都話咗做酒店自助餐，最易有工返。我喺個app篤兩篤，隔幾日就返得工喇。
嗰日係我第一次返酒店，乜都唔識，晨咁早起身，著曬西褲、皮鞋，帶住有餐好嘢食嘅心情返工。
喺酒店保安室拎張紙仔寫明幾點返工，就去拎制服。又恤衫又圍裙又腰帶，幾萬條帶唔知左搭右定右搭左，身邊又冇同事，我唯有用常理自己綁。
去到經理房，果然「常理」通常都係錯嘅。經理教我著返好制服，仲叫我掛啲印住酒店Logo嘅襟章上身，仲有名牌添。
我一睇啲名牌，嘩！「Mary」、「Tom」、「Betty」、「Peter」……唔講，我仲以為打開咗本小學英文書。喂！Beeno呢？唔通因為酒店冇得打邊爐就排斥佢？
我梗係搵唔到自己個英文名啦，唯有袋住個唔屬於我嘅名牌先，真真正正為咗返工，連自己都冇埋。
一入餐廳，死火！原來已經有唔少客開緊餐，其他同事已經忙住執枱、執碟、加水……
經理見我成碌木咁，就話：「仲企係度？見到邊個客食完嘢，幫手收碟啦。」
原來冇人Briefing㗎！Oh no！
完全未做過就即刻落場，我真係淆一淆，做咗唔少柒事：
見個鬼婆停曬手，我就驚冇嘢做，唔止收咗佢個吉碟，仲收埋佢啲刀叉。事後先知，原來我將佢用過嘅刀叉放返落乾淨刀叉區。（對唔治呀！）
我唔識用個咖啡壺，以為要扭開個蓋先可以倒咖啡出嚟，原來上面中空，就咁倒就得，搞到姐手姐腳。（對對唔治呀！）
執新枱嗰陣，我鋪完張墊枱紙，就徒手拎住啲刀、叉、匙行嚟行去，今次終於俾人鬧：「搵個托碟放住啲刀叉啦，啲客俾你嚇死喇！」（對對對唔治呀！）
將擺滿曬污糟餐具杯碟嘅車仔，推入洗碗房，再逐件分類放上洗碗盤個陣，全日打爛咗兩隻杯。（經理見唔到，唔駛講對唔治啦。）
就係咁，錯錯吓就過咗半日，到落場食飯。
做飲食界最好係包飯，有幾大盆餸菜、大大桶白飯任裝，仲有靚湯。
我同同事同枱零交流。正所謂今日唔知聽日事，Social嚟都嘥Gas屎。
食完飯，同事叫我Fill嘢，要每一枱嘅調味料架都有六包白糖、六包黃糖，啲牙籤要塞滿佢。咁悶又唔駛用力嘅工作，我就最鍾意做，仲要慢慢咁做。慢工出細貨，扮工男女你哋識㗎啦！
午餐時段到，啲客開始陸續嚟。今日客極少，我收咗陣碟，經理費事場內咁多Staff，就叫我拎塊布去第二度抹下。抹抹下，又半日喇。
我以為就收工，點知原來仲要倒垃圾，倒完就要放個新膠袋。
我全日最大嘅得著嚟啦：要令個垃圾膠袋，唔會因為掉掉吓垃圾而瀡落嚟，就係要將佢打開放入垃圾桶後，將佢嘅開口翻出嚟，再係垃圾桶邊緣位綁個結。
媽咪！我以後喺屋企都識得咁綁喇！雖然掉垃圾係我永遠唔會幫手做嘅家務（但我會煮飯、拖地同洗自己隻碗囉）。
之後，仲有Fill返啲巨冰入去供食物區，俾啲冷盤、生蠔用，呢樣嘢最好玩，好似去咗冰極世界咁，成個冰櫃啲冰任我舞。
就係咁輕輕鬆鬆，就搵咗五舊水，點都好搵過做臨記啦。
大時大節，人工仲高，記得有次喺某會所餐廳，有成90蚊一粒鐘㗎！點知後尾打風取消咗，Sosad！
（完）
鍾意嘅，請Like & Share！
〈個天話我涼薄，要收返我有嘅嘢！〉：https://goo.gl/t6s3fG
鬼叫我炒散「千祈唔好同朋友講人工！」：https://goo.gl/JPS8YH
