嗰晚我喺香港仔隧道穿越咗

見面

又有時間繼續講我嘅故仔喇，其實除咗斌哥，基本上我最親嘅親戚都喺哂大窩口、葵盛、葵興同荃灣，不過嗰時完全無諗過去揾佢哋，因為佢哋一定唔會穿越咗過嚟。

葵芳去葵涌邨其實唔係好遠，不過建築物唔同，令我認路有啲困難，最終都花咗半日先去到，當然途中不斷被人審都嘥咗唔少時間啦。

由於嗰個世界嘅建築唔係啲高樓大廈，所以要揾到斌哥唔係咁易，所以我同啲居民四圍打聽，到最後係邨口車仔檔揾到佢嘅蹤影，估唔到喺呢個世界嘅斌哥都係賣魚蛋，定係其實佢都係同我一樣穿越咗？

不過結果係我諗多咗，佢係原本已經喺呢個世界生活嘅斌哥，咁睇嚟咁多friends入面，得我一個去咗嗰個世界。

我同佢寒喧一輪，講完今次北行目的之後，斌哥竟然同我講一齊去，因為佢都唔想我哋幾個老死最後喺戰場上兵戎相見，如是者我就同佢一齊出黎。

一路緣荃灣到深井，再上錦田再抵達元朗，花咗兩日一夜時間，點解咁耐？因為好多地方都未開發，仲喺山路，仲要攀山涉水，兼且要揾返個方向，所以兩日一夜算快，不過我發覺嗰面好啱環保撚住，因為全部都未開發，仲係綠色植物。

喺元朗問咗啲居民，原來新界話事人劉皇發幾年前由元朗搬咗去屯門，係因為佢哋內部權力鬥爭，雖然最後都係劉主席平定咗，但元氣大傷，唯有去屯門，方便隨時由水路逃往大陸避難。我哋再行咗個幾鐘去到屯門，經過明查暗訪，終於打聽到劉主席地址，去到同門口傳話人交涉一輪，傳咗幾次話後，我哋兩個終於入到去見鄉議局主席真人。

佢一見到我哋，就立刻笑逐顏開咁走過嚟，同我隔離嘅斌哥稱兄道弟，問佢係咪諗清楚加入做佢嘅軍隊統帥，而我就完全被無視。

斌哥斬釘截鐵咁拒絕佢，再講明今次嘅來意，劉主席先好驚訝咁發現我嘅存在，然後慢慢走返埋佢霸氣酸枝櫈坐低，傲慢咁問我話。

「想同我哋新界同盟？點解我哋要咁做？對我哋有咩好處？你唔好忘記當初係你趕我哋走先！」

無辜呀，趕佢哋走嗰個都唔係我，只係同我一樣樣嘅第二個人，但佢哋根本唔會信。

「請息怒呀劉主席，請容我為我當年嘅魯莽道歉，所以今次我先專登自己一個登門造訪、負荊請罪，同埋我有你哋非同我哋同盟不可嘅理由。」

「笑話！我哋而家背靠中國，有強大資源，統一香港係遲早嘅事，你哋呢啲本土派同港英餘孽我哋新界駛乜驚？」

「如果係真，點解到而家咁多年香港都仲係三分天下，而唔係由劉主席你完成統一大業？我諗箇中原因你同我都好清楚。」

「哈哈哈，係我仁慈唔想生靈塗炭所以先唔發動統一戰爭，想用和平手段令九龍同香港島心悅誠服咁歸順。」

「真係咁咩？定還是根本你哋無戰勝嘅本錢？本身我都唔係咁信，但見你按兵不動，而且又咁想招攬我好兄弟做你軍隊統帥，所以我好確定你係不能，非不為！」

咁被我窒一窒，劉主席都反應唔切，我見機不可失，於是乘勝追擊。

「就我呢個了解你哋內部唔深嘅外人嚟睇，你最少有三個問題。第一，無人材。我兄弟雖然係一個將才，打架夠狠，但要揾個由九龍過去新界嘅人做統帥呢個位，未免太大風險。第二，無軍備。無錯，大陸係畀咗好多軍備你，但眾所周知都係次貨假嘢多，嚇吓人都仲得嘅，但真係拎得上場嘅有限，所以你先連我哋都唔敢打。第三，無士兵。我去過哂香港島、九龍同新界，發覺城市規劃係新界最好，啲人嘅危機意識都係最低，我由九龍一路入到元朗都無咩遇到阻礙，亦都無軍人監視，而且啲人都普遍長得比較豐滿，歌舞昇平咁，無人願意打仗，試問呢班人點令你統一香港？當然仲有你哋管理層內部爭權問題，我諗主席你淨係應付內部爭權問題都已經疲於奔命，仲邊得閒對付我哋？」

「估唔到你睇嘢都睇得幾通透，你講嘅嘢都啱，唯獨內部爭權係錯，呢樣係啲人亂傳，其實我哋無爭權，只係我哋有部分人想用戰爭去統一，有部分人想和平協商統一，所以分咗兩派，我就係和平派，所以搬咗入屯門，主戰派就留咗係元朗，但兵權始終喺我手上，所以佢哋根本無可能發動戰爭，我之所以揾你朋友做軍隊統帥，就係想制衡佢哋。」

「原來發生咗咁嘅事，難怪近年你哋新界無咩動作，和平統一係好事，咁同盟一事應該無咩問題啦？」

「我本人係無咩問題，但要主戰派嗰面都同意先得。嗰面主要由我個仔劉業強領導，你哋試下去同佢傾傾喇。」

「無問題，不過我就咁去說服力唔大，劉主席你介唔介意寫封信畀我帶去？」

「好，你等等。」

斌哥見到呢一幕都頓時放低咗心頭大石，畢竟同盟一事已經成功咗一半。

收到信之後，我哋告別咗劉主席，就再次向元朗出發，根據劉主席畀我哋嘅地圖，好快就揾到佢個仔劉業強，佢個氣場明顯同劉皇發好唔同，好勇鬥狠嘅感覺連我未入門口都感受到，不過都要硬住頭皮上。

同樣我哋道明來意畀埋封信佢睇之後，佢好直接咁問：「你畀到啲咩好處我哋？」

「我哋的確無咩好處畀到你哋，但係如果我哋九龍畀香港島曾蔭權港督吞併咗，咁到時你哋新界就進入滅亡倒數。你諗下點解你哋兩軍一直無咩機會交戰？係因為中間有我哋九龍喺度，你哋好難繞過我哋而交戰，但萬一九龍失守，香港島就可以揮軍直入新界，以你哋目前軍力，睇怕唔駛一個禮拜就玩完。」

「你咁講都好似有啲道理，但都未夠說服我同你哋同盟！」

「如果我可以令到你可以掌埋新界兵權呢？」

「你做到？」

「有信心，不過唔係我，而係我個friend做到。」我指住隔離嘅斌哥。