（上）：https://goo.gl/xn2kxi
（中）：https://goo.gl/6SdgTA

我斟咗杯白馬牌威士忌定驚，浸煙燻味包圍住我，入到喉嚨變咗燶味。

阿爺炒股炒燶咗，連份長糧都冇埋，咁我點算好？

已經冇父幹，連爺幹都冇，仲要孭住阿爺呢個重擔幾十年？

咁啲夢想呀藝術呀人生意義呀嗰幾味嘢，已經可以倒入個酒杯度，「Good」一聲吞咗佢，醉兩醉，頂籠打個酒嗝就當乜事都冇發生過。

「我呢隻XXX不知幾穩健呀，一日未放，有賭未為嘟呀！」（股票號碼已打格，阿爺先唔益你哋。）

阿爺收到我電話，拿拿臨催呀村長摷份文件俾佢，趕頭趕命咁返返落嚟。

佢見我嚇到鼻哥窿都冇肉，反而好平靜咁唸經：「一日未放……一日未放……」

佢仲拎出封實咗膠紙嘅公文袋，放喺心口，安慰自己：「唔駛驚，仲有佢。」

講就咁講，阿爺將份文件放入櫃桶後，開始不停篤計數機，好似想篤返好個市咁。

我忽然一陣悲哀湧上心頭，佢呢個年紀明明應該安享晚年先啱，「唔好咁啦，我俾多啲家用，連壓價嘅Job都照接喇……」

阿爺抬頭望住我，迷離嘅眼神中，閃出過來人嘅感慨，「細佬，我唔係想你搵錢俾我使，我係驚你第時老咗好似阿爺咁。」

我唔識應機，阿爺揮揮手，趕我走，「得喇得喇，呢壇嘢阿爺搞得掂。你記得用完啲紙皮留返俾我賣。」

或者係我自私，所以我容許自己俾阿爺說服。

我返入房，郁手搞新Project。創作人係咁，未開始就死拖爛拖，一開始就飯都唔願食，幾夜通宵趕掂Deadline。交完貨，今次個客仔居然願意准時找數！

我成臉鬍鬚，就嚟爆肝，腳步浮浮但好充實。行出房門，阿爺仲喺度篤緊機，狂熱程度同我有得揮，佢好興奮，拍爛手掌，「我都話係技術性調整啦！」

我望住財經台，原來隻XXX差幾個價位就返家鄉。我攬住阿爺大笑，笑完先察覺：咦？啲本金就變返最初嗰筆數咋啵，都未有肉食，咁開心做咩啫？

點都好，就咁無風無浪過咗幾個月，阿爺張新身分證終於拎得，我拖延症發作，又陪佢去。

「阿Sir，乜又係你呀？」阿爺望住死魚眼阿Sir，笑得開心過上次，連自己鬧過人哋辦事不力都唔記得晒。

「嗱，其實你當年作虛假陳述係犯法嘅，但我哋衡量過，決定唔告你，你以後醒定啲喇。」阿Sir拎出身分證，隊俾阿爺，叫佢對下資料，冇問題就簽收走得。

阿爺變聲驚叫：「1……1964年出世？咁我咪得53歲？！」

咩話？！我衝埋去，搶咗張證嚟睇，出世年份係就係變咗，但唔係老5年，反而係後生咗10年！

阿Sir問：「有問題咩？你封證明書係咁寫㗎啵。」

「但係……邊有可能……」

「你唔係咁大膽偽造證明文件啩？」阿Sir對眼忽然變到目光銳利，把聲高咗幾度。

「梗係冇！封信千真萬確㗎，我專登返大陸拎㗎！」

阿爺同我你眼望我眼，心諗：乜個仆街村長咁大整蠱？強國果然只有騙子是真的！

但忽然叮一聲，我諗通晒。我叫阿爺簽名，佢好疑惑咁望住我。

「真係簽？」阿爺好似當我賣佢豬仔咁。

「聽我講啦，今次發過牛市呀。」我起勢催佢：「簽啦！」

阿爺照做，拎咗證件，出到門口，我狂笑唔停，「機會嚟喇大佬！生果金嗰一千幾百夠捱麵包定交水電煤氣？你之前搵唔到嘢做啫，而家返老還童實得啦！好彩張相影得你夠Young。」

阿爺初時呆咗，但「刷」一聲轉身，撇甩我箭步而行，好耐都未見過阿爺個樣咁認真，唧都唔笑。

吓？阿爺嬲咗我？乜我講得唔啱咩？

但咁搞法，阿爺臨老仲要捱世界，要捱多十三年先有生果金拎……

我追上去追到索晒氣，個腦空白，唔知呢單嘢點收料，點知阿爺見我落後，轉身就話：「行快啲啦！快啲返去幫我寫咩V啦！我個保安牌要續期先得呀！」

「吓？哦！」

「為咗退休生活，我決定一世都唔退休！」壓喺阿爺心頭塊大石移開咗，而隻XXX應該都返到家鄉，好似係。

（完）

鍾意嘅，請Like我FB Page :D

諗起自己無論做邊行，距離退休年齡仲有幾十年要捱，我已經冇聲出了。來，乾一杯威士尼可樂，讓我們忘記退休這件事（賣廣告咁款，咩料呀）。

利申：本故事純粹虛構，切勿幫襯強國文書偽造廠。

我哋點首劉美君嘅浮花俾阿爺聽，唔關事㗎，我純粹想聽囉：https://goo.gl/jtvhDp

#我諗我會係退而不休 #其實唔當工作係工作係咪就等於退咗休 #退休需要安全感 #我一世都冇
#余該隱 #短篇 #小說 #廣東話 #短篇狂想 #短篇小說 #退休 #退休金 #長糧 #身分證 #生果金 #安老 #窮 #廢青 #Freelance