第一幕
時間：某日下課後
地點：無人的Lecture Hall
人物：Terence、Ming爺、被撞倒的女生
場景：兩人看著Youtube並討論
「喂Ming爺，你睇吓條片，好搞笑。」Terence向正在整理筆記的Ming爺說。
「係真唔係呀？唔搞笑我打你嘅。」Ming爺邊行向Terence方向邊說，同時Terence把自己的Notebook轉向Ming爺。
片中正播放一個外國Youtuber在遊樂場過山車上作弄途人的片段，被作弄的人反應不一，而這亦是笑點所在。
「咁癲都玩得出？啲外國人真係癡線嘅，唔畀人打都偷笑。」Ming爺看到一半之後留下這句說話便繼續整理筆記。
「你唔覺得咁好好玩咩？拍吓片整蠱人，無傷大雅又可以賺錢同出名，條片紅咗仲會有人揾我哋做明星拍戲，好過你做私補賺得嗰百幾蚊一個鐘咁少，又要四圍去又大壓力。」Terence高聲談論他的偉論。
「唔好再發夢喇Terence，我哋之前咪拍過囉，Upload咗成個星期先得五個Views，當中仲有四個係我哋自己刷出嚟，實際上得一個人睇過，今次咪搞我喇，我寧願補吓習就算，簡單啲開心啲，我先唔想出名，我又唔缺錢。」Ming爺駁斥Terence。
「話又不能這樣說啊，上次我哋拍嘅係開箱片，條片後製完Upload之後已經有好多同類嘅片出現咗，我哋由頭啖湯變咗跟風，當然無View喇，但根據我多年睇Youtube嘅經驗，呢類搞笑片係歷久不衰，永不Outdated，好似今次呢條片都幾年前，我哋咪一樣睇到騎騎笑，所以拍呢類片一定掂，信我。」Terence以他三吋不爛之舌回應。
縱使Ming爺聽到他這樣說，但依然無動於衷，只是冷冷的回應：「唉……都係咪喇，首先，從頭到尾都係得你一個笑，我無，唔好屈我；第二，上次你夠話拍開箱片一定掂，只要開嘅嘢夠新，我就係信你聽你講特登揾人去班咗個新出Figure返嚟，點知第二日已經有十幾條片開緊同一個Figure。真心不了。」
「認真呢？但我今次真係有個好正嘅Idea，一定爆紅，我已經睇到我哋成為網紅嘅畫面，呢鋪無你真係唔成事，咁多年兄弟，唔係唔信我呀？」Terence沒有放棄，依然窮追不捨。
「真係唔好再發明星夢喇，畀心機讀書喇，今年Final Year，仲要做FYP，你咁多年GPA都係得二點幾，啲Assignments同Projects都係我幫你做咁滯，到你畢業之後無我幫你手，你見工點算呀？」Ming爺苦口婆心勸Terence腳踏實地。
Terence聽到後一時語窒，良久想不出說話應對，眼見Ming爺已經背上背包準備離開Lecture Hall，他才發覺自己的文具和筆記還散亂在桌上，於是立即把所有東西都掃落背包，抱著Notebook趕上Ming爺。
Terence一手搭著Ming爺膊頭，露出他招牌的嬉皮笑臉，俏皮地說：「我就係擔心畢業之後點算先叫你一齊拍片，讀書認真唔係我強項，創意同個樣先係我最煞食嘅地方，我都唔知點解咁好彩碌到入嚟讀Psycho，份FYP我都仲煩緊點做，同我Supervisor都仲未有共識，就係咁我先癡住你，咁我就唔駛怕將來餓死，我哋由細玩到大，你唔會睇住我死嘅。」語畢還裝出一個可憐兮兮的表情。
「真係無你咁好氣，今次你有咩Idea咁把炮呀？聽完如果我覺得唔Work嘅我唔會Join。」Ming爺被Terence連珠砲發，態度終於軟化。
「哈，Yes！我就知你會撐我嘅Bro。」Terence興奮地說：「我真係諗過嘅，拍條整蠱片，而呢條片同上次唔同，你可以唔駛出鏡，你負責拍同各種Supports就得，而啲Supports以你嘅身份嚟講絕對係小菜一碟。」
「哈，又利用我？」Ming爺裝作生氣地說。
「Hey Bro，千祈唔好咁講，唔係利用係善用，呢條片一定會令我哋一舉成名，我已經為呢條片諗咗個非常之適合嘅名，叫灰姑娘計劃，英文名叫Project Cinderella！」然後，Terence對Ming爺詳細解釋灰姑娘計劃的細節。
「聽落又好似幾好玩咁喎，同埋我覺得呢個Idea可以做你FYP嘅Topic，條片、啲Comments同Like或者Dislike就係實驗要收集嘅Data，咁就可以一舉兩得，拍到片又交到功課。」Ming爺把所有事都Link Up到學業上，這是他的強項。
「咁都畀你諗到？果然係勁，一次過解決我兩個困難，我都話一定要癡住你嘅喇，以後我都跟你揾食喇老闆Ming！我而家即刻上去六樓揾骷髏骨同佢講做呢個Topic先，恒生等。」Terence雙眼發光似的說。
說完後，Terence便奪門而去，開門時還因為太突然和用力太猛，一個女生被撞倒在地，Terence只是拋下一聲對不起便跑去找他的Supervisior，而Ming爺則温柔地上前扶起並慰問她，確定無大礙後也慢行去恒生。
