上集：https://post.shikoto.com/posts/126837
警察組織咗一場大規模行動，捉咗一班敢死隊。
市民鬆一口氣，但無幾耐，「敢死隊」就成功逃獄，
原來有幾個獄警，發現自己命不久矣，惡念一起，就放晒「敢死隊」出黎，自己都入埋「敢死隊」。
恐慌不斷散播，你永遠唔知，身邊嘅人會唔會因為就黎死，突然發難。
政府想推出措施，要所有公務員使用「我幾時死」，十年內會死嘅，暫時停職。
但呢個措施引起好多人反感，「點解我會早死，就料定我係壞人？唔公平！」
本來我都好留意呢件事嘅發展，直到有一日，我老婆死咗。
佢因為自己有九十歲命，愈黎愈大膽，明知敢死隊出沒，都成日一個人出街，結果就喺混亂中被殺。
我好震驚，佢唔係有九十歲命？點解會咁？
有人話，「我幾時死」只可以預測到正常死亡，唔包突然死亡。
但有幾個人留言，話屋企嘅長輩，比預測更早病死咗，不過呢啲留言無被重視。
到底我幾時死係準定唔準？
直到「我幾時死」嘅研發者被逮捕，真相終於曝光。
研發者係一個黑客，據佢自己所講，係一個充滿正義感嘅黑客。
佢將Apps連接晒所有醫院嘅資料，計算使用者嘅身體狀況，推測出佢嘅壽命。
雖然唔係100%準，但一開始有好多老人家「被準確預測」，
原理都好簡單，一個90歲重病阿伯，預測佢91歲死，中嘅機率都相當高。
無理由架，我明明身體檢查結果都幾好，點解會預測到命不久矣？
黑客話：「我設定咗每一千個健康使用者，就有一個會得出短命嘅結論。」
記者好憤慨：「你呃人，就係為咗令『敢死隊』出現，搞到個社會咁亂？」
「我係想做個實驗，教大家珍惜生命。」黑客個樣好委屈：「『生命中最後的X天』果啲電影，都係話，大家會好溫馨咁度過最後嘅時光，好好對身邊嘅人......點估到件事會搞成咁。」
呢個Apps造成咁大破壞，但黑客嘅罪名，只係Hack醫院資料庫。
至於研發「我幾時死」，根本告唔入，因為個Apps同其他網上算命Apps一樣，有晒免責聲明。
係咪好荒謬？大家都以為，「我幾時死」係乜野邪惡組織嘅大計劃，結果只係有人無聊，好心做壞事。
「敢死隊」個個手上都有好多條人命，就算知道真相，都番唔到轉頭，只可以繼續逃亡、犯罪。
無幾耐，黑客被敢死隊謀殺。
奇怪嘅係，「我幾時死」呢個Apps被醫院採用，用黎預測病人嘅壽命。
新聞大讚：「壽命預測技術，使病人重新規劃人生。」
邪惡嘅，從來都唔係工具，
而係人性。
－完－
