這間位於順利邨的一間官立中學。
於開校後，曾經傳出，學生在校內的課室，因為偷偷進行碟仙的遊戲，令到其中一名女學生精神失常，最後需要送去精神科醫院進行治療！
而有傳之後，那名女生更因為這事件而自殺身亡！

慘劇發生十年後，一名不幸的新生 – 陳子鋒，來到這所校園讀晝！
卻想不到，因為他那好事的性格，竟發掘了這所學校黑暗的一面出來！
而當中，子鋒更差點遭紅衣女鬼奪去性命！
幸好，到了最後，紅衣女鬼成功被消滅了，而學校亦從此回復正常！

本來，學校應該是維持正常的！
怎料十年後，學校又驚傳，有學生看見紅衣女鬼在操場上出現！
到底，這只是一個傳聞？
還是，紅衣女鬼再度復活，打算破壞校園？

二零零九年十月，第一批目睹這怪異現象的，是剛進入這所學校的新生！

自從十年前，紅衣女鬼事件解決了後，學校便取消了六時前，所有人都必需離開的規定！
這對學生或老師來說，也是一件好事，始終很多時候，若有活動或其它重要事情，學校會給予學生或老師方便，留校處理！

而事情，正是一批留校處理學會活動的學生所遇到的！

「喂，阿寧！啦啦隊球D衫整好未呀？」我（鄭伊雯）說。

「D衫唔係我搞架，我負責整Logo！你問下佩儀啦！」阿寧說。

「搞緊啦！俾多十五分鐘我，我應該搞得掂！」佩儀回答。

「要快手D啦，過兩日就係水運會！我地謙社今年啦啦隊又好，比賽又好，都要拎冠軍返黎！大家加油！好，大家再試下頭先排左嘅Slogan！」我作為謙社社長，一定要好好的把啦啦隊訓練好！

「好，大家今日做得好好，兩日後我地照返今日咁就得啦！大家可以解散！」解散了啦啦隊的成員後，我又來到課室，跟阿寧和佩儀檢查那些啦啦隊用具。

就在檢查期間，我們忽然聽到了操場上傳來淒厲的尖叫聲！

我們三人馬上從課室跑到操場上，發現幾乎所有啦啦隊員都聚集在操場上。

「發生咩事呀？」我走到操場上，向其它啦啦隊成員詢問。

「我地都唔知呀，頭先我地係更衣室換緊衫！忽然聽到慘叫聲，出到黎就見到呢個一年級新生跪左係地下度喊啦！」其中一位成員答。

「唔緊要，大家換衫先，呢度等我地黎處理！」我說，然後指示阿寧和佩儀，把那名新生都扶到課室去。

我則到了操場旁的小屋，找那位駐校的校工，要了點熱茶，拿回去給那位新生。

「佢點呀？」我回到課室，詢問她們的情況。

「伊雯，佢地兩個話，見到D唔應該見嘅野喎！」阿寧有點顫抖地說。

「唔應該見嘅野？」我不太理解阿寧的說話。

「佢......佢話，見到操場有個著住紅色衫嘅女......女人行過喎！」佩儀的聲音也顯得有點害怕。

「唔係卦？紅衣女人？」我大喊。

「係真架！我無講大話架！我真係見到有個紅衣女人走過！」新生說。

「唔緊要，我信你！你飲杯熱茶定定驚先！然後慢慢同我地講返頭先個情況！」我把熱茶拿給她，她喝了後，看來也鎮定了點！

「頭先......頭先......」那名新生想把經過告訴我們，身體像不自覺的顫抖著，難以發聲！

「唔緊要，你冷靜少少，慢慢黎！」我把雙手搭在她的肩膊上，讓她鎮靜下來！

「我......我好好多啦，頭先個情況係咁架！我換完衫之後，發現自己唔見左本筆記薄，我估應該係留左係操場，所以咪一個人出左去操場諗住搵返本簿囉！但係出面好黑，所以我係搵左好耐都仲未搵到！跟住我見到有個人係我前面出現，大約距離我四五米左右，我見到佢舉起右手，指住籃球架下面！但我突然醒起，其它隊員應該都係晒更衣室，我再望清楚，發現果個人全身係紅色衫，而且係無腳！我果下已經驚到即刻嗌出黎，之後我就見到佢飄向後門果邊消失左！」新生鼓起勇氣，把所有經過說出來。

我們三人聽到後，都不禁倒抽了一口涼氣，然後輕聲的討論著！

「伊雯，佢講果個紅衣，你估會唔會係之前果個紅衣女鬼？」阿寧說。
「我諗唔會卦，果個應該係故仔黎者！同埋都咁多年啦，可能佢太攰，有幻覺者！」我說。
「頭先佢咪話見到果隻紅衣女鬼，指住個籃球架嘅！我地不如去睇下個籃球架，睇下有無發現啦！」佩儀說。

「師姐，你地講緊咩呀？係咪知道果隻女鬼係咩黎架？」新生緊張的問。

「唔係，我地討論緊，可能呢排訓練太辛苦，搞到你出現幻覺者！所以我地討論緊聽晚仲繼唔繼續練習，定俾你地休息下，等後日可以發揮最佳表現！所以你唔駛擔心，我地以前練習，時不時都會有呢D幻覺，你返去休息下就無事架啦！」我安慰她，然後三人一起把她送離學校！

之後，我們去剛剛新生所說的籃球架下調查一下。

「喂，你地睇下！」我在籃球架下，檢起了一本筆記簿。
「呢本，咪就係頭先個女仔嘅筆記簿？」阿寧說。
「咁......係咪證明左，佢睇到嘅......唔係幻覺？」佩儀說。

我們三人相對而望，不自覺的打了個冷顫！
「痴......痴線架！無啦啦點會有鬼架，生人唔生膽，執埋野就走啦！本簿我地聽日俾返個女仔啦！」說完後，我們三人馬上跑到課室，執拾好後便逃離了學校！

翌日回到學校，我腦裏還惦記著昨天那位新生！
一來我需要把那本記事簿還給她，二來我也想再了解一下，她有沒有夢到任何可怕的事情！

因為根據學長和學姊的傳言，十年前的紅衣女鬼事件，在碰到那個紅衣女鬼後，回到家中必然會夢到些奇怪的東西！
我必需要印證一下才可以，希望她沒有夢到任何東西吧！

我來到那位新生的課室，並把筆記簿還給她！

「麻煩晒你呀社長！無左佢我驚會唔記得D Slogan！」她接過筆記簿，並感謝我替她找回筆記簿！

「唔緊要，我都係咁岩見到，就幫你執返者！係呢......你尋晚......訓得好唔好呀？」我問。

「尋晚？哦，好呀，一覺訓到天光！社長你講得岩，我應該真係太攰，我訓左差唔多十個鐘！依家勁精神！」她笑著對我說。

「哦，咁咪好囉！都話無事架啦！不過你今日我地都有練習，你會唔會太攰？太攰就唔駛黎啦，聽日比賽會仲辛苦架！」我說。

「唔緊要呀！我好精神，放學練幾耐都得！」她說。

「好啦，咁陣間放學見啦！」我說。

由於她看似沒有甚麼奇怪，而放學後也沒有再遇到奇怪的事情，所以我也很快的忘記了這次的事件。
只是想不到，在水運會的時候，我們又會碰到那個紅衣女鬼！

「謙社加油！」「勤社加油！」「誠社加油！」「信社加油！」
水運會當日，除了參賽的健兒外，啦啦隊的聲勢幾乎震懾全場，好不熱鬧！

比賽進行至一半，各社的啦啦隊分別為自己的社打氣！
「遊泳比賽攞冠軍，起勢如虹威過人！謙社健兒搶晒分，態度謙謙最迷人！」

「伊雯！今年D隊員真係唔錯，又齊又有氣勢！」阿寧說。
「係呀！希望今年可以拎到冠軍啦！話晒我做社長，都想佢地辛苦之餘又有回報！」我說。

啦啦隊表演完畢後，再次退回場外替游泳選手們打氣！
「咦？佩儀去左邊呀？呢度應該佢帶架喎！」我緊張的問。
「頭先佢話返更衣室拎返D野，但無理由咁耐架？」阿寧說。
「無計啦！我去更衣室搵佢，阿寧你幫手帶住先！」我說。

我跑到更衣室，卻發現裏面空無一人！
「佩儀你走左去邊呀？咦？會唔會返左去看台呢？」心念一轉，便打算先回去啦啦隊那邊。

但，就在我踏出更衣室的一瞬間，我看見一個人，一個女人！
不，我應該稱呼這個為「人」嗎？
因為，她身穿一身紅衣，容貌都被她的長髮掩蓋了！
而她的下半身，她的雙腳，是沒有的！

那一刻的驚嚇，真的不是文字所能形容！
我總算明白，那位新生，為甚麼那晚會跪在也上痛哭！
因為，我現在也有差不多的感覺，只是，由於現在還是白天，所以感覺要來得好一點點！

只見眼前的女人，站在轉角處，面對著我右手指向她旁邊，那裏是後樓梯的位置！
我突然記起，那天晚上，她也像這樣，指向籃球架，指示出那位新生的筆記簿，她現在是要表達些甚麼嗎？

但……我真的很害怕，我還沒有哭出來已經是極限了！
「快！快D去後樓梯果邊！」我腦內忽然響起了一把女人的聲音，聽上起應該稍為有些年紀，大慨跟學校那些校工差不多年紀吧！

我嚇了一跳，再定睛一看，只見眼前的紅衣女人，不知消失到哪裏去了！
「去左邊？唔通……係幻覺？」我心想，猶豫著要不要去後樓梯看一下！

掙扎了一會兒，我便走了到後樓梯的位置，只見佩儀倒在地上，臉色非常蒼白！
「佩儀！你點呀？」我跑到她身旁，只見她沒有了意識，我馬上把她扶到一旁坐著，然後跑了去找醫護人員。

經過檢查後，應該是中暑導致的脫水現象，之後她被送去了醫院！
雖然最後我們社拿到了啦啦隊冠軍，但我的心思早已不在這裏，腦內全是那個紅衣女人的事情！

而且，奇怪的是，看來不是只有我看到那紅衣女人，有頗多學生，在不同的地方都看到這個紅衣女人！
於是，這一天過後，紅衣女鬼的傳聞在各個班級裏都不徑而走，成為了接下來學生討論的重點！

更奇怪的，學校更煞有介事的，在水運會完結後，竟對學生宣佈，不要再進行沒有意義的討論，我更留意到校長竟然稍為顯得有些緊張，這事看來不是那麼尋常！

回到家中，我仍然對今天所看到的事情感到不能釋懷，究竟我看到的紅衣女人，是甚麼東西？是幻覺，還是真的像學長學姊們所說的，是那個邪惡的紅衣女鬼？

但……她兩次出現後，仿佛沒有任何敵意！
「點算呀！好想知究竟係咩一回事！呀，打俾以前謙社社長問下咪得囉！佢畢左業咁多年，話唔定知道D咩！」

水運會翌日是星期六，我吃過午飯後，便致電給前社長詢問紅衣女鬼的故事！
才知道，原來學校曾經鬧鬼鬧得這麼嚴重，當中還涉及兩位校工和一名叫作子鋒的新生！

而且更神奇的是，據說當時的校長是知道事件詳情的！
校長一直沒有更換，即是說現今的校長 – 杜太，她應該是知道些甚麼的！

憑著我天生的第六感，我幾乎肯定這次的紅衣女人，校長是知道些甚麼的！
於是，我理用這三天的假期，一直在搜尋著和紅衣女鬼有關的資料，翻查了無數的舊報章後，發現我就讀的學校，原來曾經發生過這麼嚴重的事情！
而且，更曾出現過兩次！

「無可能一間官立學校可以做到法事！肯定係校長批準先會咁順利！」我拿著舊報章這樣想！

直到最後一天假期，我還是沒有掌握到任何證據，亦聯想不到校長究竟和這次的事件有關聯！
但，我的直覺一直在警告我！

然後，終於又到了返學日，雖然經過了三日假期，但學生們仍在對那紅衣女人議論紛紛！

「伊雯，你有無聽到D人講呀，經衣女人單野，好似好多人見到佢！」阿寧跟我說。

「我知呀，睇黎應該係堅嘅！係喎，佩儀你點呀，果日做咩事暈左？」我說。

「我果日其實本身都唔係好舒服，跟住我返更衣室諗住搵藥食，點知都未去到，就暈左啦！但我明明記得自己貪快，偷行左小食部果邊條路，應該係個無人經過嘅位暈左先岩！我完全唔知點解會去左後樓梯！」佩儀說。

奇怪，該不會是那紅衣女人做的吧？
感覺上她都在幫我們，沒有打算要害我們，我真的想不通，這個和以前的紅衣女鬼傳聞太不相同了！

「伊雯，搞咩呀你？呆下呆下咁嘅？」阿寧問。

「吓？無呀，可能夜訓者，我去保健室休息下先！」可能連續數天不斷搜尋新聞，加上水運會那天的勞動，使我感到有點不舒服。

我來到保健室，感到自己沉沉睡去，在半夢半醒間，我聽到有人在說話。

「喂！衰婆，就係呢個女仔啦？」一把不認識的男人聲在說話。

「係呀，就係佢啦！果次佢聽到我講野！」這聲音比較耳熟，是一把女聲，但我想不起來在哪聽到過。

「無理由，佢又唔似子鋒咁有靈力，我地咁弱嘅力量，佢應該感覺唔到架！」男聲說。

「我都唔知呀？佢果日應該真係聽到，不過都唔關我事啦，反正都救返果個暈左嘅細路女！」女聲說。

「咁你睇完間學校未呀？我地搞到咁大件事，快D離開呢間學校會好D！唉，都叫你唔好變紅色衫架啦，白色咪好囉！」男聲說。

「又係你個死佬話鍾意紅色嘅！得啦，變返白色好未！我都睇夠啦，見到依家D學生咁開心，我已經好滿足！」女聲說。

「咁我地去同校長打聲招呼，之後就走啦！下一站去邊好呀？返雲南？定繼續係香港行下？」男聲說。

「係香港行下先啦！我地黎緊大把時間周圍去，雲南遲下再去都得！」女聲說。

「喂，佢就醒啦！我地都係去搵校長啦！」男聲說。

然後，我就清醒過來了！

「頭先，係夢？定真係有人係我側邊傾計？校長，佢地提到校長！過去睇下咪知囉！」醒來後，精神好了很多，好奇心也跟著醒過來了。

於是，我偷偷的來到校長室，不知道為甚麼，校長室外都沒有職員。
這對我來說，是一個難得的機會，我把耳緊貼在校長室門外，隱約聽到校長像在和誰對話。

「堅叔，堅嬸，原來係你地！你知唔知D學生話見到紅衣女人果陣，我幾驚又有咩事發生呀！」這聲音，應該是校長。

「唔好意思呀校長，個衰婆話想返黎睇下，原本無諗住俾人見到架，點知搞到咁大件事！」一把男聲說，這聲音跟剛剛我睡著時聽到的，是一模一樣！

「唔緊要！不過，估唔到係你咁辛苦等左咁多年，最後用呢種方式一齊者！」校長說。

「我都估唔到個衰佬真係會等我咁多年，搞到我一直都唔敢走！依家咁都幾好呀，鍾意去邊就去邊！」一把女聲說，這聲音真的很耳熟。

「你地睇得開就好啦！學校方面，你地唔駛擔心！呢D野我之前處理過好多次，搞得掂！不過黎緊你地會去邊呀？會唔會搵一搵子鋒佢地，佢地知道你地唔係度，都傷心左好耐！」校長說。

「唔啦，如果唔係個衰婆話要返黎學校，又搞到咁大件事！我地都唔諗住同校長你聯絡，始終大家生活嘅情況都唔同左，無謂搞到佢地又諗返起我地啦！」男聲說。

「係啦，我同衰佬黎緊會周圍去架啦！係香港遊下，之後可能返雲南果邊睇下！總之就當補償返以前失去左嘅時間啦！」女聲說。

「咁好啦，如果你地有需要就返黎搵我啦！就算我幫唔到你地，師兄佢應該都幫到你地！」校長說。

「多謝晒校，不過......」那把男聲突然變小，仿佛完全靜了下來似的。

「奇怪，點解無晒聲嘅？」我心裏想。

忽然，校長室的門被打開了，我整個人失去了重心，撲向校長室內。

「呢位同學，你係度做緊咩呀？」校長看著趴在地上的我。

「吓......我......我......」我慢慢站了起來，不知道怎樣解釋才好。

「唉，後生仔女就係鍾意八卦，子鋒係咁，你又係咁！你閂門先，入黎坐！」校長對我說。

我把門關上後，乖乖的坐在校長面前。

「我無認錯嘅話，你應該係謙社社長，今年讀中六，你叫咩名呀？」校長說。

「我......我叫鄭伊雯！」我緊張地說。

「伊雯，你唔駛緊張！你係咪有咩想問呀？」校長說。

聽到校長這樣直接，我反而不知從何問起。

「其......其實，我有啦啦隊隊員話見到紅衣女鬼，果日我係泳池，都親眼見到果隻女鬼！我又查過D資料，見到校長你處理過關於學校撞鬼嘅野，想......想問下校長你係咪知道D咩？」我仍然感到緊張。

「原來你已經查到呢個地步，咁......等我講下少少故事俾你聽啦！」校長說。

之後，我了解到這間學校的過去，和曾經在這裏的堅叔堅嬸感人的事件！

「咁者係話，我果日見到嘅，就係堅嬸？佢係見到有學生有危險，佢先出現提醒我！」我奇道。

「係呀！不過你放心啦，佢地走左架啦！依家佢地已經去左環遊世界，你地唔會再見到佢架啦！」校長說。

「原來係咁......」我有點失落的說。

「做咩呀？你想佢地仲留係度咩？」校長見我悶悶不樂，於是問我。

「哦，唔係，只係我誤會左堅嬸嘅意圖，好似有D唔好意思，想同佢講聲對唔住者！」我說。

「傻嘅！我唔介意，我原諒你！」我忽然聽到頭上傳來一把女聲，我抬頭一望，看到有兩個「人」，正貼在天花板看著我。

雖然兩人容貌正常，但我也被這景象嚇了一跳，然後暈死過去。

當我醒來的時候，我仍然躺在保健室裏！
那麼，剛剛的是夢嗎？

我帶著疑惑，打算回到教室，但我經過校門時，我看見有兩位老人家，一臉慈祥的看著我，揮了揮手，然後消失了！

「原來......果個唔係夢！再見啦，堅叔，堅嬸！」我向空無一人的校門揮了揮手，然後回到教室，重新過回普通的學生生活了！

完

若有興趣睇下＜＜紅衣女孩＞＞正文，可於紙言觀看：https://www.shikoto.com/i/z78

歡迎到筆者facebook，一起分享自己的怪奇經歷：https://www.facebook.com/insidemyheart2015/