第六幕

時間：星期四全日

地點：計劃中的各個地點

人物：Terence、Ming爺、管家

場景：Terence和Ming爺兩人為星期六的拍攝作彩排

「嘩！呢部車真係不得了，我係女見到都出哂水，估唔到你真係班到返嚟。」一大早Terence便讚嘆不已，無他，只因出現在他面前的是一隻現代白馬──法拉利──的最新型號超跑，雪白的車身配上極富速度感的藍色拉花，在流線型的設計下就像一匹正在奔騰的白馬，外表上找不到一點瑕疵。

「呢架車我託我做法拉利廠個Uncle借嚟，要小心啲揸，限量版，好貴嘅，刮花啲啲我哋都收皮。」Ming爺千叮萬囑：「今日我哋就揸住佢去彩排一次，要準確計算啲時間、角度，仲要畀你熟習吓架車，我哋得一次機會，要一Take過，要萬無一失。」

Terence和Ming爺坐上車，發覺車的內籠和外表有截然不同的味道，貴氣的寶紅色皮革是內籠的主要基調，整架車充斥著皮革的味道，而先進的儀錶板令整架車有一種未來的感覺，簡單的總結就是Dream Car。

「對一對錶，而家朝早十點，我哋要十二點半到餐廳，呢兩個半鐘要先去中環拎條裙，銅鑼灣拎鞋，尖沙咀攞首飾，然後再去沙田Tracy屋企，再預埋佢變身時間，最後要去返蘇豪，時間好緊逼，你要記熟條路線點行。」Ming爺看著電話的Memo說。

「收到，你安排得就一定掂嘅，而家開車Run下早上流程先。」可是在車內弄了五分鐘，他們還在原地。

Ming爺看不過眼，拿著車匙一按，整隻白馬便充滿生氣，引擎的聲音如同馬的「嘶嘶」叫聲：「其實架車㩒呢個掣就撻得著……」

「唔好咁喇，第一次揸超跑乜都唔識，有你教路，星期六實無問題嘅。」

Ming爺反了一個白眼表示無奈，然係示意他趕快出發。

由九龍塘出發，十五分鐘後，他們到了第一個目的地中環，預計要花五分鐘到店內取裙，所以他們在此逗留了五分鐘便再開車往銅鑼灣，由於兩地相距不遠，所以只花了六分鐘便抵達店前，然後再次停留五分鐘便往尖沙咀出發，不消十五分鐘他們已經到達，經過五分鐘的等待，便出發往Tracy的住處。

「唔駛一個鐘已經搞掂，仲有個半鐘時間，一定唔會遲喇。」Terence嘴角向上翹，有點自滿。

「永遠唔好低估一個女人出門口需要嘅時間。」

「即係點？」

Ming爺沒有回答，只是著Terence專心駕駛。

十一時十五分，白馬安全抵達灰姑娘的房子前。

「今次要等幾耐先再出發？」

「一個鐘。」Ming爺慢慢吐出這三個字，Terence聽完後立即覺得匪夷所思。

「一個鐘？駛唔駛呀？我之前嗰啲女都唔駛咁耐。」

「你之前嗰啲早幾耐準備定你都唔知喇，而且今次我哋仲有埋指定服飾畀佢，即係佢要落完妝再化個新妝，一個鐘已經算快。」

「得十五分鐘點趕得切去蘇豪？實遲喇。」

「唔遲得，千祈唔好因為佢嘅原因令你遲到，縱使你無講出口，佢都會覺得你怪佢，咁就麻煩。」

「但得十五分，點由沙田出到去蘇豪？」

「唔得嘅，所以你要諗係咩位可以偷到時間。」

經過一小時的討論，又是時候往蘇豪出發。他們透過Google Map的指導，比原定時間晚了十分鐘到達。

到達餐廳門前，餐廳並未開門營業，他們兩人透過玻璃門討論著午餐的各項細節，並從中作出些少微調直到大家都滿意。

「Lunch我預兩個鐘，中間嗰個冧爆環節你記得好好準備下，到時我會喬裝成其中一個Waiter暗中偷拍，另外係嗰面、嗰面同呢面我都會Set定Cam，係車上面我都會Set兩個Cam。」Ming爺在玻璃門前比劃著。

「好，嗰Part我會練好啲，雖然得一日。」

「我知你實無問題。Lunch完我準備咗遊艇畀你哋遊船河睇日落，三點喺中環碼頭上船，睇完會喺淺水灣上岸，大約七點，個Ball就喺我淺水灣別墅搞。」

「咁泳衣？」

「你想落水？我諗住你哋喺甲板談情睇日落，無諗過要你哋落水喎，不過泳衣我都準備咗嘅，到時真係想落水都有得畀你哋換。至於架車，上船之後你打畀我，扮係叫管家幫你揸返淺水灣就Ok，到時我就會揾人揸返去，然後我會喺船上面扮水手拍嘢。」

「哈，Bro，果然計劃周詳。」

「咁而家係時候去碼頭喇。」

他們駕著車前往中環碼頭，Ming爺指著其中一艘遊艇，然後他們便登船，車由Ming爺的司機先開到淺水灣。

「係噃，呢艘船喺邊度借嘅？」Terence問

「頂你喇，你嚟過幾次船P都仲認唔到？」

「Sor，啲船全部差唔多咁，一時認唔到，咁啲泳衣係咪放咗喺嗰度？」Terence指著其中一間房。

Ming爺點頭表示正確，同時指著另一間房說：「女裝嘅泳衣就喺呢度。」

他們在船上四小時，說起兒時回憶，談及將來夢想，不知第幾次在船上一起觀看日落，四小時似乎一點也不足夠。

晚上七時，準時上岸。這是Terence首次到訪Ming爺夢幻般的別墅，土豪程度令他啞口無言長達十分鐘，Ming爺帶他熟習整間別墅，還帶他到衣帽間，Ming爺一早便為男女主角選好了舞會衣著，試過合身後他們便到大廳。

大廳絕對是個辦舞會的好地方，佔地半個籃球場，盡頭有一個矮小的台，加上左右兩堂半圓樓梯，猶如童話中的場景。

「呢度掂唔掂？」

「何止掂？簡直Perfect！」Terence真情流露了。

「到時呢度會有大約三十對男女，然後有啲米芝蓮主廚，同埋蒲飛，有MC，有跳舞比賽，喺度玩四個幾鐘絕對無問題，不過記住，最遲十一點半就要出發，唔係十二點就唔可以喺山頂還原灰姑娘。」

「得，絕對無問題，不過我好肚餓，有無嘢食？」

「啪啪」兩聲，Ming爺的管家和廚師捧著數道菜式登場。

「少爺、少爺朋友，請慢用。」管家恭敬地說。

吃過晚飯及練習過舞步後，時間差不多到十一點半，他們駕車往最後重頭戲的地點──山頂。

「記住到時落車要行遠啲啲，準備定啲超Sweet情話，一到十二點就立即行動。」

「呵呵，放心，部署咁耐，搞咁大場大龍鳳，全部都係為咗呢一刻，我一定唔會令你失望嘅！到時我一定做得好好睇睇！」

經過一天的實時實地彩排，時間已經到了十二點，距離計劃的實施只有一日多，此刻兩人心裡也期待著星期六的來臨。