第一日•午

補充完體力後，我拿出地圖，嘗試和18號找出現在的所在地，也順道問她早上的經歷。

「我諗我哋應該喺呢度，喺島嘅南部，因為我啱啱行過嚟嗰時有見過呢個怪石像同埋瀑布。」18號言之鑿鑿，我深信不疑。

「如果係咁，根據規則同埋地圖嚟睇，我哋應該要向北行，向住嗰座山行，咁即使收圈我哋都唔駛怕。」以上是我食雞的經驗累積而來。

「千祈唔好去嗰面！」18號反應很大，情緒很激動，我下意識流露出有古怪的表情，不過只維持了零點幾秒，但她仍然察覺得到，於是補充：「無……我只係覺得嗰面會有危險啫……」

雖然我聽得出她有所隱瞞，不過我也不打算追問，適當的裝傻有助活命，所以我改口：「嗯……女仔啲第六感好準嘅，既然你覺得嗰面有危險，咁我哋向森林個方向行喇，有多啲cover會安全啲。」

「但係會唔會有野獸食咗我哋㗎？個WKY話森林會有呢啲嘢，我驚……」18號原來凡事都很小心，或者換個角度來說是杞人憂天。

「咁都好難講，始終係森林，有都唔出奇，但點都好過行呢個平原。喺地圖見到，呢個平原無任何遮擋，同將自己雙手奉上畀人打沉無分別，咁樣會好危險。」我試圖說服她，但她用一個楚楚可憐和水汪汪的雙眸仰望著我。

「喂，同你講明先，你咁樣望住我都無用嘅，我係唔會同你揾命搏。」我立場依然堅定。

半小時後，我和18號在大平原中並肩而行，為什麼？因為我敗給了她的樣子。

「好曬呀、好熱呀、好口渴呀。」18號的港女性格開始顯露了。

「我都話行森林㗎喇，你又堅持行呢度，曬同熱就幫你唔到，水就仲有啲嘅，不過你唔好飲哂，因為唔知邊度有安全屋同補給。」我把水遞給了她，她一飲而盡，明顯對我的善意提醒充耳不聞。

「係喎，今日見你行過嚟嗰時左搖右擺咁，你朝早遇過啲咩事？」我好奇的問。

「今朝？」明顯她說這句時仍然心有餘悸：「我見到有人被人打沉咗，個場面好恐怖，周圍都係，我好驚，之後就癲咗咁跑，最後跑到無咩力，之後就遇到你。」

「周圍都係？都係啲咩？」我被她的說話勾起了我的好奇心。

「周圍都係血肉，爆到周圍都係，有啲畀動物食咗……」她越說越崩潰，我只好制止她。

「好喇，而家無事，唔駛驚，我會保護你。」我安慰她說。

「嘭！」前方不遠處突然傳出爆炸聲，18號嚇得立即蹲下摀著雙耳，大叫：「唔好呀！」

我還未弄清發生什麼事，便接連再傳來兩聲「嘭！」18號已哭成淚人。

「9號、26號、68號被打沉，9號、26號、68號被打沉，1號有三個打沉數。」隨著機械聲的公告，我終於知道爆炸聲是代表什麼，亦知道18號這麼害怕的原因，無他，看到爆炸令血肉橫飛，正常人也會有陰影，是人之常情。

我跪坐在地，用手揉著她的頭說：「唔駛驚，你唔會有事嘅，我已經諗到點令你安全嘅方法，你一定可以生存到最後，信我。」說完我對她做了一個充滿陽光的笑容，但她反而哭得更厲害，不過我絕不會承認是我的笑容燦爛得太恐怖而令她哭得更大聲。

「睇嚟前面有一個埋舟位，而短時間可以打沉三個人，除咗嗰面好易匿埋之外，好可能會有一個令人聚集嘅場所，或者安全屋會喺嗰度。」我自言自語的推理道。

好不容易止住哭聲的18號擦乾淚痕，拉著我走到前方巨石處躲藏，她從我口袋裡拿出乾糧邊吃邊說：「你話前面會唔會有安全屋？如果有嘅話，我哋係咪九點之後先去會比較安全，而家喺度匿埋好啲？」

其實她說的也不無道理，畢竟前面一瞬間有三人被打沉，再往前走也很危險，九點後去無人可以攻擊，以安全計是最好做法，但當中有太多不確定因素：如果喺等休戰期到嘅呢段時間遇到其他人點算？會唔會附近都有海賊旗可以打沉我哋？如果前面原來無安全屋咁點算？以現有物資以及18號的消耗速度，恐怕不能捱得到明天；如果真的有安全屋，但我們比其他人遲進去，補給會不會已經被一掃而空？屆時我們依然捱不到明天……

一想到這一大堆不明朗因素便頭痛，所以結論是：向前挺進！但要顧及18號的情況，要哄她前進不容易，所以只能對她撒一個謊，要騙女人真是罪過。

「我啱啱好似聽到啲聲，我哋快啲向前行喇，唔好喺度停留。」我騙她說。

「但我咩都聽唔到喎。」她肯定的回答。

「你喊緊當然聽唔到啦，你啲喊聲都遮蓋咗啦。」我扮作很有理據的說：「繼續留喺度好易畀人揾到，雖然未必打沉到我哋，但係搶走我哋啲物資都已經夠令我哋死，我哋去前面，前面有樹林，匿埋都易啲。」我嘗試說服她，但她還在猶疑。

不過幸運之神似乎很關照我，在我們走來的平原盡頭處，有兩個糢糊的人影出現，正朝我們所在的方向跑來，18號見狀後嚇得拉著我急急向前奔跑，不枉我每日都給耶穌上香。

越近樹林，越能嗅到血的腥臭味，畢竟不久前這裡才發生過一輪屠殺，但與此同時，安全屋的輪廓也漸漸出現在我們眼前，果然安全屋在這裡，難怪人們會前來聚集。

在樹林前，我煞停了腳步，18號也差點仆到，她轉身以眼神問我為什麼停下腳步，我用口型回答她：「1號可能喺度埋伏，要小心。」

我們選了一棵樹作根據地，開始小心探索附近地方，終於在離安全屋不遠處發現了海賊旗，然而這令我察覺到危機的存在。

「呢間安全屋一啲都唔安全，我哋小心啲。」我對18號說。

「點解？」她不明所以。

「如果我哋聽朝六點仲喺間屋入面，實死無生，我估計最遲五半要走，唔係就玩完。」我直接說出結論，省略了解釋，然而她始終不明白。

「即係咁，離間屋唔遠就有海賊旗，即係如果有人一早喺海賊旗度埋伏，等六點休戰期完結，啲人一離開畀佢見到，佢就可以逐個打沉，所以要走就趁休戰期完之前走，唔係就死梗。」我最終都是要解釋一次。

「哦，咁我哋早啲走咪得囉。」她的結論終於和我的一樣，可喜可賀。

「不過而家我哋要小心，因為間屋未開門，而1號好可能仲喺度埋伏緊，加上有啱啱喺後面嚟嘅兩個追兵，腹背受敵，我哋要諗吓計。」雖然口這樣說，但其實我並沒有任何計謀。

我們藏匿在草叢後，海賊旗和我們相隔大約一百米，仔細觀察一段時間後，依然一直看不到其他人的影蹤，於是我便告訴18號之前提到確保她安全的方法：「你掂住海賊旗，警戒住周圍，一見到有人嚟就打沉佢，咁你就唔會死，因為無人可以埋到嚟打沉你。」

「咁你呢？」

「我去做誘餌。」

「即係你引啲人嚟，我負責打沉？」

「Bingo！你真醒目。」

「好啦咁，我等你。」

確保18號安全後，我便去找剛才追趕我們的兩人，對手少一個便少一個，勝率自然會提升，但他們究竟去了哪？我往入口處走去，沿途仔細觀察，可惜還未找到。突然，遠方傳來求救聲，我立刻飛奔走去，見到兩個男參賽者──2號和60號，正聯手想撕暴編號86號的女參賽者，規則並無說明不可這樣做，而附近亦沒有海賊旗，不可打沉他們，所以他們才如此肆無忌憚的做這種事？

雖然規則沒說不可用武力解決問題，不過一對二，勝算估計是沒有，唯一辦法是引他們去18號處打沉他們，決定了，就這樣做。

「喂，你哋兩個快啲停手！」我大聲喝止，不過和他們保持超過五十米的距離，確保有足夠時間逃走。

兩人停手回頭看我，而86號那女的乘機掙脫跑過來，2號和60號兩人見狀立即發了瘋似的向我襲來，幸好有安全距離，我轉身就跑，身後有三人正跟著我，按照計算，我絕對可以安全到達18號處，然而意外總會發生。

「啊！」身後的86號慘叫一聲，整個人跌倒在地，拖了一條數米長的拖痕，而兩個男的也亦步亦趨，差點捉到女的，我顧不得自身安危，跑回頭想扶起她再度展開步伐，然而這正是我棋差一著的地方。那女的不但沒有起來，相反，她把我也一併拉跌在地上，那兩個男的立即撲在我身上，用樹藤把我牢牢的縛著。

我王家欣英明一世，萬萬也想不到他們三人竟是一伙，演了一場戲來引我上當，栽在他們手上我也只好認命，是我想作好人才會有如此下場，但其實我並未完全落敗，因為我也有同伴。

他們拖著我往海賊旗方向走去，看來他們一早已經熟知地形，這正合我意，因為我的同伴正好在那，他們是把自己推向死亡。

穿過叢林，海賊旗就在眼前不遠處，的而且確是剛剛我命18號看守的那一面海賊旗，但人呢？走了？背叛了？我的命就此完了？有人說臨近死亡，往事就會像走馬燈一樣在眼前放映一次，我也一樣，但我的走馬燈很奇怪，一開始便是這場遊戲開始的時候，而非我小時候發生的事，但我也沒有時間去想這麼多，因為海賊旗就在我前面。

「打沉……」一把女聲說話，我合上了眼不敢觀看，以為這樣可以逃離現實，死亡便不會來臨。

「2號，打沉60號，打沉86號。」女聲說完，偏偏遺留了11號，而同時我左前方、右前方和身係連續三聲「嘭！」就像環迴立體聲一般非常震撼。

「2號、60號、86號被打沉，2號、60號、86號被打沉，18號有三個打沉數。」

是18號！是她救了我。