第三幕

時間：超級繁忙的午飯時間

地點：人流很多的大學Canteen

人物：Terence、Ming爺、窮女生

場景：兩人在Canteen物色女主角灰姑娘

在上半天忙碌的學習或工作後，一頓豐富美味的Lunch是每個人延續生命的必需品，所以Lunch Time在Canteen必定會遇見不同種類的人：打扮亮麗的OL、西裝筆挺的上班族、一臉嚴肅的教授、三五成群的中學生、滿身大汗的工人、打扮前衛的大學生……

「喺Canteen揾人係最醒嘅做法，我哋可以由佢哋食咩餐廳同食咩嘢睇得出邊啲人係比較窮。坐得黑房嗰啲我哋就唔駛理喇，睇吓邊啲食頹飯，嗰啲就有機會係我哋嘅Target。」Ming爺邊玩著手機邊說。

「都係，等我睇吓邊啲個樣有質素先。」Terence仔細觀察取餐處，看哪些人是吃頹飯的。

「喂，Terence，你睇吓嗰條女，好似幾Ok咁，眼大大、頭髮長長、波大大、腰幼幼、腳長長。」Ming爺指著取餐處的一個女生。

「咪玩喇Ming爺，嗰個唔掂得嘅，佢係市場學系系花嚟，你想我變全民公敵？同埋佢條仔係學校出哂名嘅富三代，條女再奢華嘅日子都過過，我哋嘅計劃放喺佢身上完全唔得。」Terence連忙解釋。

「但佢而家喺度食頹飯喎，咩解呢？」Ming爺追問。

「我諗……一定係平時食慣好嘢，而家想食返啲頹嘢平衡吓，唔係點知好嘢咁好食，一定係咁。」Terence把自己腦補的原因說出來，但Ming爺明顯不認同。

「我覺得唔係咁，」Ming爺的推理細胞蠢蠢欲動：「你睇佢個神情同埋步姿，成個身體語言話畀我知佢係精神崩潰咁，成個人好恍惚，應該係分咗手或者嘈咗之類。不過唔緊要，你都淆底，佢點都無所謂。」

「聽你咁講又好似係。」Terence附和，但其實他完全看不出端倪。

「咁嗰個呢？」Ming爺這次指著兩張枱外的一個正在吃飯的女生：「佢唔會係咩系花校花喇啩？」她正在吃十多元的咖哩肉片飯，這是大學Canteen裡頹飯中的頹飯。

「呢個唔係，不過個樣好唔掂喎，唔係咁玩我呀？」Terence怒視著Ming爺說。

「玩吓啫，唔駛咁樣嘅。再唔係嗰個呀，著件白Tee捧住餐揾緊位嗰個。」Ming爺再次提議：「睇佢一身打扮，九成係淘返嚟，衣不稱身，個袋係啲街邊車仔檔貨色，連對鞋都係街市買咁，一定窮。不過個樣同身形幾Ok，呢個啱喇啩？」

「呢個？睇落好似幾唔錯咁，再觀察多陣先。」Terence上下打量著她。

大學的Canteen在Lunch Time是非常擁擠的，因為除了學生和教職員外，街外人也會湧入來吃午餐，畢竟附近地區的餐廳要在便宜和味道之間取得平衡是不易的，所以學校Canteen的性價比是最高，人多也很自然，然而後遺症是坐位不足，要找空位並不易。

「點？係咪真係覺得Ok？」Ming爺再次向Terence確認，而他也點頭回應。得到Terence首肯後，Ming爺向窮女生招手，示意Terence旁邊有空位讓她坐，窮女生起初表現得很驚慌尷尬，但眼見四處也無位，最後只好捧著餐過來坐下。

「真係唔該哂，呢啲時間我成日都揾唔到位，好彩今次有你哋。」窮女生連番道謝。

Ming爺只是友好的微微一笑，把手機拿起來回覆Messages，而Terence卻沒有任何行動，正眼也沒有看過窮女生，Ming爺覺得勢色不對，於是在枱下輕輕踢了Terence一下，示意他要主動點。

Terence如夢初醒，立刻回過神，和窮女生攀談起來，大家有說有笑，氣氛愉快，而Ming爺只是偶然回答一兩句，直到窮女生吃飽後要再上堂才結束。

「進展好順利咁噃。」Ming爺帶著壞笑說。

「駛乜講，我出馬喎，當我流嘅？」Terence自信滿滿的說。

「我啱啱都拍咗片，可能遲啲會用得著。」Ming爺續說：「物色女主角呢一Part就搞掂，跟住要做嘅就係心動嘅邂逅，令佢直墮情網。」

「無錯，呢樣要度度，我頭先特登無問佢Contact同Background，就係想遲啲營造到我同佢好有緣嘅感覺，女人係感性動物，畀到呢啲浪漫錯覺佢就好易得手。」Terence對於自己的套路信心十足，Ming爺聽後除了點頭外便沒有任何表態，只是手又再次在手機上遊走。