「分手啦。」
呢三個字無疑會帶黎好大既殺傷力，令人一沉不起，但對某d人黎講可能係一種解脫。
我叫家豪，我有一個拍左拖年半既女朋女，佢叫做曉欣。
我同曉欣識左兩年，係中四暑假既聯校camp，當時我地同一組，係你主動同我傾計，當時我已經覺得呢個女仔好charm，我做出當時我覺得好爆既事，問你攞電話。
一年前既情人節，我鼓起勇氣約左佢出街食飯，就係尖沙咀海旁，我同左佢表白，係燈光下擁吻，講真成件事真係好浪漫，浪漫到我未必會對第二個女仔做同一樣既野。
曉欣唔算好靚女，只係比一般女仔好少少，但最緊要都係合眼緣姐，佢唔算高，米六到米七左右，我都只係高佢少少。
曉欣佢細個係外國住過，所以有少少鬼妹仔性格，又唔會好嚴重，對佢一齊可以好放鬆自己，屋企都算叫做有錢，因為父母長期留係香港做野所以先番左黎。
相反，我性格好孤僻，唔多同人講野，只有係朋友同佢面前先可以做番自己，而且我又係個屋村仔，除左食飯錢之外想搵個銀仔R下痕都冇，上天咁都比我追到佢都算對我不薄。
開頭半年，我同曉欣都好開心，好幸福，雖然唔同一間學校，但就係附近，間唔中約出黎食lunch，傾下計，週末有得同佢行下街，番屋企玩下住飯仔，其實已經好唔錯。
雖然我住屋村，但佢一d都唔嫌棄，反而好鍾意走上黎玩，我爹娘都好鍾意佢，當正未來新抱咁睇，佢既父母都對我好好，有時都會叫我上去食飯。
但時間耐左，感情亦開始疏遠左。
佢另外亦搵左個師兄幫佢補習，聽講個師兄考得好好，所以搵佢一對一補習，之後我地都少左見面。
升上中六之後，我地由日日見面，變成透過whatsapp噓寒問暖，最後連短訊都冇埋咁濟。我知道，佢好想考到大學，如果唔係佢就要番去外國，佢係我地拍拖冇幾耐就話左我知
「如果我走左，邊個睇住你呀，一陣你周圍搞搞陣我咪好頭痕？」
但我知道，呢一刻，佢唔係為左我而奮鬥。
前日，我同fd出街既時候，無意中見到佢同個位考得好好已經入左u既師兄，係大街中卿卿我我。
個一剎那，所有野都好似停左，街燈唔再閃爍，呼吸都停止，我倆四目交投，你眉頭一皺，而我，就好似陌路人一樣，毫無表情咁望住你，然後與你擦肩而過。
我，有咩做得唔夠好。
就係個一晚，我收到佢既whatsapp。
在嗎？
做咩呀
我都係
你覺唔覺得我地都變左
我覺得你似搵緊藉口多d
No
我真係覺得我地之間唔
再似一對情侶
所以你覺得有咩解決方法
分手啦
Ok fine
或者你講得岩，我的確已經變，由你選擇唔去解釋清楚既時候，我又變番個個孤僻既我。
分手，其實冇想像中咁痛，至少我地都得到解脫。
