「死啦…點算呀…如果，如果佢話唔鍾意我既話…」
我望住呀強，R曬頭咁，我都唔知佢煩D乜。
呀強係我死黨，由中學到宜家差唔多6年，都仲係咁細膽。
「唉，驚咁多做咩呀，去馬先講啦，唔得咪再揾第二個囉。」我好冷靜咁講。
「傻架咩，邊有得咁架，咁易揾我就唔使咁頭痕啦！」呀強好大反應。
個一次中六既last day，呀強約左佢鍾意既女仔係門口等。
「得喇得喇…咁你行得未呀，唔好要人等咁耐啦。」
「好…呀！！！我仲係好驚！」佢份人就係咁。
我用力拍左個背脊一下，推佢出去。
「行啦，唔使諗到咁複雜，將你想講既野講出黎。」
之後，我就細細聲講左句︰「其實…真係咁得人驚咩？」
個時，我仲未知咩叫鍾意一個人。
兩日黎我冇再收到呀強任何messege，我以為個傻仔衰左，又收埋自己。
點知一打開Facebook，就見到佢兩個放閃。
「死仔包…有異性就冇人性。」我望住電腦咁講，不過佢地開心咪得。
因為我讀既科好少有女仔出現，都冇乜參加過學校既活動，上到大學後鮮有同異性接觸既機會，頂多都係中同聚會。
我娘親亦開始催我︰「呀仔，係時候架喇，揾番個女朋友拍下拖啦。」
「唉，得閑先啦。」
「好忙咩你？咪又係番工番學？好心你啦，唔好話你冇心揾…」
冇錯，我一邊番緊part time，一邊番學，不過應該唔出奇。
「係喇，知喇。」
每一次我都係咁敷衍佢。
我番緊既係一間coffee shop，我亦都係個度遇到鍾意既人。
話說半年前，鋪頭請左個新人，佢叫Alice，唔算好靚女，但係佢笑起上黎，真係好迷人。
「滿仔！過一過黎！」老細叫左我過去。
我地係一間小型既coffee shop，人數唔多，計埋我都係得4個人，所以好多時未學曬都要落手做，相對地都會學得快左。
「呢位係我地新同事，佢叫Alice，今日開始佢就跟你，我同家姐都唔得閑，所以你教佢，ok？」
「哦好，冇問題。」之後我就帶左佢去番counter個邊。
「你好呀，以後就多多指教喇！」個次係我第一次面對面望住佢笑。
其實Alice本身係我地鋪既常客，每個星期六都會見到佢同D朋友過黎溫書，了解左之後先知佢仲係中四既小妹妹。
而我，都留意左呢個小妹妹好耐，好耐。
每次佢黎買野飲，佢都笑面迎人，帶住燦爛既笑容走過黎。
當時我仲學緊，所以唔會比我沖野飲住，而企係counter既我，就趁呢段時間，偷偷咁望住佢。
佢既側面，真係好吸引，想永遠將視線停留係佢身上。
之後既一個月，Alice都係跟住我學野，由咖啡豆既產地，咖啡既種類，咖啡機既運作等等，將我識得既盡我能力教比佢。
「係喎，你…點解冇啦啦想番coffee shop既？」我問佢。
「嗯…冇呀，我覺得沖咖啡好好玩囉！同埋你拉D花好靚呀！因為想學，咁岩你地又請人，所以咪試下囉！」
講真，由細到大除左我爹娘，好少人讚過我，呢一下搞到我有D心花怒放。
「哈哈…真係既？咁你要比心機D學野喇！」
「嗯！」佢又笑。
我真係好想好想即刻攬住佢呀（拿唔好話我變態佬:P）！
所以，我開始諗辦法約佢出街…食飯姐，真係唔好諗到我咁變態。
收鋪個時…
「話時話，宜家D後生仔鍾意去邊度多？」
「嗯…其實冇架，周圍去下，食下野，行下街囉。做咩呀？」
「就咁既，我呢D老人家就想運動下，問下你有咩好介紹咁姐。」
「哈哈！你都唔係好老姐！」
「唉，唔好笑我啦。咦？你聽日得唔得閑呀？」
「睇下先…我ok呀！」
「不如咁啦，聽日你帶我行下D年輕人會去既地方啦，比我見識下世面都好呀！」
「哈哈！又好姐，老人家！係時候出黎運動下喇！」
THANK YOU LORD！！！
「咁交換左電話先啦，方便聽日聯絡嘛。」
「好呀！聽日見喇喎！」
就係咁，我同佢第一次約會順利完成。
之後，我地都有keep住一齊行街睇戲食飯，尚算發展得幾順利，但係…
「總是開不了口讓她知道…」
原來鍾意一個人，係會咁緊張，想表白既時候好驚講錯野，乜都要諗過度過。
上個月，我係鋪頭撞番呀強。
「喂！呀滿！」
「咦喂！好耐冇見喎！」
冇錯，我地好耐冇見面，有咩都係whatsapp傾多。
「呀嫂，你都好耐冇見喇喎！」
「你過去坐下先…點呀你，咁耐冇見，識到女朋友未呀？」
「唉，又講呢D。」呢個時候，Alice過左黎。
「Hello！你係滿哥哥D朋友？」
呀強一聽到「滿哥哥」三個字，即刻笑到收唔到聲。
係呢半年裡面，Alice改口由「老人家」叫我做「滿哥哥」…
一般黎講係街到比人咁樣叫羞恥度簡直爆表，不過比你鍾意既人叫，又係另一種享受。
「係呀…Alice你抖下得架喇…等我黎招呼佢啦…」
Alice行開左，呀強都笑完了。
「嘩sorry，雖然你whatsapp有講過，但估唔到現場聽個衝擊咁大姐。」
係，我同呀強有係whatsapp講過Alice。
「原來都幾清秀喎，識揀呀。」
「唔好講呢D住啦…我打算…我errr，我想…」
「表白下話。」
「係…」
「好簡單姐，約出黎，揾個浪漫D既地方，情深款款咁望住佢，講出個三個極具魔力既字『我愛你』，再叫你做你女朋友，FIT曬！」
「大佬呀，邊有得咁架…」
唉？咁熟口面既呢句野？
「喂，中六我追呀儀個時邊個叫我唔好諗咁多架。」
好似係我喎…
到左宜家，我終於明點解個時呀強會咁驚。
我唔係怕失敗，失敗左咪再黎過，我怕既係失敗之後，Alice唔會再比第二次機會我再黎過。
「…我…咁…」
呀強拍左一下我膊頭，之後講
「唔使諗到咁複雜，將你想講既野講出黎，係你教我架。」
係喎。
有時有D野，真係唔使諗得咁複雜。
所以我約左Alice一陣見面，各位弟兄姐妹，請祝福我一切順利。
如果你都有鍾意既人，唔好諗咁多，因為有時有D野，真係唔使諗得咁複雜。
去馬啦
