垃圾佬車撞高官（上）：
深夜，馬車喺街道上極速而行，路上突然閃出一人，兩馬舉起前蹄急煞，馬車失衡翻側。
車籠裡兩人一死一輕傷，死者係被臨時委派到呢個縣嘅五品知州，倖存者係佢嘅侍衛。
「大……大人！」保護不力，就算呢刻死唔去，都一定會被問斬，侍衛悲哭，滾燙嘅鮮血燒乾佢嘅理智。
侍衛手腳並用企起，興師問罪。路人早就被雙馬嚇到撻咗落地，仲未識反應，任由侍衛揪起其衣領猛搖。
「你對狗眼放喺邊㗎？衝出嚟托咩？」侍衛大怒舉刀，刀身映照明月光，月光反射到路人嘅鄉下臉上，照得一乾二淨。
世事點會咁巧合？此人嘅相貌幾乎同大人有八成相似！
侍衛嚇得後退幾步，拋開刀，差啲叫出一句「鬼呀！」
路人於泥沙地上爬上前，對侍衛又跪又拜，「大爺饒命呀！小人剛才倒緊夜香，未有留意路面情況……」
加埋把聲直頭似足九成，侍衛望望屍體，又望望活人，覺得自己如果仲唔曉變通，就簡直糟蹋上天對佢嘅憐憫。
「好！我唔殺你，但由而家起，你條命就係我嘅，要聽晒我話！」侍衛亮刀威脅。
路人被迫點頭，但聽到要求，又嚇得耍手擰頭，侍衛再次目露凶光。
「唔係哩大爺，小人喺呢處倒夜香已久，鄉親父老都識得小人，小人點扮作他人呢？」
侍衛為保命夾硬嚟，「總之今日死嘅人係『你』！」佢脅迫路人同死者調換衫，更將夜香抹落『夜香佬』臉上，諗起知州一路以嚟虧待佢，暗叫爽快，抹多兩錢肉緊。
佢將腰帶綁於樹上，偽裝成一宗厭世自盡案。
然後，佢扶好馬車，將『大人』平安帶到客棧，再幫佢沖走一身臭味。
夜香佬本來尚有抗拒，但佢成世人從未瞓過如此香軟嘅床、用過如此溫暖嘅水，瞓醒仲有成枱美食同元寶等住佢，佢開始相信前半生只係夢一場，而家嘅佢係達官貴人。
離開廂房，就見到當地幾名大財主帶住一箱箱禮物恭迎。
侍衛喺佢耳邊畀指示：「你只需要點頭，乜都唔好講。」
知州照做，侍衛循例擺擺姿態，「大人為官清廉，各位好意心領喇。」
「大人當然係難得嘅清官啦，但呢啲只係地方土產。」財主紛紛打開箱，箱內金光閃閃。
知州雙眼放光，問得唔經大腦：「統統都係你嘅？」
「係老百姓為大人奉獻嘅。」財主咧嘴笑，「大人，我兒子今年想考狀元——」
侍衛以責備嘅眼神望一望知州，「既然係土產，就放上廂房啦。大人要趕住去衙門，失陪喇。」
知州坐上馬車，大搖大擺喺街道上巡遊。途人讓路之餘，更投以注目禮，大叫：「歡迎大人！」
莫講話高人一等，連同其他人平起平坐，知州都未試過，難免擔憂多於喜樂，「一入官門，必有惡運，我哋都係調頭啦！」
「有惡運嘅唔係你同我咪得囉。」侍衛望住平民，不以為然，「頭先收到嘅金銀珠寶，分一成畀你嘞。」
「但我……我唔識字，又唔識講嘢……何德何能代替知州大人呢？」
侍衛哈哈大笑，「咁就啱嘞！你伯爺發咗達，上個月用錢買呢個職位畀你，仲畀錢我做你對手同你個腦。
「你要做嘅嘢好簡單——坐定定乜都唔做，然後判案。」侍衛心諗，呢次過到骨，佢就會帶住筆橫財消聲匿跡。
嚟到衙門，縣老爺及大批民眾已經恭候多時。
安頓好，知州上茅廁，侍衛半步不離佢身。糞桶旁，某卒仔同阿頭匯報：「有人發現倒夜香嘅大叔自殺死咗，駛唔駛調查下？」
知州心一寒，侍衛豎起雙耳。
「你好得閒咩？快快趣埋咗佢，搵過嗰人做嘢啦。」
知州心更寒，侍衛綻開笑臉，溫馨提示：「岳高個頭，畀啲自信，你嘅人生而家先開始。」
（待續）
FB Page Like數達276人，就星期三出續集，否則星期五 XD
〈扶手電梯殺人事件〉：https://goo.gl/NRQ4dC
#余該隱 #短篇 #小說 #廣東話 #短篇狂想 #短篇小說 #高官 #撞車 #頂包案 #古人大哥
