唔知大家有冇做過一啲好後悔，後悔到想重新再黎過既決定。
話說小弟有一個好朋友，我同佢係中學識既，同過班一年，因為一套動漫同一隻遊戲熟絡左，即刻之後分班再唔係同一班，甚至畢業後各散東西都可以保持聯絡。
因為我係單親家庭長大，細個媽媽已經對我好嚴，基本上我好少同同齡既小朋友一齊玩，亦唔多出聲，唔多講野，只知道要讀書，供養媽媽，所以好多佢地知道既野我都冇接觸、甚至冇聽過。直到中二個年，我識到佢。
佢係我眼中係一個好厲害既人，有一種好特別既魅力令人想同佢一齊共事、一齊玩、一齊傾計，好大家姐既感覺，而事實上佢真係比我地大兩年，所以係同輩出現一個咁既角色令人安心好多。講真個句，佢既社交能力好強，有位朋友甚至只係打機識番黎，到宜家竟然發展到去對方屋企過夜都冇問題，而正正因為佢呢種能力令我既社交圈擴大，嚴格黎講，我今日有既野，識到既朋友，幾乎所有野佢都有份比我，冇佢既出現我唔會由機械人變成一個有感情既人。
但就係今日，我失去左佢。
雖然講到佢好似好好咁，但其實佢有個缺點，就係把口比較賤同唔識收歛。
大概兩年前，我莫名其妙地被冠上「GAY」呢個代名詞，往後我係group入面講野，私chat，以致Facebook上面一啲公開既post入面發言，都離唔開比佢話gay。初初時我覺得冇乜野，大家當玩咁姐，佢玩得開心，我又冇咩損失，反正識我個班fd都知係玩玩下，咪由得佢玩，但講真話唔嬲就假既，點都有啲唔開心，不過算啦。
但反效果開始慢慢走出黎。
起初可能個幾月一次，之後一個禮拜一次，到最近呢半年幾乎一日一次，慢慢地身邊朋友望我既眼神同態度開始唔同左，心諗出事了，唔係當左真事下話。而佢既行動，都慢慢由公開留言post tag我，變成直接post上我個wall到，有時候又歪曲我既意思，夾硬扯去gay呢個話題，呢個時候我都仲忍得到，會諗下用啲咩方法推番個波比佢，至少搞清件事比其他人知道先。
到左呢幾個月，因為轉左工，所以識多左新朋友同同事，突然有一日有個同事問我︰
同事︰「喂其實你係咪真係gay架？」
我︰「下？梗係唔係啦，發生咩事呀？」
同事︰「冇呀，睇到你fb個wall上面有個人係咁講係咁講咪問下囉。」
我當下真係好灰，咁算啦，同同事講清楚話佢玩野咪算。到有一日，呢位朋友whatsapp我︰
佢︰「笑死我」
我︰「咩事(笑喊)」
佢︰「岩先呀XX上左黎我度
佢見到你個whatsapp就指住問「佢宜家係咪鍾意男人」
好好笑」
我心諗點解你仲可以笑得咁開心，唔止新同事，連舊同學都誤會我，我仲點生存落去。
佢份人影響力極高，正如上面講過佢就好似大家姐咁，一出口就好多人附和佢，而佢呢類言論令我比好多人誤會。我唔想咁直接話佢，所以我用番公司比同事誤會個例子表達番我唔鍾意咁樣，可能我手法同說話表現得唔好啦，佢冇理到，繼續係咁。
到左上星期，我有日開緊工，放break既時候攞手機出黎睇啦，見到佢tag左我，我一下就撳左入去睇，點知一打開，竟然係一條片，入面一堆男人淨係著住底褲(碌開FB既你可能都見過)，當時有同事咁岩經過見到，又用奇怪眼神望住我，我尷尬到即刻想跳落樓，大佬，office hour唔好搞啲咁既野得唔得，一怒之下我block左佢FB，諗住佢唔發現就今日解番佢。
到左琴晚，佢係group入面揾我︰
我︰「終於都發現(笑喊)」
呢一刻佢發現左，我諗住輕鬆地解決就算，解釋番成件事，點知佢一開口唔係咁問點解，一黎就講︰
佢︰「屌你個肺
枉我仲幫你訂figure」blahblahblah之類
大哥，出左事淨係諗你為我做過啲乜，唔諗下你對我做過啲乜，開口就屌，我都有情緒架，於是︰
我︰「你知唔知
你個日tag我個gay post
我係邊度打開呀
公司呀
我幾撚尷尬你又知唔知呀
我比人誤會左幾撚多次你又知唔知呀
我唔出聲唔代表我真係唔會嬲架
你係度玩 ok fine 我由你玩
次次post上FB 全世界都睇到曬 你估我又有咩感受呀
忍左你好多次架喇 今次真係忍唔住先咁做」
之後，佢嬲左我，嬲我既原因係，我事前冇比任何signal佢，冇講清楚我唔鍾意，一氣之下粒聲唔出del左佢FB。
的確我語氣好重，講真我好耐冇咁認真去嬲過，但講完上面個堆野之後我即刻就冇事啦，個group既氣氛都緩和番，有講有笑，發洩完咪算囉，我都唔介意啦你仲嬲咩呀？而佢就自己唔出聲，自閉，又或者去揾第二個fd呻我啦，唔知，總之就係我錯曬既意思。
係block佢個一刻，我完全冇諗過會搞到咁大，我真係諗住警告下佢就算，點知最後都係忍唔住爆曬出黎。今朝，佢退左group，亦都正式同我，絕交。
個時候另一個朋友揾佢，問佢「你其實想唔想同(我)和好？」，佢既message，亦都係最後一段，係咁講︰
「其實我係群到講左我嬲乜
我唔係港女都唔係某D人 嬲左嬲乜都唔講
um 其實問我想唔想同佢傾好 我真係唔想 我諗佢都唔想 刪左幾好 唔使加翻 千奇唔好奇 最好block左唔好解封
因為我都係」
收到佢話要絕交唔再做朋友既時候我係公司，我係位忍左好耐，最後忍唔住去廁所喊，我完全冇諗到我呢個舉動斷送左我地之間七年既友情，我好後悔，後悔到想死左去重新再黎過。
如果可以重新黎過，係咪應該一開始就講清楚？係咪可以唔block佢？係咪可以平心靜氣解釋曬成件事？
我完全冇唔想講和既諗法，但係佢眼中我已經變左個雙面人，嘴上可以同你談天說地，心裡就對你恨之入骨。我好心痛，原來我既忍耐帶黎既係咁既後果，我忍耐力唔夠又會帶黎呢個結果。
七年旅程，就此結束
忍就忍一世，永遠都唔好比人知，做一個冇感情既機械人。
