今日隨機播住手機入面嘅playlist，突然播到梁文音嘅《分手後不要做朋友》。
呢首歌本來只係好普通嘅一首pop/k歌，但黎到我隻耳入面就有另一種感覺。
就係一年前呢個時間左右因為聖誕同新年假期就黎結束要翻去相隔一個鐘飛機距離嘅大學宿舍開始第二個學期。
係上飛機嘅前一日我鼓起勇氣終於同一個我一直有好感嘅高中同學表白，結果當然係全軍覆沒。
就係果一晚我好失落翻到屋企完全唔想講野。開左電腦跟住係youtube求其click左入梁文音嘅《分手後不要做朋友》度。
對上一次係youtube聽呢首歌覺得普普通通，但呢一次唔知點解覺得特別傷心。明明無開始過又無分手，根本同首歌無咩關係。但就好似懶有共鳴咁。
我將首歌loop左一晚。第二日去機場又loop。飛機上面繼續loop。
聽住首歌果種感覺唔知點形容。好似要離開去另一個地方重新開始，但又好唔捨得。相處左咁耐一啲用都無。
過左一排之後都無特登再搵呢首歌黎聽。但每次再聽到嘅時候，俾我嘅感覺同果幾日聽嘅時候基本上一樣。
雖然已經放低左果個人亦都唔再鍾意，但失落感迷惘感依然係度。
如果話寫日記係記錄住發生過咩事，咁音樂一定係記錄住當時嘅感覺。
無論隔左幾耐自己改變幾多都好，每次聽翻同一首歌都會有當時嘅感覺。
所以今晚又再聽到呢首歌嘅時候感覺依然無辦法形容。
但我好似仲未知道點面對呢段唔開心嘅記憶。雖然唔開心，但又唔捨得刪除。
所以雖然首歌唔係特別好聽，但係珍惜果種感覺，唔捨得將佢係手機移除。
我相信好多人都有幾首歌會特別令你捻起一段時期或者一個事件。而大家都唔會捨得將首歌移除，因為就算係一段唔開心嘅回憶，佢都係重要嘅過去。
