垃圾佬車撞高官（下）：

（上）：https://goo.gl/KBXQUk
（中）：https://goo.gl/zJcFuP

暈低後，被抬到衙門休息室床上，知州趕走晒其他人，獨自面對內心掙扎。

豬肉榮同自己嘅過節微不足道，而佢之前賣豬冇謀取暴利，實在罪不至此。如果自己錯判好人，豈不是成為人民公敵？

但只要夠自私循照上頭指令，就可以得到一筆打跛腳唔洗憂嘅報酬，仲駛乜理其他人死啫？

「捨得醒喇？」侍衛入房閂門，「啪」一聲將佩刀擲到枱面上。

知州睜開眼，惶恐嘟嚷：「咁多人，我嚇到暈……」

「出去判完案，我同你就各行各路。」侍衛遞上一大袋黃金，「有咗筆錢，你去第二度過咩生活都得。」

知州喃喃自語：「一定要咁判？」經此一役，睇怕老百姓以後唔止為間屋打工，仲要為豬打工。

「結果一早注定，你只係執行嘅人。」

個人利益同社會公義嘅衝突，有時候可以好簡單解決到，只要決定權唔喺自己身上就乜事都冇。

「更何況一紙合約證明買賣合法，依法判決，仲有咩好猶豫？」侍衛語氣極唔耐煩。

知州嘆氣搖頭，接過重甸甸嘅報酬，再度重返公堂。

圍觀嘅百姓越嚟越多，彷似一隻隻等待被餵養嘅白羊，疲倦的雙眼帶著期望。

知州聽從侍衛嘅每字每句，喉頭攪出一把被壓搾得乾涸死沉嘅聲音，「我……本席宣判林X榮誣告，張公子無罪……」但佢選擇將刑罰攪碎。

侍衛立即保護知州離開，以為事情終於告一段落，但豬肉榮突然衝上前，即使鎖上腳鐐，依然健步如飛。

佢捉住知州雙臂，瞪大眼，張鼻翼，聲音沙啞，「大人，以後我哋全縣人點過日子呀？」

說罷，佢忽然跪倒在地，不斷叩頭，「我只係一時貪心，求你畀返啲豬我啦！」數千百姓亦同樣下跪。

知州心一熱，衝口而出：「張公子以後不得賣貴豬！」

百姓歡呼，張公子見親爹一臉愕然，唯有自行反駁，「你暈低嗰陣撼親個頭？邊條法例規定——」

師爺剛剛寫完判決，拎住毛筆嘅手縣於半空，「律令的確列明商人不得囤積居奇。」

張公子塊臉黑過黑毛豬，侍衛急急扯走知州，「大人唔舒服，聽日再下最終判決！」

客棧廂房窗前，月光高掛，刀身再度將明月光照落知州一張臉上。殘眼嘅黃光，照得知州緊閉眼瞼，一副慷慨就義嘅模樣。

才怪！其實知州驚到騰騰震，懊惱自己噴出一口難以清理嘅米田共。佢好似大解時冇草紙嘅人一樣，困於糞坑，心裡冇咗主意。

誰知舉刀威脅嘅侍衛更加心驚膽跳，佢發現眼前人根本完全唔似死咗嘅知州！

侍衛喘氣，只怕隨時東窗事發，此人反而會成為頂證佢嘅重要人證。

莫非要殺人滅口？如果而家畏罪潛逃，大概走唔遠就會畀人捉返轉頭。

刀半落之際，門突然被撞開，店小二拎住一大盆洗臉水，被眼前嘅定格畫面嚇得面容扭曲，「小……小人入錯房！」

小二後退，冇手關門，覺得一走了之又唔妥當，竟然走回頭，將水盆捧回房間。

侍衛用刀攔住不幸撞破秘密嘅小二，小二立即搖尾求饒。喺忽明忽暗嘅燭光之下，侍衛以為自己眼花。

此店小二先係同原裝嘅知州一模一樣！

恐懼同狂喜令侍衛喪失理智，一刀斬殺夜香佬，亮出黃金，對小二重施故技。

「同我做場戲，你就可以發達。我同你，都只係一隻棋。」

夜香佬頭顱墮地，滿腦子嘅掙扎心死不息，化為一條條血柱，四分五裂流向大門出口，卻被一塊抹枱髒布截斷未來，融回一灘無思無想嘅血泊。

（完）

〈夜，不被彈鐘的第一個人（上）〉：https://goo.gl/965GwU

#余該隱 #短篇 #小說 #廣東話 #短篇狂想 #短篇小說 #高官 #撞車 #頂包案 #古人大哥