點解成日有咁多人做死一世兵都得唔到娘娘嘅青睞、關注？根本“兵”呢個字嘅含義已經說明一切。
當兵最重要係咩？遵守紀律。但遵守紀律最大問題係咩？人人都識咯。
當然跳過做兵呢part就最好。但做娘娘隻兵唔係最大問題，最大問題係你做一隻聽話嘅兵。
呢個世界就係咁，遵守規則嘅人係唔會得到重視。所以作為一隻兵嘅你唔得閒搞下革命娘娘亦係唔會關注你嘎。
你幾時見過一個識得1+1=2嘅小學生俾老師特別表揚或者關注？因為呢啲野係老師眼中係應份嘎。
就好似你隨傳隨到呢啲野娘娘係唔覺得你有咩特別亦唔覺得你有咩好，因為有邊隻兵唔係咁嘅嗻？
你係佢眼中只係一隻訓練有素嘅兵。你最多咪做到今個月最任勞任怨最勤力潛力兵，下個月繼續努力。

唔好以為潛力兵就有機會晉升。娘娘話你有潛力同科學嘅潛力一樣都係無咩意義嘎。有潛力無得釋放咪谷住谷到死咯。
做兵最失敗就係認為自己要做嘅係討好娘娘所以用盡辦法對佢好。
但根本隻隻兵做緊同一樣野。可能你今日送只精工手錶俾佢，佢今晚就係facebook post只勞出黎然後tag你戰友。
要做一隻成功嘅兵就要係隊伍上突圍而出留下一個印象。
如果佢下次肚餓要食宵夜，你送外賣唔緊要。但問佢收翻錢。
係，呢個唔係一個好印象，但至少係一個印象喔。係脫離兵嘅設定嘅第一步。
你可以唔收十足，但油費的士費都收翻啦大佬。
唔好俾佢果啲懶過唔開玩笑咁『做咩嗻你，玩野啊』嘅態度動搖你，強硬地收外賣費。
食飯唔好餐餐自己俾，間唔中要求AA，或者無賴啲咁要佢請。
因為有無發現女人特別鍾意無賴嘅男人，重要係無賴得好瀟灑果只。
但如果你好唔好彩咁遇到一個無人性，只為收兵而收兵嘅娘娘。你一反抗就即刻被退伍嘅說話，即刻沽啦兄弟。

其實做兵最大嘅錯覺就係當自己真係兵，淨係serve娘娘。
宜家唔係打仗，唔係你犧牲自己幾多人地就記得幾多。拍拖呢家野係雙向。
你有無咁鍾意一個人鍾意到預左無回報都任勞任怨？
最重要係你要鍾意一個人到咁偉大係需要同佢有經歷先做到，理論上呢種經歷係唔會同一個淨係想收兵嘅娘娘發生。
呢啲淨係收兵嘅女人，行出街都四五件。
兄弟，退伍啦。做一個正常人，唔好再做兵。