作為球迷，好多時我地鍾意一位球星，往往都唔係因為佢嘅球技咁簡單。係，我地開始留意嗰位球星，會係因為佢地嘅球技。鍾意MJ、Kobe嘅Fadeaway，鍾意 AI嘅Crossover、鍾意Curry嘅無解3分，所以你先會喺街場死扭爛扭，連對住啲高你成個頭、頓位大過你N倍嘅人都夾硬要打Low post。

點解？一句講晒：型囉！

但其實球技都只係開端姐，真正令球迷繼續鍾意嗰位球星往往係因為佢嘅性格。鍾意Kobe對勝利近乎瘋狂嘅執迷、TD嘅低調沉穩、Rose喺大傷後對籃球始終如一嘅堅持。我地愈喺追住嗰位球星走，愈會學到更多球技以外嘅事，好似變成一位老師喺球場上用佢嘅血同汗教導我地一個又一個嘅人生道理。

最近有留意開NBA嘅球迷應該唔會唔知，第四次勇騎大戰喺早前已經上演啦。Lebron James領軍嘅克里夫蘭騎士最終被橫掃，以局數0-4輸咗俾衛冕軍嘅金洲勇士。勇士四年三勝，創造出新世代嘅王朝。但作為騎迷，喺佩服勇士強勁戰術執行力嘅同時。嗰個星期六，好難唔諗返起當年騎士1-3反cup 73勝勇士呢個如夢似真嘅童話。

2016年嘅勇士勢如破竹，常規賽拿下73勝，一破96公牛創下的72勝紀錄(最後，MJ成功帶領公牛拿下隊史第四個總冠軍，為公牛第二次嘅三連霸帶嚟開端)。面對來勢洶洶嘅敵人，騎士由1-3大比數落後嘅局面成功追平至3-3，迎嚟最後一場嘅Game 7。

「Iguodala to Curry back to Iguodala. BLOCKED BY JAMES!! 」

「Irving and Curry, one-on-one. Irving puts it up. It’s good, KYRIE IRVING FROM DOWNTOWN!!」

將時間調返到今年，喺James再一次鎩羽而歸之後，好多人都對佢冷嘲熱諷。咩六亞王呀等等嘅嘲諷此起彼落，但即使係咁，套用返Reddit一位網友講嘅話，呢四年喺James身上學到好多，真正明白到當年James所講「Nothing is given, everything is earned」係咩嘅意思、喺16年嘅總決賽學到只要一息尚存，就應抱有希望。

時間再返返去幾日前，2018世界盃B組分組賽第一輪：葡萄牙對西班牙。即使葡萄牙有C朗坐陣，但我諗絕大部份人都會對西班牙睇高一線。結果係葡萄牙3-3逼和西班牙。

你可能會話贏唔到波，有咩值得吹奏？但直播睇嗰場波嘅人好難唔為C朗讚嘆。筆者好記得葡萄牙2-3落後嘅時後，C朗搏到犯規，可以主射自由球。喺人牆都未set好嗰時，佢摺高褲腳、不斷嘅深呼吸，目光只聚焦於迪基亞所守護嘅鋼門。嗰種眼神，筆者至今仍然清晰記得。背負全國期望，0分定1分嘅情況下。皮球越過人牆，應聲破網！就係呢球，令葡萄牙最終可以成功逼和。

C朗係一個自我要求極高、極度勤力嘅球員，相信呢點稍為睇過波嘅人都會清楚。但由當初被人批評獨食，隊友個位空到可以露營都唔交，到呢場對隊友嘅信任，first touch後立刻交俾隊友，為隊友製造機會射破西班牙大門。放下執著，明白到足球係11 個人上下一心一齊踢。呢點心態上嘅轉變，令C朗成長。

喺2016年歐洲國家盃決賽上半場受傷，紅住眼嘅C朗無奈離開征戰緊嘅葡萄牙大軍。但佢冇離開賽場，返入更衣室，反而仲喺後備席為隊友打氣、指點隊友。最終，葡萄牙歷史性奪冠，C朗亦奪得個人第一個歐國盃冠軍。苦等12年嘅C朗，終於一償所願。如同16年的James，為自已的家鄉首奪冠軍。

作為球迷，鍾意一位球星，當佢係偶像。喺場上，學到嘅固之然有佢地嘅球技啦，但一出到場外，再花巧奪目嘅技巧已經派唔上用場。返到我地熟悉嘅現實當中，日以繼夜、夜以繼日嘅工作、學業，乃至於人生，唯有喺佢地身上所學到嘅真理先至係永恆。

其實唔單只足球、籃球，所有運動都一樣。呢個，大概就係運動獨特嘅美。