兵,原指武器、戰士、軍隊等等。

唔知道幾時開始,呢個字,就變成男士們圍住某位女士氹氹團,對女士阿諛奉承,百般獻媚,為女士付出時間、金錢和感情,卻從不計較回報(實情卻不是不計較回報,而是不能計較回報)的一種「高尚存在」。

而且,這種男士更有一種特質,就是永遠不會成為那為女士的特別存在,他不會在某一天,變成女士的男朋友,更別諻論升格做老公這種高等級職業。

佢地嘅職業,永遠只有一個稱號,就是「兵」。

但別以為職業一樣,兵的待遇便會一樣!
即使在兵之中,也會有不同的規格。

網上有不同的文章或短片,都有詳細介紹,例如伙食兵(專門陪飲陪食)、哨兵(廿四小時on call,隨時為你候命,真係總有一個喺左近,仲方便過便利店)、禮物兵(三不五時會被召喚出來,補給女士所需的兵種)等等。

由於兵種太多,無法詳列,所以,我們一般來說,會統稱所有兵種為「觀音兵」。

為甚麼是觀音兵?
簡而言之,男士音圍著一位女士團團轉,就像膜拜觀音一樣,所以,女士一律會被統稱為觀音娘娘,在下面保護著娘娘的,自然便是兵了,觀音兵一詞大概由此而來。

來到這裏,相信大家對甚麼是「觀音兵」,應該大致上有一定程度的理解了!

那麼,我有一個疑問,世人常說男女平等。
而現實中,亦的確會出現一些稀有男性生物(我唔係講緊男明星,唔好誤會),會得到眾多女士喜愛,會在那男性身邊團團轉。

做的事情和「觀音兵」非常相近。
那麼,我們應如何稱呼這些女性呢?

筆者用咗極長時間(大概一分鐘),喺浩瀚無邊嘅知識世界裏進行了大規模搜尋(Google Search),然後再用咗極科學性嘅觀察(我對眼)搜尋返嚟嘅大量知識(Google Search出嚟第一頁嘅所有標題)。
最後,我用全世界最精密嘅儀器(我個腦)去分析,得出咗一個無人提出過嘅結論(因為太無聊),就係,對於做出同觀音兵一樣行為嘅女士,竟然係無一個專稱!

Oh No,That’s Impossible,喺呢個男女平等嘅世界入面,竟然無一個專有名詞係俾女性用?
簡直係對女性嘅侮辱!我真係接受唔到囉!!!

所以,我日思夜想(起身諗一諗,瞓前又諗一諗),我決定嘗試要為女性平反,佢地喺值得擁有一個專有名稱嘅!

但難題嚟啦,究竟又乜嘢,可以令人聯想起女性,又可以讚頌佢地呢種「高尚存在」。
而且,呢個稱號,絕對唔應該輸俾「觀音兵」!

觀音……觀音,無錯,呢一種行為其實同崇拜偶像或者尊敬神佛差唔多。
同觀音可以相提並論嘅……無錯,係佢啦,如來佛祖!

如來佛祖同觀音一樣,同樣受到世人嘅尊敬,而且亦有一群信眾,所以我覺得,如來呢個稱號,用喺被女圍嘅男人身上,係非常合適嘅!

咁……啲女仔呢?
喺芸芸詞語當中,我精挑細選,最終選擇咗幾個字去進行篩選。
分別係僕、妾同埋婢!

僕,僕人也,亦作奴僕之意,但同呢啲女士嘅行為又有啲唔同,始終佢地唔覺得自己係僕,男人亦唔係當佢地係奴僕咁去對佢地,所以,OUT!

妾,古時為側室,妾侍或小老婆之意,但喺一夫一妻制度底下,妾已經幾乎滅絕(嗱嗱嗱,有錢人果啲唔計架,果啲係情人,有名無份,唔同架,唔好搞錯),所以呢個字,唔太適合,OUT!

婢,婢女也,指受特定主人差遣者,啱啦,男神對佢地講,咪主人囉!咁主人講嘢,佢地又會去做,咁咪差遣囉!中呀呢個!
所以,我最後揀咗呢個字嚟代表呢啲女性!

係,我知!我知你地諗咩架!
你地想話,明明有啲字會仲好啲呀嘛!
咁無計架!我諗唔到呀嘛,用住先啦,用用下,講講下,就習慣架啦!

咁我用咁鬼多字,整咗個「如來婢」出嚟,到底有咩意思呢?
無架,開心囉,得意囉。

你又唔問下啲兵呀,婢呀,佢地都係唔會有回報,咁點解佢地又做?
「我鍾意囉」,無錯,我鍾意。

喺感情呢回事上面,有幾多人真係咁理性去分析,有時明知自己係兵,係婢,又如何?咪一樣繼續去膜拜佢地嘅男神女神。

就算你將事實話俾佢地聽,又如何?你估佢地真係唔知咩?(傻嘅蠢嘅另計)佢地聽完,反省完,之後咪又係繼續當兵做婢。

就算對方有女朋友/男朋友,又如何?可能有一日佢地會散呢?(我承認係有啲黑心,但事實真係咁諗呀嘛)講真,散咗,咪一樣唔會同兵同婢一齊。

當你講到一個點,兵同婢都唔識反駁嘅時候,就會用一個終極理由。
「呀邊個邊個,佢之前都同我一樣,但最後佢同女神/男神真係喺埋一齊,依家仲結埋婚!我信,我都會有呢一日!」

你諗下,你去到呢度,總有啲咩可以同佢講?
只要佢一日仲去「信」,一日仲覺得有希望,你係唔會阻止到佢地當兵做婢架!

只係,當兵做婢嘅你地有無諗過,你身邊,可能都有呢啲人。
或者,你本身就係人地嘅「觀音」或者「如來」,與其花咁多心神去追尋不可能,不如放眼四海,話唔定,你會有所發現呢,係咪?

從來神就係只可遠觀架啦,人同神,又點會有結果呢?
觀音兵又好,如來婢又好,我欣賞你地嘅痴情,但呢種痴情,分俾一個值得去愛嘅人,唔係仲好咩?

神,留返俾神去同佢地一齊啦,好無?

最後,其實兵同婢都幾襯呀,至少大家都係肯付出。
如果將你地嘅真心放去對方身上,都唔錯呀,諗諗佢啦。

無頭無腦寫下的一篇文章,靈感來源只因一次飯局朋友傾訴而來,所以呢篇文章,算係寄語朋友的一席話,若咁不幸有讀者入咗嚟睇,而又咁啱有啲嘢拎得走,咁我就真係恭喜你啦!

最後,如果大家睇完,仲想睇下我寫嘅其他文章,不妨去我FB,順便跌一個like,等我有動力再去寫下文章,喺呢個荒謬瘋狂嘅世界入面,透過文字抒發一下不同嘅情緒

http://www.facebook.com/insidemyheart2015