相信大部分既生物由古到今都係以群體生活既形式存在，人類亦唔例外，更加係建立社群、團體等方面做得比其他物種出色，靠既係人類至今數千年既文明。
人類既相處模式好有趣，我地會將人分類，然後用唔同既方式對待唔同既人，比方說，你對你父母會同你對你朋友唔同，你對你朋友亦會同你對另一半唔同，呢種係基本既待遇差別。面對唔同人，就戴上唔同既面具，一副專門應付眼前人，特製既面具。
隨著唔同既人，你要根據佢地對你既感覺，轉換成唔同既身份，用相應既態度去面對佢地。冇錯，構成呢副面具既元素就係身份同態度。
身份，非常簡單，就係當下你既角色。就好似宜家，我係紙言呢個平台寫下故，同大家分享下所見所聞，我既身份自自然然係一個網民或者網上既作家（雖然我未去到咁厲害既地步），又或者我企係演奏台上為觀眾演出，我就係一個表演者，當我工作面對顧客既時候，我就係一個提供產品或服務比人既員工。呢d唔同既身份，相信大家手上都會有唔只一個，甚至會同其他人重疊，但真正令人與人之間產生對比既，係態度。
有左身份之後，你用咩態度去對待個個人，其實好主觀。即使係同一個人，有人會好喜歡佢，亦有人會好討厭佢，在於你同佢既處事或價值是否一致，所以真係好主觀。
舉一個簡單又易明既例子，你作為你父母既仔囡，有冇人既父親或者母親對你特別寵愛，同你特別投契？
你可能會話，咁一個身份係父親，一個係母親，身份都唔同點比較呢？NoNoNo，你講既野唔係冇道理，但你作為兒女，身份亦冇變過啦，咁點解你都會對佢地有唔同既態度？再黎，你既兄弟姊妹同你，對住父母既態度亦會不一樣，亦都係同樣道理。
其實，有唔同既態度取決於兩樣野
一，該對象給予你既感覺。呢d野好相對，你對人點，人地就會對你點。
二，人既際遇同價值觀。每個人成長既時候經歷既野都唔一樣，有人出生富裕，有人出生貧苦，做成佢地不同既價值觀，有人認為錢可以買到一切，有人就認為真心冇野可以取締，因此促成左佢地對唔同人既態度。
咁其實戴面具做人係唔係一件壞事？答案我到宜家都未搵到。
正正因為人類戴住呢d面具去生活，社交方面尚算進步左，人會識得去裝扮自己，變成一個得體既人，將自己既黑暗用面具既遮蓋，永遠留最好既一面比人睇。講真，有邊個第一次同異性出街唔會執到靚一靚，言行舉止形同君子淑女，務求呃到對方透一透？同埋，面具可以避免好多尷尬既情況出現，作為打工仔，遇著個衰腦細，係佢面前笑騎騎，放左工除面具又係佢背脊放毒蛇，點都好過你擺曬上面西佢面啦，博炒咩。
戴面具做人未嘗唔係好事，但都未見得唔係壞事。
的確，你靠著唔同面具係唔同社群中做到好融洽和諧，但冇左個面具就冇人識得你，只會覺得你好陌生，只係孤獨既個體，搵唔到真正屬於你既地方。
每日都要戴住面具，面對唔同既人，你識唔識除低面具去面對真正既自己？面具下既你，其他人又認唔認得？你，仲係唔係你？
