如果你知道自己就黎死，你會做乜野？
辭咗份工，陪住自己愛嘅人，度過最後嘅時光？
我都係咁諗，當我知道自己兩年後會死，我就辭咗職，諗住同老婆一齊去下旅行。
點知一番到屋企，老婆「啪」一聲跪低，聲淚俱下：「我地離婚啦......我知道自己幾時死啦。」
唔通老婆都發現自己會短命？我即刻安慰佢，話：「我唔會嫌棄妳，我地一齊留低美好嘅回憶啦。」
「唔係，我發現自己有九十歲命。」老婆垂低頭：「我以為自己咁柔弱，可能唔長命，同你無乜感情都好快過。但依加成世流流長，諗到要同你一齊多......四五十年，我真係唔想。」
我呆咗，唔知點答佢，我係咪應該安慰佢，我就黎死，所以佢唔使驚？
定係我應該求佢，唔好離開我住，陪我過最後嘅時光？但咁樣有意思咩？
其實，我地搞成咁，都係源於一個叫「我幾時死」嘅Apps。
呢類Apps大家應該唔陌生，輸入某啲資料，然後話你知，你有幾多歲命，就好似果啲「你們的愛情會不會長久」嘅Apps。
「我幾時死」就要入指紋、姓名同出生日期，初初都無乜人留意，咪其中一個算命Apps，無聊果陣玩下。
但大家慢慢發現，「我幾時死」入面個死期，真係準確。
後生仔得出八、九十歲死嘅預測，當然無咁快知真相，但有人畀老人家玩，到「死期」果一年，老人家真係死咗......
愈黎愈多人走出黎，用身邊人嘅死亡，證明「我幾時死」嘅準確度，引起恐慌。
人類真係好奇怪，平時用各種方法算命，到有一日，發現真係可以預測到未來，就覺得好可怕。
好明顯，我同我老婆都抗拒唔到誘惑，去咗睇自己幾時死。
呢件事亦令我知道咗，我地嘅感情事實上係點，
我搬咗番阿媽屋企，但未等我諗到點解決，有一日，我老婆撳門鐘，成身血咁衝咗入黎：「有班人喺度打劫、斬人！」
我想送佢去醫院，但佢話出面好亂，唔敢出去，唯有喺屋企幫佢包紮，好彩佢傷得唔重，多數係其他人嘅血。
「唔使驚，『我幾時死』話你有九十歲命架。」我唯有咁樣安慰佢。
上網一睇，先知道社會上出現咗一班「敢死隊」。
有一班人，用「我幾時死」預測到自己未來幾年會死，無動力正常生活，橫又死掂又死，就出去姦淫擄掠。
「敢死隊」嘅出現，令平時少上網嘅人，都知道咗「我幾時死」，於是更多人知自己幾時死，「敢死隊」嘅團隊繼續壯大。
個世界愈黎愈亂，好多人就算唔做壞事，都唔再番工，
如果你知自己幾年後會死，你仲會唔會朝九晚五？仲會唔會供樓？定會想使晒啲錢，乜都享受下？
