我前排係度捻，其實呢個世界係公平嘅。主流明星黎講，實力派永遠唔好睇，偶像派永遠無實力。
嗻係若果你好有實力咁你肯定唔係幾好樣，若果你生出好好樣咁肯定無咩實力。咁實力派同偶像派只可以選擇一樣，你會點形容你最鍾意嘅明星啊？
佢係一個好樣衰嘅實力派？ 定係一個淨係得個樣嘅偶像派？ 真係好難揀。但世事無絕對，只要肯倔服。我地好清楚有第三個選擇，就係承認自己鍾意嘅明星係一個整左容嘅偶像派。
講到整容呢樣野我都必須要問下追星一族，點解會覺得自己偶像無整過容？若然你idol淨係打下botox，五官無明顯改動變化，咁okay，我信係化妝同後期效果。
但有啲係明顯兩年後個嘴向上移左幾毫米，都會有人話人大左個樣會變。我就未見過有人五官係識移動嘎。
嗻係你間屋翻新過，朋友見到問起你都唔會話『無整過，可能住得耐，條柱自己移左過去咯。有張梳發頂住唔舒服啊嘛，唔舒服咪換下位咯。』真係好離譜下啊。
但講翻偶像實力派，究竟有無真係純天然，生出好睇又有實力嘅人？ 但記住係生出好睇啊下，嗻係果啲靠後天努力嘅外貌係唔算嘅。

我捻左好耐，捻到嘅都係身邊重要嘅人。 大家可能唔發覺，但其實身邊嘅人都係我地嘅實力偶像派。
細細個係阿爸阿媽，大個左係先生/太太。
首先你唔會話自己阿爸阿媽樣衰啦，因為如果有兩個人好樣衰，而佢地又係你阿爸阿媽，咁你覺得自己樣唔樣衰？
所以無人會話阿爸阿媽樣衰，因為阿爸阿媽樣衰就自己都樣衰，無人會認自己樣衰係咪。所以阿爸阿媽一定唔樣衰。
你另一半都一定唔樣衰，因為如果你另一半樣衰除左你無face同taste之外仲連累埋你啲仔女。你另一半一定唔樣衰，你阿爸阿媽又唔樣衰，咁佢地肯定都係偶像派啦。
但偶像派係咪等於無實力？
細細個我地就覺得阿爸係偶像，阿爸做乜都係啱嘅。阿爸若果踩單車，咁單車一定係最潮最型嘅交通工具啦。
你知道隔離小明阿爸寶馬你唔會妒忌，你只會同小明講『叫你阿爸因住食ticket啊。』
就算我阿爸行路，隔離屋小明阿爸開戰鬥機，我都會覺得阿爸日日行路翻工，可能行多兩年都可以參加馬拉松啦。啊媽就算煲窿粥我都會覺得阿媽啲粥窿得好食過隔離小明阿媽啲無窿到嘅。
我地細細個就係咁自豪，覺得阿爸阿媽一定唔會錯。唔會錯，有點可能無實力？
大個左我就算自己結左婚，對住另一半都永遠好似當年對我阿爸阿媽咁。
你先生就算開車行錯方向，可能附近有個加油站，你會話『行左咁耐係要加下油啦』，又或者前面就係休息站，你會嘈住肚餓食野去廁所。
你太太今日脾氣特別燥？咁係佢有要求嗻。佢無理取鬧喔，咁佢咪有獨特嘅要求咯。
係我地眼中我地另一半同阿爸阿媽都係無缺點唔會錯，咁一個無缺點嘅人有點可能唔係實力偶像派呢？
所以如果翻到屋企你太太今日無拖地，唔需要發脾氣，因為你知道去今日煮嘅飯一定特別好食。
你先生今年可能買唔到最新嘅手袋俾你，無所謂，最緊要係佢肯儲錢下年買個限量版嗻。