我平生最大嘅志願，就係發達。
但至今都未有方法，去完成呢個偉大嘅夢想。
呢排我開始學風水，諗住占卜下點樣發達，至不濟，都可以去呃下富婆領遺產。
點知我個風水師傅話我心術不正，教咗少少野，就逐我出師門。
我唯有靠自己，我採用最簡單嘅方法：許願樹！
我用我僅有嘅風水知識，計出咗一個吉時，去許個發達願望。
咁岩吉時係半夜，我估無人會半夜去掛寶牒，好似鬼鬼崇崇咁。
聽聞掛得愈高，願望就愈易實現，我擲咗幾個寶牒，都唔夠高，乾脆爬上樹。
好不容易爬到最高，突然聽到少女嘅聲音：「好重丫，我瞓緊覺架。」
「邊個？」我下意識問，但無人答我。
我即刻放軟語氣，扮自言自語：「唉，邊個把聲咁好聽？唔通我幻聽，以為有仙女同我講野？」
果把聲回應：「我......我把聲真係好好聽？」
我讚咗幾句「此聲只應天上有」，再問：「我可唔可以見下妳個真樣？」
「你唔止見到我，你仲騎住我添。」
咪住先，許願樹同我講緊野？
我東張西望，周圍都無人，而把聲......似乎真係從樹幹傳出。
我即刻答：「原來樹把聲咁好聽，我都係今日先知。」
許願樹驚訝：「我係樹精，你唔怕我咩？」
驚，我梗係驚，但係人在屋簷......樹幹上，唯有講下好說話。
「遇到樹中仙子，我高興都黎唔切。」我努力擠出笑容，慢慢爬落去。
許願樹把聲冧晒：「我平時唔敢講野，就係驚嚇親人，驚佢地捉我去解剖，搞到我好悶丫。」
寂寞的少女？簡直係我專長。
諗諗下，佢係許願樹，會唔會有法力？幫到我發達？
「做許願樹好慘架，個個月都要從堆寶牒度，揀三個願望黎實現。」
「咁辛苦？」我個個心興奮到呯呯跳：「咁你會揀咩願望黎實現架？」
「梗係揀簡單果啲啦，『平平安安』就最易實現，『六合彩頭獎一注中』要浪費好多精力，會令我愈黎愈衰弱。」
「妳真係盡責又可愛。」我扮不經意咁問：「如果得幾個寶牒，無得揀呢？」
許願樹答：「咁就慘啦，點都要實現果啲麻煩願望，不過日日都有人許願，點會唔夠寶牒揀？」
一個計劃喺我心裡面成型，只剩最後一個問題：「妳嘅法力係咪想點都得架？殺人於千里之外？」
許願樹有啲怕醜：「我點會殺人呢？同埋無願望嘅話，我唔可以用法力架。」
即係話，如果樹上剩番我嘅寶牒，佢就一定要實願我嘅願望......而佢無辦法報復。
諗到呢度，我快快手手，將樹上嘅寶牒扔晒落地。
許願樹唔明：「你做乜野？」
「我驚妳太重，幫妳減輕下負擔。」我是但答，估唔到佢都信，把聲冧晒。
好不容易拎走晒啲寶牒，我又諗到一個問題，日日都有人黎擲寶牒，我點阻止得咁多？
