第七幕

時間：星期六早上

地點：九龍塘Ming爺的家、中環、銅鑼灣、尖沙咀

人物：Terence、Ming爺

場景：正式進行灰姑娘計劃，到各地點取物品。

早上九時三十分，Ming爺的房門被人猛然打開，睡夢中的Ming爺被猛烈的碰撞聲嚇醒了。

「喂，你仲瞓緊？搞錯呀，今日係我人生最重要嘅日子，而家已經九半，你點可以仲瞓緊？」Terence揪著Ming爺的衣領試圖搖醒他。

「你條友仔，平時返學又唔見你咁準時，我一早已經準備好喇，你畀幾分鐘我梳洗換衫先，你落去食早餐先喇。」Ming爺打著呵欠說。

十分鐘後，Ming爺換了一身侍應裝扮，同時手拿著一套名牌西裝從二樓走下來。

「快啲換咗佢，鞋我都準備埋，著返套戰衣先得嘅。」

「哈，果然係計劃周詳，我即換。」

「個呔夾有個針孔攝錄機，有啲鏡頭要靠你拍。車入面我都裝好哂Cam，前後左右零死角，實拍得靚。」

換裝和早餐過後，時間剛剛到十點，由車庫駛出白馬戰車，宣告今天的作戰正式開始。

「Action！」Ming爺拿著手提電話拍了白馬王子出動的一幕，然後揮手向Terence說再見。

「Hi，各位粉絲觀眾，今日係我哋年度鉅製──Project Cinderella，灰姑娘計劃正式執行嘅日子，我會全程親身上陣，將珍貴鏡頭呈現係你哋眼前。啱啱見到我呢部戰車係咪好型呢？都係多得我拍擋Ming爺，我都係第一次揸呢啲超跑，真係Dream Car。講返正題，首先第一站係去中環，我要先去拎條裙畀女主角遲啲換。」Terence對著鏡頭滔滔不絕，完全沒有怯場吃螺絲：「可能你哋會對今次呢條大堆頭整蠱片有個疑惑：點解叫灰姑娘計劃？其實好易理解，但我而家唔會係度同大家開估住，不過有聽過灰姑娘呢個故仔嘅粉絲應該會估到啲，不過我都唔劇透住，結局包你哋有驚喜。而家專心揸車，轉頭見。」

十時十五分，Terence準時到達中環某名牌服裝店前。

「我而家去拎條裙先，大家跟住我嚟。」

他泊好車後，便轉用針孔攝錄機拍攝，到店內收銀處向職員表示來取預訂好的衣服後，店長便立刻急步走來熱情招呼，裙很快便拿來，循例檢查完便拿回車上繼續下個行程。

「其實啱啱Check條裙嗰時，我都唔知係咪呢條，我同你哋一樣都係啱啱先第一次見到，不過望落都幾得，著上灰姑娘身上實好靚。大家有無順便留意埋我件戰衣？係法國名設計師設計，修身、舒服、方便活動，著咗上身，自己都覺得自己型咗。」

不消一會，車已經到了銅鑼灣，經過一輪左轉右拐，終於停在了鞋店前，這是一間明星鞋店，城中名人都愛在這買鞋，每雙鞋也價值不菲。

「好喇，各位粉絲，我哋話咁快就到咗鞋鋪，呢間聽講係名人明星最愛幫襯嘅鞋鋪，我哋睇睇啲價錢，」Terence隨手拿起一對看似平凡的鞋，看了一下價錢牌，然後連忙放回原處，嚇呆了說：「What The Fuck！對咁嘅鞋都要成十皮，我真係唔敢掂，整污糟咗要賠都唔知點算，都係快啲拎埋對鞋走人。」

Terence向店員示意來取鞋，店員便禮貌地請他坐下，同時向倉內的同事說出鞋的編號，前後不到三十秒，鞋便送到Terence手上。他打開檢查了一下，便放回盒內帶上車。

「真係嚇餐死，買幾對鞋都夠畀首期，有錢人世界真係唔簡單，我呢對皮鞋都唔野少，但都敵唔過嗰間鋪是但一對鞋，Crazy。但係一諗到呢啲衫同鞋今晚嘅下場，我就覺得好心痛，不過為咗大家，呢啲付出係值得嘅，而家我哋要去埋尖沙咀拎首飾先。」

「而家時間係十點八過啲啲，比本身預期嘅時間早咗少少，但我哋已經到咗金鋪，不過佢仲未開門，應該點算？」Terence在車上煩惱了數分鐘，最後決定下車去拍閘嘗試。

「有無人呀？我係約咗時間嚟拎首飾㗎。」Terence拍著捲閘，發出沉厚的金屬撞擊聲，但並沒有人應門。

「弊喇，我哋而家遇到第一個挫折，原定呢個時間拎首飾，但佢竟然無人係度，時間慢慢流失，究竟我係繼續等定Skip咗佢直接去揾灰姑娘？」

正在混亂之際，金鋪的捲閘徐徐捲上，有一個老人家由半開的閘下探出頭，Terence看到後立即大叫：「我係嚟拎首飾㗎，之前訂左。」

老人聽後點了一下頭，招手示意他進店內等候。

老人在夾萬內拿出Ming爺預訂了的首飾讓Terence查看，金光閃閃加上鑽牙閃爍再配合名珠寶設計師的設計，完全把其幽雅貴氣表露無遺而不覺俗套平凡，Terence一度不能張開眼直到把首飾的盒子關上。

「好，要拎嘅嘢都拎哂，時間係十點十，仲係預計範圍之內，係時候出發去沙田接灰姑娘。」