第五幕

時間：晚上十時

地點：Ming爺書房

人物：Terence、Ming爺

場景：Terence和Ming爺開始進行灰姑娘計劃第二步

在書卷味甚濃的書房內，Terence正埋首電話中，Ming爺則在計劃行程路線。

「喂，我搞掂喇，Plan好哂嗰日啲行程，而家係差你幾時搞掂約佢出嚟。」Ming爺伸了一個懶腰，整個人累攤在桌上。

「等多等喇，我而家同佢傾緊，暫時發展得幾好，我Feel到佢都幾冧我，我諗已經跌咗落我個陷阱度喇，嘻嘻。」陪隨著奸笑聲的是猙獰的臉孔。

但Ming爺沒有理會，閉上眼繼續說：「我驚跌落陷阱嗰個係你喳，沉哂船咁呀你家陣。」

Terence聽到後反應很大，急忙澄清：「癡線喇，我喎！我會沉呢啲平凡貪錢港女船？你係咪講緊笑呀Ming爺？」

「最好唔係喇，我見你邊Whatsapp邊甜笑，唔通呢啲係演技？佢又唔可以隔住個Mon睇到你而家表情嘅，笑到咁有咩用？唔係沉船係咩？人少少認咗佢喇！」Ming爺就像辯論隊般出招，將所有疑點一一舉出。

「我呢啲叫方法演技，你識條鐵咩？我而家唔入戲，到時點自然流露呀？到時穿崩咪GG！」Terence以問答問，將指控巧妙擋開。

然後整間書房便陷入死寂，只剩下指甲敲打屏幕的「噠噠」聲。不知過了多久，一聲「Yes」打破了書房的寂靜，Ming爺也被嚇醒了，跳起來向音源──Terence行近。

「嘈醒你呀？你睇吓，我搞掂喇，終於套到佢問我呢句喇。」Terence神氣得很，把電話遞向Ming爺。

Ming爺接過電話後看了最近數句對話內容，接著對Terence說：「你諗住點答佢呢句？」

Terence想了一下，自信十足的回答：「當然係同佢講我等緊一個可以同我一生一世嘅女人，所以一直都單身緊，但最近我發覺呢個女人應該出現咗，但我唔確定，我驚佢唔係咁諗，最後會朋友都無得做，不如你幫我一齊分析吓。」

「好假喎，雖然佢A0啫，但應該唔會好傻好天真啩？我睇你哋啲對話都唔覺佢係天真嬌嚟噃，你扮情聖呢招我覺得會扣分反感囉。」Ming爺分析道。

「咁你話點答好？」

「佢問得你有無女朋友，一定係想睇吓有無機會，同預咗你反問佢，既然你都已經有能力令佢主動，咁就唔好咁易畀佢估到，留返啲神秘感，等佢繼續有嗰種曖昧同個心囉囉攣嘅感覺。你反而應該無視佢呢個問題，直接問佢嚟緊邊日得閒，然後約佢，最後同佢講嗰日畀答案佢。」

Terence聽完後一臉懵逼，一時之間也猜不透箇中原因，作為多年兄弟的Ming爺一眼便知他未能領略當中含意，於是再加解釋：「其實媾女係一個男女之間嘅心理角力，邊個先主動出手就反而變咗係被動嗰個，想搶到主導權，係要啲耐性，偏偏女人就係無咩耐性嘅生物，你對佢好但又唔行動，佢就會自己開始腦補，到最後忍唔住就會主動問你，好似而家咁，但佢而家咁問你其實係拋磚引玉，引你主動，所以呢刻更加要拖，唔好主動，咁就成件事由我哋控制喇。至於無視佢再問佢邊日得閒，其實係令佢更加急，然後你再補句到時話佢知，佢一定會立即畀個時間你，表面上係你主動約佢，但實際上佢已經處於被動位置，再加埋我哋嗰日嘅無敵心動安排，一日過後佢一定以為自己已經係你條女，到時你再一手撕破佢呢個虛構嘅幻想，佢一定超Hurt，條片個效果一定好爆，啱哂你開初嘅預期，亦都可以為你份FYP提供好好嘅素材，一舉兩得。」

「聽落好似好有道理喎，咁做好似仲好玩，畀個假嘅希望佢，然後再一手抹殺佢，睇佢到時崩個樣，諗起都興奮。」於是Terence依循Ming爺的思路方向回答Tracy。

等待永遠是漫長的，所以當看到「輸入中」三個字時，人便會格外興奮。

「今個星期六？我嗰日放假唔駛返工，你得唔得？」Terence的電話屏幕顯示了這句回覆。

「都話嘅喇，跟住就睇你表演喇My Bro。」Ming爺得意的說完後便起身離開書房。