《創世記》第一章
創造天地萬物
起初，眾神創造了眾天和一塊地。
有啲人可能會問，點解第一句變成「眾神」呢？中文《和合本》嘅《創世記》第一句，明明譯作「起初，上帝創造天地」，而且基督教強調一神論，不過我譯呢句時，係依照《舊約馬所拉文本》，希伯來語有分單數同眾數，翻譯時應該要寫清楚。原文裡面嗰個「神」字係用咗elohim，即是一神（eloah）的陽性眾數。
呢個問題當然又有排拗，有啲聖經學者話，希伯來原文嘅「創造」動詞寫成bara，即係陽性單數動詞，按佢哋個理論，眾數名詞 ＋ 單數動詞，唔係文法錯誤，而係所謂嘅「顯赫嘅眾數」（pluralis excellentiae），即係好似英女皇自稱「朕」時，英文用we（我們），呢種則叫做「尊嚴嘅眾數」（pluralis majestatis）。
不過我哋之後睇番《創世記》第二十章第十三節，提到嗰句係「神（眾數名詞）叫（眾數動詞）我離開父家」。喺《創》第三十五章第七節咁樣寫：「神（眾數名詞）在那裡向他顯現（眾數動詞）」。喺《申命記》第五章第二十六節咁寫：「曾有何人聽見永生（眾數形容詞chay）神（眾數名詞）的聲音從火中出來……」。 按希伯來語的習慣，其實指的，就是眾神。
有啲人可能覺得我係度玩文字遊戲，吹毛求疵，但基督教嘅一神論，係全個教義裡面最核心嘅核心理論，你唔解釋清楚經文裡到底指嘅係一神定係多神，又點樣討論落去呢？不過聖經學者當然有好多解釋，有啲人話因為聖父聖子聖靈三合一，所以係眾數喎，雖然《舊約》裡重未出現呢個概念，同埋你飲雀巢三合一咖啡，都係當飲一杯，唔通當三杯咩？有啲人覺得點樣都無辦法自圓其說，咁最簡單嘅方法，就係直接喺譯文裡把眾數改為單數，例如英文《詹姆士王譯本》，用God，而不是Gods。希臘文《七十士譯本》，眾神譯作單數的θεὸς（單數名詞theós），而不是θεοί（眾數名詞theoí）。至於中文的譯版就更加簡單易氹，直接用「神」字，反正中文的神，你指一神或者多神，求求其其都係差唔多，邊個得閒去理啫？我喺下面寫嘅「神」，「上帝」，「神明」等詞，大多都其實係眾數。
《創世記》第一句都寫咁大段，後面就有排講啦。都係講番眾神創造多天一地嘅故事，但係講之前，再補充一下啦，希伯來原文裡面，天係shamayim（眾數名詞），地係aretz（單數名詞），為咗顯得精準，所以呢度譯作「眾神創造咗眾天和一塊地」囉。
講番聖經版本嘅創世過程，啱啱開始嘅時候，地係空無一物嘅不毛之地，原始海洋嘅表面黑麻麻，上帝嘅靈係原始嘅海洋上面盤旋。至於點解神乜都未創造，就會出現一個原始海洋（希伯來原文為tehowm，細少少嘅海叫做yam，例如地中海），咁或者上帝創造之前有另一個上帝創造呢個原始海洋啦，但咁樣講就違反咗基督教義。正所謂聽古就唔好駁古，繼續講落去。
上帝話：「要有光！」就有咗光喇。係啊，雖然重未有太陽、星星同月亮，但就已經有光，眾神造物，快人一步。當然，有啲聖經學家對於點解先有光，先至會有太陽，都有啲只有乜都信餐懵嘅教友先會相信嘅解釋，呢度就唔多講，否則有排都未講到第七日。
神見到光咁美好同良善，就將光同暗分別出嚟。神宣佈光為朝早，暗為夜晚。夜晚過咗，又到早晨，呢個係第一日。講到而家，要開一個新行，因為喺原文裡面，呢度寧寧舍舍有個分行符號（petuhah פ）。
上帝話：「水嘅中間應該有廣闊嘅穹蒼，將水分成上下。」神就造成空氣，分開咗空氣以下嘅水同埋空氣以上嘅水，事情就係咁。神稱呼穹蒼做一眾天空，有夜晚，有早晨，咁就係第二日。
上帝話：「天底下嘅水要聚埋一齊，露出乾旱嘅地方。」就係咁。上帝叫嗰啲乾旱嘅地方做「地」，至於水聚埋一齊嘅地方，就叫做「海」。神睇到，覺得好正。上帝話：「地要生青草，以及有種子嘅菜蔬，同埋有果子而嗰啲果子又要有種子嘅樹，喺地上各從其類。就係咁。於是地上生出植物，含種子嘅青草，各從其類；有果子而嗰啲果子又要有種子嘅樹，各從其類。上帝睇到，覺得好正。有夜晚，有早晨，咁就係第三日。不過話時話，而家雖然有光，但重未有太陽，唔知呢啲「有果子而嗰啲果子又要有種子嘅樹」，可唔可以進行光合作用，可肶佢哋只係寄生植物或者冬菇之類啦。雖然好似有啲啲騎呢，但相比起成本《聖經》，呢個只係小問題。另外都想講一句，你見我不停寫「就係咁」，其實希伯來原文係ken，屬副詞，譯做廣東話，最貼切真係「就係咁」。講番創世第四日，所以又要開一段新行喇。
上帝似乎記起要整番個太陽，所以等到第四日，佢就話：「天上要有發光體，畀佢哋去做記錄，定季節，擇日子，知年份，佢哋要喺天空發光，照亮大地。」就係咁。上帝就造咗兩個大光體，大嘅太陽治理朝早，小嘅月亮治理夜晚，之後重造埋星星添。我又忍唔住離一離題，其實小學生都知道月亮嘅光芒，係靠太陽反射咋喎，月亮本身都唔識得發光，咁點解上帝造咗太陽同月亮，就以為自己造咗「兩個發光體」？唔通《創世記》嘅一班作者以為月亮可以發光？又或者，難道全能全知嘅上帝以為月亮可以發光？不過唔應該咁樣質疑上帝，因為你如果連呢點都接受唔到，咁點樣睇得落《聖經》裡面其他觀點先？總之唔好理，上帝造咗兩個大小嘅發光體，一個太陽，一個月亮，重有其他星星，將佢哋擺喺天空，照耀大地，管理日頭同夜晚，分開光明同黑暗。上帝睇到，又覺得好正。有夜晚，有早晨，咁就係第四日。又開一段。
上帝話：「水要迫滿眾多有生命嘅嘢（但呢度唔包括植物，或者《舊約聖經》嘅作者覺得植物無生命啦）；要有雀仔同其他能飛嘅動物飛喺大地上，穹蒼之上。」咁上帝就創造出一種叫「tanninim」嘅東東，至於乜嘢係tanninim，有譯為海怪，龍，蛇，鯨魚，鱷魚，甚至河馬，但係喺中文《和合本》，就話呢個時候上帝創造咗「大魚」，以及各種爬行嘅有生命嘅非植物生物，各從其類。又造出有翅膀的飛鳥，各從其類。上帝睇到，又話好正。神就祝福佢哋，話：「要好生養啊，塞滿海水，雀仔又要喺地上好生養。」有夜晚，有早晨，咁就第五日。呢度講一下，《舊約聖經》裡成日提到「各從其類」，即係話各類生物都有區別，例如牲畜唔可以同異類性交，耕田時又唔可以同時用牛仔同驢仔，做衫又唔可以用羊毛同細麻（或任何兩種質料），但係大細女強姦親父亂倫生仔就無所謂嘅，總之規矩多多，遲啲去到《利未記》以及義人羅得（見《創世記》第十九章）嘅故事時再講吓。
上帝話：「地要生出有生命嘅嘢，各從其類；畜牲，爬蟲，活物，各從其類。」就係咁。於是上帝造咗活物，各從其類；畜牲，各從其類；地上一切嘅爬行生物，各從其類。上帝睇到，覺得好正。
上帝造出一個男人
一神宗教嘅呢位上帝，呢個時候就講咗呢一番話，我都係照番字面咁譯，無加無減，如果唔係咁譯，其實係譯者坤你咋。一神教嘅上帝話：「我哋一眾神明，要照住我哋嘅形像，同埋按住我哋嘅樣式去製造（「製造」原文用咗asah，呢個都係眾數動詞）一男子出嚟，叫佢哋去管理海裡嘅魚，天空嘅鳥，畜牲，以及全部土地，同埋地上嘅爬行動物。」眾神就照著佢哋嘅形像，製造咗一男子（陽性單數名詞，希伯來語就叫adam）。跟住經文忽然又話：「上帝造咗佢哋，有男又有女。」
媽啊，我好亂，按個劇本，夏娃其實要到第二章先出場㗎，點解上帝喺第一章就話自己做咗個女㗎，東方不敗咩？上帝就祝福呢個男人：「你要好好生養（一個男人點樣好生養呢？），生到成地都係，管理好海魚飛鳥以及地上各種生物。上帝話：「睇住啊，我賜畀你哋青草以及所有有果子而嗰啲果子又要有種子嘅樹，全部都食得㗎。」至於其他飛禽走獸爬行動物等，上帝又講：「我賜青草畀佢哋食。」就係咁。神睇住自己打造嘅一切，睇嚟睇去，覺得好很正。有夜晚，有早晨，咁就係第六日。
