第四日•晚

「噹！噹！噹！噹！噹！噹！」隨著教堂大鐘響徹雲霄的六響後，時間也終於迎來六時。勞動完一輪，出了一身汗，著實有點疲累，但和96號的約會我並沒有忘記。

我三步併作兩步，連跑帶跳趕到教堂前，96號已、24號、49號和72號已經到了。

「真係唔好意思，要靚女等我，真係失敗。」我先行道歉。

「唔緊要，我哋都係啱啱到喳。」96號說。

「介唔介意揾個位坐低再傾？去你度？」我要澄清一點，在我說這話時並沒半點非分之想。

「又好，跟我嚟。」96號爽快答應，可能只有我自己想多了。

走了數分鐘，經過公園後，便到達她們的住處。Paradise住屋設計有點像大學宿舍，是依性別分開做兩棟大樓，一梯五伙，每伙住兩人，共兩層，每層都設廁所和浴室，是共居的概念，男女可以到對方的宿舍聊天作樂，唯晚上九點休戰期開始，除了當天負責搜索食物的男丁外，其他人都要回自己的房間向神洛基報告自己當天的事情，不能外出，之後便要睡覺，直到早上六時休戰期結束為止。

「呢度就係我同24號間房，49號同72號間房就喺隔離。」96號向我介紹她們的房間分佈後，便邀請我入去。

我找了個位置坐好，而她們四個也接連坐下，圍成一圈，真的有點像迎新營玩新丁的環節。我也無暇理會，因為只有約一小時時間，接著便要晚飯，所以要抓緊開始發問，畢竟想知的有太多。

「平時六點個天都已經開始黑，但今日六點個天都仲咁光嘅，真係好神奇，唔知係咪神洛基嘅庇佑呢？」用天氣做開場白是最自然最常用的導入方法。

「嘻嘻，你真識講笑，平時六點個天都係咁光㗎喇，七點先會開始入黑，乜你平時無留意時間咩？」49號率先搶答：「放膽啲得嘅喇，大家都係神洛基嘅信徒，就好似兄弟姊妹咁，唔駛覺得尷尬，有咩唔明直接問就得。」

既然她這樣說，我就恭敬不如從命：「你哋點解會加入神洛基教？」

她們聽後面面相覷，最後決定由72號作代表回答我：「因為我哋都唔想死，又唔想殺人，只想安安穩穩咁生活。始終我哋本身都係普通城市人，除咗吃喝玩樂同返工返學之外，根本就無咩要求，更加唔好話殺人，我哋都唔係心甘情願咁嚟，只係想有返原本生活，嗰時聽完代行者講，我哋就決定信教加入，希望生活可以重回正軌。」

「原來係咁，但係你哋唔怕代行者係講大話，等機會嚟到,一次過打沉哂你哋，等自己贏咩？」

「一定唔會，代行者唔係咁嘅人。」四人不假思索、異口同聲同時回答，堪稱神通步，看得出她們是真信代行者，真信神洛基，他的洗腦能力真強大。

「點解你哋會咁肯定？」我追問，試圖找出破綻。

「因為我哋都見過佢行神跡，所以好確信佢真係神洛基選中嘅代行者。」24號回答。

「咩神跡？」我禁不住好奇心，即使我的貓可能會被我害死也在所不惜，雖然我並無養貓。

聽到我的問題後，她們四人的樣子立即變了，變成迷妹，雙眼充滿敬畏和回味，完全陷入回憶的世界，我們有一個比較生動直接的說法形容這一狀態的人──「諗樣」。

良久，她們終於從回憶回到現實，開腔告訴我神跡所謂何事：「呢件事發生喺我哋入嚟Paradise當晚，我哋本身對神洛基教都係半信半疑，而佢都好清楚我哋嘅疑慮，於是喺當晚，佢召集哂所有信徒去到廣場海賊旗前面，行咗一個唔會被打沉嘅神跡。」96號說到這裡停了下來，就像在等我發問一樣，但我並無意慾問問題。

24號見狀，立即接下去說：「嗰晚，代行者著咗件63號嘅衫，同大家宣布可以任意打沉佢，佢有神洛基保護，絕對唔會有事。起初啲人都議論紛紛，但就係無人夠膽去打沉佢，直到……」

「直到我做第一個。」49號搶著說：「我走咗去海賊旗度，掂住個木桶，大聲咁講：『打沉63號！』代行者竟然無穿無爛仲企喺我面前。我以為我講得唔啱，於是又講咗幾次，但代行者都仲係若無其事，繼續同大家有講有笑，我就知道佢真係神洛基選中嘅代行者，唔係吹水。」

「其實會唔會係個海賊旗同木桶有古怪？」我問。

「一定唔會，因為我哋曾經試過一次公開處刑，由代行者監督執行，而行刑就係用廣場嗰個海賊旗同木桶。所以個海賊旗同木桶係絕對無古怪，只係代行者有神洛基保護先至無事。」72號堅定的說。

「好，明白，但我記得代行者講過佢感化哂所有遇過嘅人，點解會有呢次處刑？」我又再次殺死了貓。

「因為嗰個係我哋全Paradise人都一致要求佢需要直接見神洛基先淨化到，所以拜託代行者送佢去，於是代行者經神洛基指示，任命咗一個臨時執行者去送佢走。」24號搶回發言權。

「咁死咗嗰個人係咩原因要死？係幾多號？而執行者又係幾多號？」我的問題依舊很多。

「去見神洛基嗰個幾多號真係唔記得，至於執行者就唔方便透露。但你話咩原因，就真係好長篇。」72號說。

「簡單嚟講係背叛！」96號凶狠的說：「嗰個人背叛咗大家，背叛咗神洛基，所以要徹底淨化佢。」

「無錯，」49號補充：「佢竟然聯同外人，想偷偷哋放人入嚟打沉哂我哋，自己劃地為王，好彩代行者洞悉咗佢奸計，先下手為強捉咗佢，然後召開全Paradise大會將佢嘅罪狀昭告天下，再由大家投票決定點處置，最後大家決定用呢個最仁慈嘅方法令佢可以改過自新。」

這群人就像史丹福監獄實驗般，產生了路西法效應，用自己的方式去演繹實踐自己的正義，但這方式其實是惡的，但他們意會不到，又或者是群眾力量把罪惡感都分散了，看來整個Paradise的人都中毒太深，這個代行者真的很厲害，只消三、四天，便令神洛基教的信眾都變成墮天使。

「但你哋話嗰個人想背叛，有咩證據？」我仍然嘗試找回她們的理性。

「代行者話係就唔會錯，因為佢係神洛基嘅使者，唔會講大話，我哋百分百信佢。」24號說話的眼神和語氣也十分肯定。

「咁……真係無人試過用廣場中央個海賊旗同木桶打沉過其他人？」我再三確認，但她們依然是搖頭。

「諗都唔好諗，只有被選中嘅人先用到，唔係會招嚟厄運。」72號小聲說，生怕門外有人偷聽。

「此話何解？」我不解。

「我都係聽人講，畢竟我哋唔係第一批信徒，好似話之前有人試過偷偷地用，點知當晚佢出去揾嘢食嘅時候就無再返過嚟，無人知發生過咩事。」72號續說。

「咁迷信？」我衝口而出。

「寧可信其有，小心啲好。」72號告誡我。

天色開始漸暗，大鐘也敲響了七聲，宣告晚飯的來臨。

「其實點解九點後唔可以落樓，一定要喺屋入面？」我邊行邊問。

「因為出面會有怪物。」49號給出一個令我匪夷所思的答案。

「咩怪物？」我問。

「專殺人嘅瘦長鬼影。」49號壓低聲線，故意營造恐怖感。

「Slender Man？都市傳說都出動埋？」我心想，之後裝成受驚嚇般再問：「有無人見過？唔叫代行者消滅佢？」

「見過嘅人都死咗，我哋都係聽代行者講，佢提醒我哋千祈唔好出去。」隨著49號的回答，我們也到了教堂飯堂準備吃晚飯。

「估唔到呢個代行者咁識玩弄人性弱點，又心理控制又都市傳說，令班人長期置身高壓同恐懼之中，方便管治，而且嚟到之我硬係有啲唔慣，唔知點解，睇嚟呢度比我想像中有更多秘密。」我心想。

接過晚飯，祈禱過後，便開始進食。可能下午勞動完，所以感覺特別餓，一輪狼吞虎嚥之後，肚子有點撐，是要去廁所的徵兆，放好餐具後，便向最近的廁所進發。

廁所離教堂只有數十米，雖然三十多人共用，但出奇的乾淨，看來他們的公民意識不是一般的高。洗手盤上並無鏡子，取而代之的是一個個細長的小窗，廣場的景色一覽無遺，而窗上面有海賊旗裝飾，洗手盤下則有大木桶收集污水，再作處理。

晚飯後是自由時間，我也閒著無事幹，在Paradise內到處閒逛，抱著或許會遇到Slender Man的心態走著，最終當然什麼也遇不到，而時間亦快到九點，要先回宿舍，再想辦法調查九點後的Paradise。

「噹！噹！噹！噹！噹！噹！噹！噹！噹！」連續九聲鐘聲，休戰期來到，但好奇的是除了鐘聲外，我竟然聽不到熟悉的WKY休戰期公告聲，這隔音未免太強了吧？

我躺在床上思考今天收集得來的情報，還未理出什麼來，竟不知不覺睡著了，睡夢中好像聽到門外有聲，但實在太睏了，四肢也無力，擾攘了數分鐘也就靜了，我也未有多加理會便繼續睡。