垃圾佬車撞高官（中）：
衙門內，縣老爺同師爺坐兩側，知州坐主席位，「明鏡高懸」大牌匾掛正喺佢頭殼頂，令佢不由自主正襟危坐。
犯人被押出嚟，跪地，竟然係一向聲大夾惡嘅豬肉榮。知州仲倒緊夜香嗰陣，都受佢唔少「關照」，雙方成日有爭拗。
知州即刻扮咳，用衣袖遮住半邊臉，免得畀仇家認出自己。
但豬肉榮換上殘舊嘅麻布犯人服，昔日氣焰銳減，頭耷耷，未敢望向神聖不可侵犯嘅高官。
原來單案仲有另一名青年「犯人」，佢一身貴價綾羅綢緞，衙差似足保鑣跟喺佢身後。
侍衛同知州耳語：「佢係知縣嘅獨生子，仲係二品巡撫大人嘅侄仔。因為身份衝突，就派咗你嚟判案，你唯一嘅任務就係判佢無罪。」
知州隱隱覺得唔妥，但佢此刻比較關心自己嘅身份會唔會被識破，而唔駛用腦嘅未審先判就最簡單安全嘞。
師爺重提案情：「林X榮狀告張公子兩年前以正當手法購入豬場……」
豬肉榮氣結，粗聲指責：「張公子夾硬搶走我林家、李家同陳家嘅豬場，自恃一人壟斷豬肉業，抬高豬肉價格，而家就連我豬肉榮都食唔起豬肉呀！」
圍觀嘅人紛紛鼓噪抗議，「張公子當初明明承諾人人有豬食！」
張公子冷笑，瀟灑地張開風景畫折扇，煽一口風引火：「我咪派過甜頭囉，我又冇講過一世都賣咁平。」
「反口覆舌！」「欺壓百姓！」強壯如大象嘅衙差努力擋住想衝入嚟嘅蟻民。
知州前半生向來低頭做人，不問世事，工錢低到連咸魚都冇錢買，此時先知近排鄉親父老嘈嘈閉，原來係為咗呢單案。
場外群情洶湧，呢種聲量，怕且衙門外都聚集咗唔少人。縣老爺望向知州，嘴唇微動而唔敢出聲，免得越俎代庖。
侍衛打個呵欠，單手叉腰，再畀指令：「拍驚堂木，叫大家肅靜，先打豬肉榮三十大板。」
「大人仲成碌木咁？快啲判佢有罪啦！」豬肉榮抬頭指罵，口沫橫飛，正正就係昔日呼喝自己手腳慢嘅語氣，知州諗起昔日恩怨，一一遵照侍衛嘅吩咐。
群眾屏息，睇住牛高馬大嘅豬肉榮被打得板板大叫。
打得好！知州覺得心中悶氣，終於有個出口。佢早就放低手袖，驚堂木喺佢手上，係比一切都強大嘅護身符。
「原告明明係我，你係咪有病呀？」豬肉榮越打越口硬，咬牙咧嘴忍痛。
十板後，知州覺得出夠氣，廿板後，氣球一旦唔谷氣就攤軟，佢開始皺眉頭，覺得自己去得太盡。
「停手……」佢擺擺手，打得起勁嘅衙差以為自己對耳有毛病。
侍衛碌大眼望住唔受控制嘅傀儡，執返個彩，「大人愛民如子，今次算係小懲大誡。」
此時，張公子呈上買賣合約，「白紙黑字寫到明，豬場由我全權操縱，我鍾意啲豬賤過賤民又得，貴過貴族都得！」
「係……係你迫我簽嘅……」豬肉榮細細聲。
「如果係強迫，隻龜會潦得咁靚？」
紙上簽名的確唔係一隻普通嘅龜，畫得精緻，連龜殼上紋理、頸紋等細節都唔放過！
侍衛嘲諷：「賣豬肉係副業，畫家先係正職！」
百姓眾口發出疑惑之聲：「乜唔係強搶㗎咩？」「原來係佢為咗利益，賣晒啲豬！」「我哋畀佢害得好慘！」
有啲比較理性嘅人就話：「大家咪自亂陣腳，邊個係豬場主人唔緊要，最緊要豬平！」
張公子氣定神閒，「總之我當初畀足錢，咪以意扮慘就等於有道理。知州，你應該知我係邊個呀呵？」
群眾萬口一詞：「知州大人請你為老百姓討回公道！」
張公子笑聲震耳，「冇你哋當日罷買豬肉，我邊可能以低價買斷豬場？你哋一個二個唔記得咗喇？」
百姓一時語塞，有人轉移視線：「縣老爺嘅兒子唔係大晒㗎！知州官階更高，一定可以分清黑白！」
侍衛命令：「判豬肉佬誣告，拉佢入獄，張公子無罪釋放。」
萬雙眼睛凝望自己，知州吞一啖口水，壓力之下，急到暈低！
（待續）
鍾意請LIKE & SHARE XD
#余該隱 #短篇 #小說 #廣東話 #短篇狂想 #短篇小說 #高官 #撞車 #頂包案 #古人大哥
