如果你要我喺咁多個社交媒體中揀一個最唔鍾意嘅,我諗我最唔鍾意嘅真係Snapchat。

Whatsapp, Facebook Messanger, Instagram, Snapchat云云之中,Snapchat嘅最大特色就係佢個名:Snap-Chat . Chat唔係重點,重點係snap。當然你都可以snap住咁chat嘅,但可能我守舊啦,我總係覺得Whatsapp嗰種純文字嘅先叫chat。

而有別於其他社交媒體,snapchat另外嘅特色就係儲火。

唔知你有冇咁嘅經歷,每當見到friend list到出現咗漏斗圖案。為咗令你地之間唔好斷火,你會求其send個snap過去,可能簡單地問一句「食咗飯未?」,甚至最離譜嘅一句說話都冇,就咁一張相。但終歸究底,司馬昭之心,路人皆知。說穿了,大家都喺為儲火而儲火姐,係咪?

即使你有冇咁嘅經歷,總又會聽到每當有人生日,一定會有人同你講句生日快樂。之後寒暄咗幾句之後,下一次嘅對話已經係一年之後。

曾經都覺得呢類人點都比起嗰啲唔記得你生日,連一句「生日快樂」都唔講嘅人好。咁係嘅,但對於收到呢句「生日快樂」嘅人嚟講,總係有種為做而做嘅感覺。

而儲火就係呢個咁尷尬情況嘅嚴重版,每一日都變成你嘅生日。當每一個snap喺send出去之前已經冇咗嗰種對朋友嘅真誠,冇咗想同朋友交流、傾計嘅嗰種純粹嘅心。咁即使俾你地儲咗一百日火,感情都唔會增進咗半步。

「好心一早放開我 重頭努力也坎坷
統統不要好過 來年歲月那麼多
為繼續而繼續 沒有好處還是我
若註定有一點苦楚 不如自己親手割破」

  • 盧巧音《好心分手》

人類每一種關係嘅建構都係要依靠雙方所建立。若果一個人無心維持,連接住雙方嘅大橋終有一日會崩垮。說穿了,儲唔儲火?儲咗幾多日火?呢啲都只係幻象嚟姐,真正嘅朋友,又點會因為斷咗火而關係破裂。說到底,關係唔會因儲火嘅日數而加強,亦唔會因為冇火而減弱。所以⋯⋯唔好為儲而儲啦!