琴日佢約我夜晚食飯。去到佢公司樓下接佢嘅時候我已經feel到佢非常down，大概佢男朋友又同佢講分手。
果然，飯食到一半嘅時候，佢突然流左幾滴眼淚然後同我講『佢琴日話要同我分手，今個月已經第二次啦。』
我遞左張紙巾俾佢，其實我好想幫佢抹走啲眼淚，但我好驚佢介意。
佢拿左張紙巾抹走眼淚之後繼續同我講訴苦。佢每講幾個字就流幾滴眼淚，每講幾句就大喊一次。
見到呢個畫面，我終於忍唔住。我捉住左佢只手。佢好愕然，想缩開咁，但我捉得好實。
然後我同佢講『你同我一齊好無？其實我一直好鍾意你。』
佢好似聽唔明我講咩咁『你話咩話？』
我答佢『個賤人隔幾個星期就同你講一次分手，你同我一齊我一定唔會咁對你嘎！』我好似有少少大聲。
佢突然好激動咁講『你識佢咩？你好了解佢咩？你以為你係邊個啊，你係一隻兵咋！』
佢講完呢句之後我潛意識咁鬆開手，然後佢拿起手袋就走左。餐飯一樣係我請。
翻到屋企我即刻訓左係床上面，涼都無冲，因為我淨係想攤係度。唔夠十分鐘我就訓着左。
第二朝，即係今日。我起身睇電話見到幾條佢發黎嘅message，大概係同我講『sorry啊，我琴日火遮眼亂講野。你唔好擺係心度。仲有你同我講嘅野我會好好考慮。』
我好清楚佢淨係想keep住我呢只兵先會咁講，所以我覆佢『傻啦，你琴晚講咩我都唔記得曬lu。而且做兵咋嘛，好閒嗻。你唔只我一只兵我都唔係淨係得你一個娘娘嘎嘛。』
我同啲friend講佢地都以為我係死頂，但講真呢個年代做兵幾咁閒。行出街隨時你以為係情侶嘅其實都只係兵同娘娘嘅關係。所以我真係覺得無咩大不了，no big deal。
我個故事唯一嘅特別之處咪就係收我兵嘅娘娘係我識左20幾年嘅青梅竹馬。電視劇都未演過呢個橋段，你都咪話唔犀利。
一個星期之後果然又不出我所料，佢係facebook度update佢地复合。不過今次我真係無曬feel，因為我真係覺得自己其實都無想像中咁鍾意呢個人。
退役之後我覺得自己生活仲精彩左。因為無左娘娘嘅關係我同其他女仔出街頻繁過以前，雖然有啲時候去娘娘公司附近啲餐廳會間唔中撞到有少少尷尬。但無計娘娘公司附近啲野真係好食啲。最搞笑係出街多左嘅關係近一兩個月電費都平左。我都開始越黎越唔介意同娘娘有翻少少互動，間唔中見到佢facebook update都會like下comment下。
啲朋友見到我咁終於肯相信我真係放低曬，話要請我食飯唱k慶祝下。其實我一直強調自己無野，但佢地唔信。不過有人請食飯唱k，why not？
『運氣不夠 牽不了手 也算得今世獨有 對你太好怎會累透 對你再好不會廝守』
啊Don同Annie唱完Stephy同万刀甲嘅我的最愛。
『下一首到邊個啊？』湯瑪斯王問。
『下？呢首，唔識喔』好多人都唔識
『哦，咁既然無人識，next咯』湯瑪斯王話
『咪住，呢首我識啊。等我唱啦』我自告奮勇。我唔知到係邊個撳錯制揀左呢首歌，但唔知點解我好想唱。
係一段熟悉嘅口琴前奏響起之後我開始唱
也不是真的不會想你
全都不是真的是騙自己
其實還愛你 愛著你
我以為我早想清楚
不由自主恍恍惚惚
又走回頭路
再看一眼有過的幸福
愛情好像流沙 我不掙扎
隨它去吧 我不害怕
愛情好像流沙 心裡的牽掛
不願放下 oh baby 讓我這樣吧
愛情好像流沙 我不說話
等待黑暗 淚能落下
愛情好像流沙 明知該躲它
無法自拔 oh baby 是我太傻...』
唱完之後佢地望住我話『我從來都無發現原來你唱歌咁有感情。呢首歌叫咩名啊？』
我答佢地『你地居然無聽過陶喆嘅流沙...』。
