To 希雯︰

喂,好耐冇見喇!
你宜家幾好嘛?過左去台灣之後慣唔慣呀?
…得喇,唔好笑我寫野行喇,大編劇。你知我不嬲寫字唔叻架啦,將就下啦。

我地識左有冇十年呢?仲記得第一次見係中二,你成日強調我同你講緊第一句係DLLM,我真係冇印象喎…算喇,呢D衰野唔多講喇。
以前一齊打機、一齊吹水、一齊傾動漫,由完全唔識到親密如好似兩姐弟一樣,咁多年黎,我非常慶幸有你既出現。有好多野除左父母之以,我只有同你講過,你都係一樣。
宜家仲係咪鍾意睇BL呢?認真,睇少D啦,冇男仔想個女朋友成日FF自己男朋友同另一個男人架,至少我唔係囉!以前成日話我係基!事實都證明左我唔係,因為…我出左POOL喇!哈哈!

講起上黎,你揾到男朋友未呀?上次你同我講個個男仔都幾好啦,有我七八成,諗得過,分分鐘搶手貨黎架,係時候為自己幸福著想下。

唉,寫寫下又變左廢話添,明明係為左恭喜你套戲大賣先寫呢封信。
套戲真係好好睇呀,雖然同我心目中既畫面有D出入,哈哈!恭喜曬呀!你走之前比我睇過一次劇本,個時你竟然話因為我睇得明而好開心,我都打左個突,仲講笑話記得揾我做男主角,估唔到短短幾年,你真係可以實現夢想,我都話左D呀sir唔識貨架啦!

記唔記得你Final Year個件事呀?個時我真係唔知發咩神經,好似變左第二個人咁。

個時你拖住一大喼道具,打電話黎同我講話你好辛苦,我諗都冇諗即刻衝左過黎,幫你帶D野過學校,見到你個班所謂組員咁對你,我真係忍唔住,將你唔敢講既野講曬出黎,D呀sir又係癲既,我地既真話又唔信,佢地D咁既大話都信。
我好記得你同我講過,好憎自己為左利益唔能夠暢所欲言,做番自己,所以我先幫你講曬出黎,點知個八公竟然踩多你兩腳,我忍唔住揮拳打落去。
係喇,我知道係唔岩,但真係好唔服氣嘛,自己做錯野又唔認,應承人地既野做唔到仲堆比人,仲要聲大夾惡,你當比我發洩下啦。

之後我都一直陪住你,直到去晴真正要過日本讀書,或者以後都唔會番黎,係離境大堂,你第一次係我面前放聲大哭,我將你擁入懷中,一路聽住你既喊聲,好心痛。
個段時間我地形影不離,食飯,行街,幾乎每日都係我陪係你身邊,你父母仲講笑話將你交比我,諗番起都好笑。
你講既個句「要一齊既話一早一齊左啦,使等宜家?冇可能架!」,老實講,我有D失落。唔知幾時,我對你由家人既感覺,慢慢,慢慢變成戀人,但我知道,一切都只係我一廂情願,你對我始終冇變過。
即使係咁都好,我都有幻想過我地一齊左既話會係點,幻想過我地既將來,一切一切,幻想過,但無論我點努力係腦海裡去製造呢D畫面,都冇辦法去實現。於是我選擇左放低你,直到宜家,甚至去到以後,你都係我既好家姐。

點都好啦,要講既都講曬喇,你要繼續加油,我同我女朋友一定會支持你,寫多D好劇本出黎呀!等你下次番黎幫你搞多次慶功宴!拜拜!


安好

小狗上