謝幕

時間：星期一早上

地點：Tracy沙田家中

人物：Ming爺、Tracy

場景：Tracy和Ming爺在通電話

在灰姑娘事件一日後，Tracy躲在家中，沒有上學。

「Under The Sea Under The Sea……」正在瀏覽網頁的Tracy被突如其來的電話嚇了一跳，看了電話螢幕後便接聽。

「點呀老世？今次有咩可以幫到你？」

「變得咁輕佻嘅？有名有利就囂？」話筒另一面傳來Ming爺的聲音。

「唔敢，今次唔係多得你，我邊有咁多發揮機會，又邊可以著到咁多靚衫靚首飾、坐到靚車靚船、食到靚嘢、睇到靚景？你係我恩人，我點敢唔尊重你。」

「講笑啫，尾數我都過咗畀你喇，應該夠你去嗰面專心讀書，封推薦信我都搞掂埋，睇吓你幾時過嚟拎埋。」

「真係唔該哂你呀，你真係我人生嘅伯樂，我學成歸來一定會好好報答你。」Tracy差點隔著電話跪地叩頭道謝。

「唔駛咁誇嘅，你專心讀書，入Dean’s List就得喇，其他有咩需要再話我知。」

「好呀，唔該哂，其他我都唔敢再麻煩你，我會自己諗辦法。不過有個問題我一直好想問，點解會揀我？」

「你到而家先問？我以為你唔問添。其實無咩原因嘅，只係喺啱嘅時候遇到啱嘅人，就係咁簡單。」

「點解你覺得我係啱嘅人？」這令Tracy一下子糊塗了。

「記唔記得嗰日喺Lecture Hall門口你被人開門撞到？」

「記得呀，勁痛囉PK，嗰條友撞完我仲要唔扶返起我，求其講句對唔住就跑走咗，畀我知係邊個一定鬧鬼佢，係你Gentleman扶起我睇我有無事喳。」Tracy回憶起這事仍然有點忿怒。

「哈哈，嗰個人你都識嘅。」

「唔通係……」

「Bingo，你估中咗喇。就係因為咁，所以你就係Right Time Right Person。」

「都係唔明。」

「我用咗少少心理手法。其實嗰次Terence撞到你之後，你已經留咗係佢腦入面，我只要不斷係唔同地方唔同時間同佢做心理暗示，等佢見到你嗰時就會有一種『啊！就係呢個人！』嘅感覺。不過當然都要你肯配合嘅，好彩你又肯幫我手，而且又好戲，先令到Terence份FYP可以順利完成喳。」

「咁你又資助我去讀書又畀機會我出鏡成名，雖然我都考慮咗一晚，邊有咁大隻蛤乸隨街跳，但見你咁Gentleman，應該係好人，而且又咁有誠意邀請咗我成晚，所以先畀面你應承喳。By The Way，其實你真係對佢好好，你係咪Gay嘅，乜都為佢諗好鋪好嘅？」

「頂你喇，我一定唔係囉好無，只係同佢識咗好耐，經歷過大家嘅人生高峰同低谷，係超級好兄弟喳。」Ming爺連忙澄清。

「但係你同我講成個Project時我真係好驚訝，估唔到你咁有財力，而且肯為咗一個朋友動用咁多人力物力同關係，你同佢真係無嘢？」

「都話無囉，真係無你咁好氣。講真，嗰啲都只係小事，最緊要係佢肯認真去做一件事，當呢個態度成為習慣，咁我就覺得足夠。」

「真偉大，果然有錢就是任性。不過真係想像唔到，佢以為我係被玩嗰個，但一直真正被蒙在鼓裡嗰個係佢，你真係高手。」Tracy佩服萬分。

「耍小小手段咁啫，你唔好踢爆我就得喇。不過講犧牲，我覺得你先係最大犧牲嗰個。一開始係Canteen咁多人要你特登著到咁柒，為咗要連戲之後都咁上下打扮，你一定被人笑咗好耐，仲要到最後掛住一個貪錢死港女污名，真係辛苦你。」

「係呀，好慘嘅，所以諗諗吓演出費要加碼，嘻嘻。」Tracy調皮的說。

「講呢啲？不過話時話，經歷咗前日一整日由我安排嘅行程同Terence嘅情話，你有無啲咩感覺？我見今次Terence就瀨咗鑊甘，佢沉哂船。」Ming爺問完後，電話另一面靜默了良久。

「喂？Tracy？收唔到？」Ming爺甚至懷疑是否訊號不良。

「喂？Sorry，啱啱諗緊嘢。你覺得我有無？我係專業專業演員嚟㗎嘛，哈哈。」Tracy無正面回答。

「係呀？如果唔捨得可以唔走嘅喎，我開口校長實收返你。」

「唔駛咁麻煩，邊個話我唔捨得呀？無啲咁嘅事，我不知幾開心，終於可以實現我夢想。」

「如係真係咁就好。」

「係噃，條片啲View數點呀？」

「幾好呀，Up咗一日，而家有萬三次點擊，Like數同Follow都多咗幾千。我都順手將你啲精彩鏡頭Cut咗出嚟，Send咗畀我幾個相熟嘅導演、監製，佢哋對你都幾有興趣，遲啲可能會揾你Casting，到時經理人記得揾我做。」

「一定，哈哈，條片受歡迎就好喇。咁我都睇埋啲機票同住宿嘅嘢先，Keep In Touch，拜拜。」

「Ok，拜拜。」Ming爺掛了線。

「條片受歡迎就好喇，Terence。」Tracy默念著。

❨女士結局❩