大家有無捻過，其實特色究竟係乜撚野黎？巴黎鎖橋，浪漫又有特色。幾多情侶特登飛去巴黎就係為左用把鎖去塔住條橋？
但我就唔明。啲人話用把鎖條柱條橋係象徵住愛情永恆堅固。但鎖同鑽石邊樣堅固啲？點解用鎖唔用鑽石？咁係咪諷刺黎？
嗻係『我對你嘅愛情就好似把鎖咁堅固，只要有個三圍都出眾過你嘅女士出現，咁佢一箝，把鎖就爛嘎啦。』
嗻係如果用一把鎖去代表愛情嘅堅固，咁我要破壞你地就好似偷一部單車咁易嘎咋。
但當然唔係為左諷刺啦。現實咁講其實就係買唔起鑽石用鎖代替咯。但呢啲咁現實嘅理由遇上一個現實中嘅女人點可能work？
嗻係結婚戒指你都唔會買唔起鑽石就收把鎖頂住當先啦。所以我地必須要用一個童話式嘅理由黎backup我地現實嘅理由。

我相信第一個塔把鎖係橋上面嘅人，當時一定係咁嘅情形。
『嗱，我將呢把鎖寫上我地個名，塔住係條橋上面就像徵住我地嘅愛情永遠都咁堅固。』
『下，咁點解你唔買只鑽戒俾我。鑽石堅固過把鎖啦。』
『我咁做係因為我地嘅愛情唔需要用金錢去證明，簡簡單單一把鎖就足以見證到我地堅固長存嘅愛情。』
好神奇，但係就算幾精明嘅女人都會俾呢啲咁嘅野fake到。而之後當呢個故事傳左出去，女士覺得好浪漫，男士覺得好悭皮，個個跟住做就有我地今日嘅鎖橋。
當然，我地知道鎖橋來源其實係一本小說。但就算係咁，如果小說入面嘅主角唔係掉鎖匙係掉戒指，成件事都根本係唔會發生。
所以一樣野只要有人覺得值得跟住做，又做得起，佢就可以變成一個特色嘎啦。
大家捻下如果條橋係得一把鎖係上面啲人會點捻？『梗係唔知邊條傻佬做嘎啦。』
但如果有人覺得呢把鎖好浪漫跟住做，之後越黎越多人跟住做，到最後啲人嘅捻法就會改變，變成『你唔做你就係果條傻佬。』
所以如果你想一樣平平無奇嘅野變成一種特色，不妨試下賦予一個特別嘅故事然後吸引更多人一齊做。
如果你想將抹窗變成三月三號嘅特色傳統。
你可以話『傳說呢度以前有個賣火機嘅男仔，係寒冷嘅晚上佢都繼續出黎賣。但好可惜無人肯用一個幾毫買火機，唯獨一家人，買曬所有嘅火機叫男仔翻屋企。
男仔臨終都記得好清楚呢家人個窗係特別乾淨。所以從此就流傳住三月三號抹乾淨個窗男仔就會保佑你嘅故事。』
而如果有一個特色只局限你一個人，咁就佢就係你嘅特點啦。