眾人在Harry和朱Ling的當頭棒喝下，再次進行遊戲，傳媒見狀，也開口道︰「睇嚟你哋終於諗通，咁就請你哋繼續為觀眾帶嚟精彩刺激﹑爾虞我詐﹑勾心鬥角嘅遊戲啦！」藍色燈光之下，傳媒的說話在眾人心情平伏之後顯然有很重的份量，各人再次投入遊戲之中。

「啊，不過有樣嘢要提返你哋，啱啱你哋已經浪費咗七分二十九秒，所以你哋都係得返七分半鐘左右時間討論，無補時，哈哈哈。」隨著傳媒的笑聲在大氣中消失，燈光再次轉黃，屬於參加者的討論時間依然在倒數。

而這次的無聲抗議之後，令到參加者更加認清事實，當中有些人更產生了變化，對整個生存遊戲更加投入。

這次先開口的是PoPo阿傑︰「既然而家時間無多，不如等我總結一下，啱啱Andy就隊阿Tim出嚟，我無異議，因為Shirley同阿Moon都講得好清楚，而事實證明Shirley的確做咗好多正確推理，為我哋解決咗好多難題；而阿Moon話自己係起底組，咁我都信佢嘅，一嚟佢唔似識講大話，二嚟遊戲過咗咁多回合，都仲未有人出嚟認投，咁我就當佢係堅，但只怕我信錯人，畢竟佢呢Type人習慣隱藏自己……」阿傑的言辭表面是挺阿Moon，實際是暗踩她一腳，令大家增加懸念。

而另一位PoPo高軒也搶著說︰「根據傳媒畀我哋嘅資訊，起底組的確仲喺遊戲入面，所以阿Moon出嚟認係無問題，只不過佢計漏咗一樣嘢，就係真正嘅起底組仲生存緊。本身我都想留到最尾先講，但為免大家被佢呃，我唯有同大家講，我係起底組，阿Moon我之前查過，係僭建驊，而柒婆就係阿瑩。」

「喂，你唔好尻噏喎，我唔係柒婆，唔好見我係女就話我係先得㗎，Game嚟喳，角色嚟喳，同性別無關㗎！」中立撚阿瑩激動的反斥。

「唔好信佢，我先係真正嘅起底組，佢係假嘅！佢肯定係想我死先話自己係。」起底組阿Moon越接近死亡，口齒及思路越清晰︰「佢一定係想保住阿Tim，我話佢九成九係PoPo之一，成個動機都好明顯。而家得返十一人，基本上五五開，而中立撚究竟企喺邊面真係無人知，如果今Round投死咗一哥，咁就變成黃營五對藍營四，係一直搞唔清中立撚立場之下，之後嘅投票對佢哋嚟講會好不利。但如果保住一哥，下一輪投票就變成藍營五黃營四，最Worst情況都只係五對五，但如果有人信咗佢啱啱嘅生安白造，就有可能變成藍營佔多數票嘅局面，最終黃營再失一人，最後實輸。」

「只不過，」藍燈亮了，開口的是Vanlee︰「如果高軒係講真，而阿Moon係講大話呢？咁啱啱佢講嘅嘢就成真，藍營坐大，我哋黃營就無得翻身。」

每次Vanlee開口的說話都很有份量，令在場的人無不陷入思考的死胡同內，而黃燈又再度亮起，燈光的變換令各人雙眼感到疲倦，加上不斷的思考，以及高度的生存壓力，眾人皆身心俱疲，只想快點完結。

「咳咳，循例我都要為自己講兩句。」一哥阿Tim趁眾人思考時開腔︰「如果你哋班撚樣堅持要話我係一哥，無問題，即管投票，最後損失嘅只會係你哋自己。不過我想講嘅係，真正嘅一哥你哋揪唔到出嚟，咁就只會繼續面對死亡威脅，現階段少一個人對戰果影響都相當巨大，逆轉勝係睇呢一鋪，做人做狗自己揀！」

阿Tim為自己辯護的說辭相當霸氣，但言之無物，各人也沒有多加理會。

此時，黃絲嘉美也搶著說︰「我有個決定性嘅Point可以……」

未待嘉美說完，燈光再次亮起藍色，傳媒經小丑喇叭大聲宣布︰「討論時間結束，好可惜你哋開頭嘥得太多時間，搞到嘉美想講關鍵說話時唔夠時間，無計嘅，呢個係你哋嘅選擇。」各人被突然插入的傳媒顯得十分不滿，但也無能為力。

「而家係投票時間，阿Tim又再次企係鋒口之上，究竟今次佢會再次大步檻過，定眾望所歸，無得留低呢？請投票。」

紅光令人想起血腥﹑暴力﹑殘殺，在紅光之下投票，令各人的殺人慾望不其然飆升。

「結果出嚟，竟然係五對五，好難得，咁睇嚟要投多次票，不過投之前，畀阿Tim講兩句嚟辯護先。」藍光轉成黃光，傳媒把話語權交給阿Tim。

「多謝大家對我嘅不殺之恩，兩次都畀人隊，我都唔知大家點解咁撚憎我，不過無撚緊要，我會繼續玩落去，成為勝利者，幫大家報仇。」阿Tim的辯護依然是廢話。

「好，多謝阿Tim，請大家再次投票。」藍光又再轉為紅光，投票又再開始。

「六比四，六票認為阿Tim係兇手，對唔住喇阿Tim，雖然唔知邊個點解會改變想法，但犯法就係犯法，除非你係警察，所以，請揀一隻代罪羔羊喇！啊哈哈哈哈……」藍光下傳媒的魔性狂笑，暗示著阿Tim不是一哥就是柒婆，而這亦為黃營勝利帶來曙光。

「真係估你唔撚到，竟然臨時轉軚？不過好彩我無事，唔好撚畀我知你係邊個，死撚緊。我揀佢喇。」阿Tim指著阿傑，在黃燈下，阿傑卒不及防，鮮血便從頭顱內噴瀉出來，血腥味充斥整間房，而這次，傳媒並無宣布被殺的人的身份。

「事不宜遲，下輪投票，阿Moon究竟有無罪？開始。」傳媒冷冷的說，完全對屍首還暖的阿傑視若無睹。

然而，對死亡司空見慣的眾人，在紅光的加乘下，也沒有多想，只專注於投票。

「由啱啱嘅投票睇嚟，中立撚應該係藍營，不過第二次唔知點解會轉軚，唔通佢想轉嚟黃營？咁我咪唔駛死？太好喇。」阿Moon心裡暗喜。

「結果出嚟，五對四，罪成，起底組阿Moon，多謝你精彩嘅謝幕演出。」傳媒宣布結果。

「點解會咁？中立撚唔係轉軚過嚟黃營咩？」這是阿Moon的遺言，針亦在她說這話的同時刺進她腦內，即時死亡。

「遊戲真係刺激，去到呢一刻已經白熱化，究竟最後邊面會贏呢？得返九個人，下Round究竟邊個會死？」隨著傳媒的帶領，遊戲已經進入直路，但賽果依然難料。